Mark 14 — Mossi Moore (KÃAB-PAALGÃ KOE-NOOGO)

1Ra keta rasem a yiib tɩ ta zʋʋg-n-bas kibsã, la bur sẽn ka rã-bɩll kibsã. La maan-kʋʋdbã kãsem-dãmbã ne tõog karen-saam-dãmbã da baooda sɩlem ning bãmb sẽn na n maan n paam n yõk a Zezi n kɩt tɩ b kʋ.

2La b yeelame tɩ b ra maan kibsã wakate, tɩ rãmbg ra wa n zĩnd nebã sʋk ye.

3A Zezi sẽn be Betani n zĩ yĩng soab a Sɩmo roogẽ n dɩtẽ, pag a yembr n wa be n tar albatre tʋk sẽn pid ne naar halaal tɩdar kaam, a raab sẽn ya toogo. La a wãaga tʋkã n kiig kaamã a Zezi zugu.

4Bãmb karen-biis kẽer sũy yikame tɩ b gom ne taab n yeel tɩ yaa bõe tɩ b sãam tɩdar kaamã?

5Tɩ b ra tõe n koos-a-la deniye kobs-tã n kõ naong rãmba. La b yẽgma ne pagã.

6La a Zezi yeel-b lame: Bas-y-yã-a laafɩ. Bõe tɩ yãmb namsd-a? A maana maam yel-sõmde.

7Tɩ bõe, naong rãmb na n kell n bee ne yãmb wakat fãa, la yãmb tõe n maan-b la neer y sẽn dat wakate. La mam ka na n be ne yãmb daar fãa ye.

8Pagã maana a sẽn tõe. A pĩnd n ninga mam yĩngã tɩdar kaam m mumb yĩnga.

9Mam yeta yãmb sɩda tɩ dũni tɛk fãa, zĩig ning fãa b sẽn na n moon koe-no-kãngã, b na n togsa bũmb ning pagã sẽn maanã, a tẽegr yĩnga.

10A Zudas Iskaryo sẽn ya a Zezi karen-biis piig la a yiibã ned a yembr kẽnga maan-kʋʋdbã kãsem-dãmb nengẽ n tɩ yeel-b t'a na n yõka a Zezi n kõ-ba.

11Koe-kãng yɩ-b la noogo, tɩ b kãab-a ligdi. La a Zudas baoo weer ninga a sẽn na paam n yõk bãmb n kõ.

12Bur sẽn ka rã-bɩll kibsã pipi daar sẽn ya zʋʋg-n-basã pe-bilã kʋʋb raare, a Zezi karen-biisã soka bãmb tɩ b ratame tɩ bãmb kẽng n tɩ segl zʋʋg-n-basã kibs rɩɩb yɛ bãmb yĩnga.

13La a Zezi tʋma b karen-biis a yiib n yeel-ba: Kẽng-y tẽngã pʋgẽ, la yãmb na n sega rao sẽn zɩt koom ne yʋʋre. Pʋg-y yẽnda.

14La a sẽn na n kẽ zak ningã, bɩ y yeel yirã soab tɩ karen-saamb sokdame yaa: "Zĩig bee yɛ mam sẽn na n dɩ zʋʋg-n-basã kibs ne m karen-biisã?"

15La a na n wilga yãmb do-kãseng sẽn be roog zugu, sẽn segle, tɩ teed fãa be a pʋgẽ. Yaa be la yãmb na n segl pakã tõnd yĩnga.

16Karen-biisã loogame n kẽng tẽngã pʋgẽ, la b mikame tɩ bũmba fãa yɩɩ wa a Zezi sẽn da yeelã, la b segla zʋʋg-n-basã kibsã.

17Zĩ-sobd sẽn ta, bãmb waa ne b karen-biisã piig la a yiibã.

18Bãmb sẽn zĩ n dɩtẽ, a Zezi yeelame: Yãmb ned a yen sẽn dɩt ne maamã n na n zãmb maam.

19Sũ-sãoong sɩng n yõka bãmb tɩ b sok a Zezi yembr-yembre: Yaa maam?

20A Zezi leoka bãmba: Yaa yãmb piig la a yiibã ned a yembr sẽn tʋmd a nug ne maam laagẽ wã.

21Ninsaal Bi-riblã na n kii wa b sẽn gʋls b yellã to-to wã. La rao ning sẽn na n yõk-a bãmb n kõ wã na n paama toogo. Rao-kãng ma sã n dag n ka rogẽ-yã-a n são.

22Rɩɩbã wakate, a Zezi rɩka bur n ning bark n kao n kõ bãmb n yeele: Deeg-y n dɩ-y-yã. Yõwã yaa mam yĩngã.

23Dẽ poore, bãmb dɩka bõn-yũudla, n ning-a bark n kõ b karen-biisã, la b fãa yũume.

