Mark 15

Mossi Moore (KÃAB-PAALGÃ KOE-NOOGO)

← Chapter 14 Jump to: Chapter 16 →

1Yibeoog pĩnda, maan-kʋʋdbã kãsem-dãmb tigma ne kãsem-dãmbã la tõog karen-saam-dãmbã, la kaoreng yɛl bʋ-bʋʋdbã fãa. Bãmb sẽba a Zezi n tall-b n tɩ kɩs a Pilat.

2A Pilat soka a Zezi: Yãmb yaa Zuif-rãmbã rĩma? A Zezi leoka yẽ a woto: Yãmb n yeele.

3Maan-kʋʋdbã kãsem-dãmbã rõda bãmb ne bũmb wʋsgo.

4A Pilat leb n soka bãmb yaa: Yãmb ka leokd tɩ bũmb laa? Ges-y bũmb nins fãa b sẽn dõt yãmbã.

5La a Zezi ka tol n leok tɩ bũmb ye. La rẽ yɛɛsa a Pilat.

6Kibs fãa, a Pilat dag n yiisda bi-bɛɛg a yen, nebã sẽn kos a soabã n base.

7La ned a yen sẽn boond t'a Barabas dag n bee bi-bees roogẽ ne tẽn-dãmbdba, tɩ bõe, tẽn-dãmbg wakate, b kʋʋ neda.

8Kʋʋngã rʋʋme n tɩ kos a Pilat bũmb ning a sẽn mi n maand n kõt bãmbã.

9A Pilat soka bãmb b sã n datame t'a bas Zuif-rãmbã dĩmã n kõ-ba.

10Bala, yẽ bãngame tɩ yaa sũ-kiir yĩng la maan-kʋʋdbã kãsem-dãmbã yõk a Zezi n wa n kɩs yẽnda.

11La maan-kʋʋdbã kãsem-dãmbã kɩtame tɩ nebã kos tɩ b yiis a Barabas n base.

12A Pilat leb n gomame n sok bãmb tɩ b ratame tɩ yẽ maan a soab ning bãmb sẽn boond tɩ Zuif-rãmbã dĩmã bõe?

13Bãmb leb n kelmame n yeele: Ka-y bãmb da-pɩk zugu.

14A Pilat soka bãmba: B maana bõe sẽn ya wẽnga? La nebã leb n kelma ne pãng n yɩɩd pĩnda: Ka-y bãmb da-pɩk zugu.

15A Pilat sẽn dat n noog neba sũur yĩnga, a yiisa a Barabas n base. La yẽ sẽn kɩt tɩ b pãb a Zezi ne kalwaase, yẽ rɩka bãmb n kõ nebã tɩ b ka-b da-pɩk zugu.

16Sodaasã talla a Zezi n kẽng zaka pʋgẽ, sẽn dat n togs tɩ sodaasã zakẽ, la bãmb tigma sodaasã fãa sẽn be zĩ-kãngã.

17B yeelga a Zezi fu-miuugu, la b kala gõos wa maanfo n fõgen bãmb zugu.

18Dẽ, sodaasã sɩngame n pʋʋs bãmb n yeele: Zuif-rãmbã dĩma, tõnd pʋʋsda yãmba.

19La bãmb wẽe a Zezi zug ne tãnwĩiga, n tʋbs bãmb kolkoodo, la b yĩgimdame n wõgemd bãmb taoore.

20Bãmb sẽn yaal a Zezi a woto n sɛ, b pidga fu-miuugã n lebs a Zezi futã n yeelg-ba, la b talla bãmb n na n tɩ ka da-pɩk zugu.

21Bãmb modga ned a yen sẽn yi weoogẽ n loogdẽ t'a tʋk a Zezi da-pɩkã. A yʋʋr la a Sɩmo, n ya Sirɛn neda. Yẽ yaa a Alegsãndr ne a Rufus ba.

22Bãmb talla a Zezi n kẽng zĩig ning sẽn boond tɩ Golgota, sẽn dat n togs tɩ zu-wang zĩiga.

23Bãmb kõo a Zezi rãam sẽn kalem ne miir la a Zezi ka yũ ye.

24Bãmb kaa a Zezi da-pɩk zugu, la b pʋɩɩ bãmb futã n maan bãnde, n na n bãng ned kam fãa sẽn na n paam fuug ninga.

