Romans 10

Mossi Moore (KÃAB-PAALGÃ KOE-NOOGO)

← Chapter 9 Jump to: Chapter 11 →

1M ba-biisi, mam sũurã raabo, la mam bõosg ne Wẽnnaam b yĩng yaa tɩ b paam fãagre.

2Bala, mam kɩta bãmb kaset n yetẽ tɩ b tara ratem wʋsg Wẽnnaam yĩnga, la b ka tar bãngr ye.

3Bãmb sẽn zɩ Wẽnnaam tɩrlemã yellã, la b rat n zĩndig b meng tɩrlemã, b ka sak n tũ Wẽnnaam tɩrlemã ye.

4Bala, Kirist yaa tõogã baoosg zĩiga, tɩ ned ning fãa sẽn tẽed na paam tɩrlem.

5Sɩd me, a Moyiis gʋlsa tɩrlem ning tõogã sẽn wat-ne wã yell n yeele: Ned sã n maan wa tõogã sẽn yeelã, tõogã na kɩt t'a vɩɩmde.

6La tɩrlem ning tẽeb sẽn wat-ne wã yeta a woto: Da tags f sũurẽ tɩ: Ãnna n na n dʋ arzãna? A rʋʋb yaa tɩ sigs Kiristã be.

7Wall ãnna n na n sig bog-zulungã pʋgẽ? A sigb yaa tɩ tak Kirist n yiis kɩɩm-kulgu.

8Sã n yaa a woto, tẽebã yetame tɩ bõe? Gomdã pẽe foom, a bee fo noorẽ la f sũurẽ. Yaool n yaa tẽeb gomdã la tõnd moonda.

9Fo sã n kɩs Zu-soab a Zezi kaset ne f noore, la fo sã n tẽ f sũurẽ tɩ Wẽnnaam vʋʋga bãmb n yiis kũum sʋka, fo na paam fãagre.

10Bala, yaa ned sẽn na n tar tẽeb a sũurẽ la a paamd tɩrlem, la yaa ned sẽn na n kɩs kaset ne a no-goam la a paamd fãagre, wa Wẽnnaam gʋls-sõamyã sẽn yetã:

11Ned ning fãa sẽn tẽed bãmb kõn paam yãnd ye.

12Sɩd me, welgr ka be Zuif ne Gɛrk sʋk ye: B fãa tara Zu-soab a yen sẽn maand neb nins fãa sẽn boond bãmbã neer wʋsgo.

13Bala, ned ning fãa sẽn na n bool Zu-soabã yʋʋr na n paama fãagre.

14La bãmb na n yɩɩ a wãn n bool ned ning b sẽn ka tẽedã yʋʋre? La b na n yɩɩ a wãn n tẽ ned tɩ b ka wʋm tɩ b gomd a yelle? La b na n yɩɩ a wãn n wʋm tɩ b gomd a yelle, koe-moaandb sã n ka beẽ?

15La koe-moaandb na n yɩɩ wãn n zĩndi, ned sã n ka tʋm-ba? Wa b sẽn gʋlsã: Neb nins sẽn moond koe-noogã nao tara rasãnde.

16La ka nebã fãa n sak koe-noogã ye. Dẽ n kɩt t'a Ezayi yeel yaa: Zu-soaba, ãnna n tẽ tõnd sẽn togsã?

17Woto, yaa bũmb ning ned sẽn wʋmdã n wat ne tẽebo, la bũmb ning a sẽn wʋmdã yita Kirist goamã pʋgẽ.

18La mam sokdame tɩ b ka wʋm laa? B wʋm-yã! Bãmb koɛɛg saaga tẽn-tõrã, la bãmb goamã taa dũni tɛk fãa.

19La mam sokdame tɩ Israyɛl nebã ka bãng laa? A Moyiis n yɩ pipi n yeel yaa: Mam na n kɩtame tɩ neb sẽn ka soolem sũ-kiir yõk yãmba, la mam na n dɩka buud sẽn ka tar yam vẽnegre, n kɩt tɩ yãmb sũyã yiki.

20La a Ezayi pʋs n paama raood n yeele: Neb nins sẽn dag n ka baood maamã yãa maam. La mam puka m meng ne neb nins sẽn dag n ka sokd mam yellã.

21La a goma Israyɛl yell n yeele: Daarã tõre, mam tẽega m nusi, n tees neb sẽn ya kɩɩsdba, la nokoeem-wẽedba.

← Chapter 9 Jump to: Chapter 11 →