24La a Zezi yeela bãmb yaa: Yõwã yaa mam zɩɩm, kãab-paalg zɩɩm sẽn daag neb wʋsg yĩnga.

25Mam yeta yãmb sɩda, tɩ mam kõn leb n yũ nasaar sib biis koom yɛs ye, hal tɩ ta daar ninga mam sẽn na n yũ a paalg Wẽnnaam soolmẽ wã.

26Bãmb sẽn yɩɩl yɩɩlã n sɛ, bãmb kẽnga oliiv tɩɩs tãngã zugu.

27A Zezi yeela b karen-biisã yaa: Yãmb fãa na n targ n basa maam. Tɩ bõe a gʋlsa a woto: "Mam na n wẽe pe-kɩɩmã, la piisã na n sãeegame."

28La mam sã n vʋʋge, mam na n denga yãmb taoor Galile.

29A Pɩyɛɛr yeela bãmb yaa: Baa neba fãa sã n targ n bas yãmba, mam yẽ kõn targ ye.

30A Zezi leoka yẽnda: Mam yeta foom sɩda, tɩ rũnna, yʋngã bala, sẽn deng no-raoog kɛleng a yiib soabã, foo, fo na n kɩɩsa naoor a tãab tɩ f ka mi maam ye.

31La a Pɩyɛɛr yeela ne pãng n yɩɩd pĩnda, tɩ baa sã n ya tɩlɛ tɩ yẽ naag bãmb n ki, yẽ kõn kɩɩs t'a ka mi bãmb ye. La bãmb fãa me yeela a woto.

32Bãmb taa zĩig a yen sẽn boond tɩ Getsemaane. La a Zezi yeela b karen-biisã tɩ b zĩnd ka tɩ bãmb kẽng n tɩ pʋʋs la b wa.

33B peega a Pɩyɛɛr ne a Zak la a Zã tɩ b tũ bãmba. A Zezi sɩngame n paam sũur zɩ-kãsenga.

34Bãmb yeela a Pɩyɛɛr dãmb yaa: Sũ-sãoong n tar maam hal n dat n kʋ maam. Pa-y ka n neende.

35Dẽ, a Zezi kẽnga taoor bilfu, n vãbend tẽng n pʋʋs n yeel tɩ sã n da tõeẽ bɩ to-kãngã da paam bãmb ye.

36Bãmb yeelame: Abba, m ba, yãmb tõee bũmb fãa. Yiis-y bõn-yũudl kãngã mam taoore. Baoosgo, da maan-y mam daab ye, maan-y y raabo.

37A Zezi waa b karen-biisã nengẽ n mik tɩ b gõeeme. La bãmb yeela a Pɩyɛɛr yaa: Sɩmo, fo gõeeme laa? Fo ka tõe n neend lɛɛr a yembre?

38Neend-y la y pʋʋse n da wa n lʋɩ makr pʋg ye. Sɩɩgã ratame, la yĩngã bee pãn-komsem pʋgẽ.

39A Zezi leb n zãaga bilf n tɩ pʋʋs wa pĩndã bala.

40Bãmb leb n waa n mikame tɩ b karen-biisã gõeeme yɛsa, tɩ bõe, gõeema ra tar-b la wʋsgo. La b karen-biisã ka mi b sẽn na n leok bãmb tɩ bũmb ning ye.

41A Zezi leb n waa naoor a tãab soab n yeel bãmb yaa: Kell n gũs-y moasã n vʋʋse. Maan n saame. Wakatã taame. Ges-y-yã, b zãmba Ninsaal Bi-riblã n kõ yel-wẽn maandbã.

42Yik-y tɩ d kẽnge. Ned ninga sẽn na n zãmb-a maam n yõk n kõ wã kolgdame.

43A Zezi sẽn nan ket n gomda, a Zudas sẽn ya bãmb karen-biisã piig la a yiibã ned a yembr waame, la a waa ne neb kʋʋng maan-kʋʋdbã kãsem-dãmbã ne tõog karen-saam-dãmbã ne kãsem-dãmbã sẽn tʋm, la b zãada sʋʋs ne roaya.

44Ned ning sẽn na n zãmb a Zezi wã dag n kõo bãmb bãnd n yeel tɩ ned ninga yẽ sẽn na n mokã, yaa soab kõng la a Zezi. Bɩ b yõk-a, n gũ-a neer n tall n looge.

45A Zudas sẽn ta bala, a kolga a Zezi n yeel-b tɩ "karen-saamba", la a mok-ba.

46Neb a taabã yõka a Zezi. A Zudas waa ne sodaase (14.43)

47Ned a yen sẽn dag n be be wõoga a sʋʋg n kɛ maan-kʋʋd kãsmã tʋmtʋmd n fiuug a tʋbre.