25Yaa sõ-bɩɩmd wakat la b ka bãmb da-pɩkã zugu.

26Gʋlsem ning sẽn wilgd b sẽn dõd bãmb ne bũmb ningã yeta a woto: Zuif-rãmbã rĩma.

27Bãmb kaa fãadb a yiib da-pɩgs zut ne a Zezi: A yembr b rɩtgo, a to wã b goabga.

28Woto, gʋls-sõng sẽn yet tɩ b lagma bãmb ne wẽng maandbã paama pidsgu.

29Neb nins sẽn loogd be wã tʋʋ bãmba, n gõms b zut n yeele: N-faa! Yãmb sẽn tõe n sãam wẽnd-doogã n lebs n me-a rasem a tãabã,

30bɩ y fãag y meng n wa n sig da-pɩkã zugu.

31Maan-kʋʋdbã kãsem-dãmbã ne tõog karen-saam-dãmbã me goma ne taab n yaal bãmb n yeele: B fãaga neb a taaba, n yaool n ka tõe n fãag b meng ye.

32Bɩ Kirist sẽn ya Israyɛl dĩmã sig da-pɩkã zug moasã tɩ d yã n tẽ. La neb nins b sẽn ka da-pɩgs zut ne bãmbã me goma bãmb wẽnga.

33Sẽn ta wĩnto-sʋka, dũni gill fãa lebga lik bida hal tɩ ta wẽn-kaoore.

34La wẽn-kaoor wakate, a Zezi zẽka b koɛɛg n kelem n yeele: Eloyi! Eloyi! Lama sabaktani? Sẽn dat n togs tɩ: "Mam Wẽnnaam! Mam Wẽnnaam! Yaa bõe tɩ yãmb bas maam?"

35Neb kẽer sẽn dag n be be wã sẽn wʋm a woto, b yeelame: Gese, bãmb boonda a Eli.

36La bãmb ned a yembr wudgame n dɩk needg n los miismẽ, n yaag n sel tãnwĩig n kõ bãmb tɩ b yũ, la a yeele: Bas-y tɩ d ges a Eli sã n na wa n sik bãmba.

37La a Zezi zẽka b koɛɛg n kelem ne pãnga, la b kiime.

38Wẽnd-doogã fu-lilldig sɩnga yĩngr n kẽeg n tãag tẽnga.

39Sodaas koabg naabã sẽn dag n yas t'a neng tees a Zezi wã, a sẽn yã b kũuma sẽn yɩ to-to wã, a yeelame: Hakɩɩka, rao-kãngã yaa Wẽnnaam Bi-ribla.

40Pagb me n dag n be be n yas yɩɩg n getẽ. A Maari sẽn yit Magdala, ne a Maari sẽn ya a Zak-bil ne a Zoze ma, la a Salome da bee bãmb sʋka.

41Bãmb dag n tũuda a Zezi n sõngd bãmb wakat ninga b sẽn dag n be Galile. Pagb a taab wʋsg da tũu a Zezi n wa Zeruzalɛm.

42Dag n yaa seglg daare, sẽn dat n togs tɩ daar ninga sẽn deng vʋʋsg daarã. La wĩndgã sẽn kolg lʋɩɩs yĩnga,

43a Zozɛf sẽn yit Arimate waame. Yẽ yaa kaorengã yɛl bʋ-bʋʋd neba fãa sẽn waoogda, la a me rag n gũuda Wẽnnaam soolem waoongo. Yẽ maana raood n kẽng a Pilat nengẽ n tɩ kos a Zezi kũumã.

44A Pilat sẽn wʋm t'a Zezi zoe n kiime, a yɛɛsame, la a kɩtame tɩ b bool sodaas koabg naabã t'a wa, t'a sok-a n na n bãng b sã n kii sẽn kaoose.

45Sodaas koabg naabã sẽn wilg yẽ yellã sẽn yɩ to-to wã, a kõo a Zozɛf a Zezi kũumã.

46La a Zozɛf raa lẽ peen-peelse, n sik a Zezi kũumã da-pɩkã zugu, n vil-b ne pɛɛlã n gãneg-b yaoog sẽn tuk kugr zug pʋgẽ, la a bilma kugr n lud yaoogã noore.

47A Maari sẽn yit Magdala ne a Zoze ma a Maari ra geta zĩig ninga b sẽn gãneg bãmbã.

← Chapter 14 Jump to: Chapter 16 →