48A Zezi goma ne-b n yeele: Yãmb waa ne sʋʋs la roay n na n yõk maam wa m yaa fãada!

49Mam dag n bee ne yãmb daar fãa n zãmsd nebã wẽnd-doogẽ wã, la yãmb ka yõk maam ye. La yaa tɩ gʋls-sõmyã na paam pidsgu.

50La bãmb karen-biisã fãa basa bãmb n zoe.

51Bi-bɩɩg a yembr n dag n lob fu-goabg bal n tũ bãmba.

52La b gãda yẽnda t'a bas a fu-goabgã n zoe beelle.

53Bãmb talla a Zezi n kẽng maan-kʋʋdbã kãsem yiri, zĩig ning maan-kʋʋdbã kãsem-dãmba fãa la kãsem-dãmbã ne tõog karen-saam-dãmbã sẽn tigmã.

54A Pɩyɛɛr pʋgla bãmb yɩɩg-yɩɩga, n ta maan-kʋʋdbã kãsem zakẽ n zĩnd ne tʋmtʋmdbã n woot bugum.

55Maan-kʋʋdbã kãsem-dãmbã ne kaoreng yɛl bʋ-bʋʋdbã fãa baoo kaset dãmb sẽn na n dõd a Zezi n kɩt tɩ b kʋ-ba, la b ka yã ye.

56Bala, neb wʋsg yaga zĩrĩ n dõd bãmba la b kasetã ka zems taab ye.

57Neb kẽer yik n kɩsa kaset zĩrĩ ne bãmb yell n yeel tɩ bãmb wʋma a Zezi sẽn yeel tɩ:

58Mam na n sãama Wẽnd-do-kãnga ninsaalb nus sẽn me wã, n lebs n me a to ninsaalb nus sẽn ka me, dasem a tãab pʋgẽ.

59La baa ne yel-kãnga, bãmb kasetã ka zems taab ye.

60Dẽ, maan-kʋʋdbã kãsem yika tigingã sʋk n sok a Zezi yaa: Yãmb ka leokd tɩ bũmb laa? Yaa bõe rõadg la nebã rõt yãmbã?

61A Zezi sĩndame n ka leok tɩ bũmb ye. Maan-kʋʋdbã kãsem soka bãmb yɛsa, bãmb sã n yaa Kirist, Wẽnnaam sẽn ya bark soabã Bi-ribla.

62A Zezi leokame n yeele: Mam sɩd yaa Kirist. La yãmb na n yãa "Ninsaal Bi-riblã sẽn zao sẽn-tõe-a-fãa wã soabã rɩtgo, la b sẽn wat ne sawato."

63Dẽ, maan-kʋʋdbã kãsem pãrsa a fut n yeele: Tõnd le rata kaset rãmb n maan bõe?

64Yãmb wʋma b sẽn gom n paoog Wẽnnaamã. Yãmb tagsda a wãna? La nebã fãa kaoo bãmb bʋʋd n yeel tɩ b zemsa kũum.

65Neb kẽer sɩngame n tʋbs bãmb kolkoodo, n pil bãmb neng ne peend n pãb bãmb ne nug-gila, n yeel bãmb yaa: Togs-y bãngr goama. La tʋmtʋmdbã deega a Zezi n laal bãmb pegse.

66A Pɩyɛɛr sẽn zĩ zakã pʋgẽ wã, maan-kʋʋdbã kãsem tʋmtʋmd-poak n wa be.

67A sẽn yã a Pɩyɛɛr sẽn woot bugmã, a ges-a lame n yeel-a: Yãmb me ra bee ne Nazarɛt dao a Zezi.

68Yẽ kɩɩsame n yeele: Mam ka mi ye. Mam ka bãng fo sẽn dat n togs bũmb ningã ye. La a yiime n kẽng zãongẽ wã. La no-raoog kelmame.

69Tʋmtʋmd-poakã sẽn yã yẽnda, a leb n sɩngame n wilg neb nins sẽn be be wã t'a Pɩyɛɛr yaa a Zezi neda.

70La a Pɩyɛɛr leb n kɩɩsame tɩ ka sɩd ye. Sẽn yɩ bilfu, neb nins sẽn be be wã yeela a Pɩyɛɛr: Fo sẽ ya bãmb neda, bala, fo yaa Galile ned wɛ!

71La a sɩngame n kãab a meng n wẽen n yeele: Mam ka mi rao ning yãmb sẽn gomd a yellã ye.

72Wakat kãng bala, no-raoog kelma naoor a yiib soaba. La a Pɩyɛɛr tẽega gomd ning a Zezi sẽn dag n yeel yẽ wã: Sẽn deng no-raoog sẽn na n kelem naoor a yiibu, fo na n kɩɩsa naoor a tãab tɩ f ka mi maam ye. La a sẽn tagse, a yãbame.