Romans 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1Zu-noog ning Zuif sẽn tarã yaa bõe, wall bãongã kõom yõod yaa bõe?

2A bee nafr bũmb fãa pʋgẽ. Pipi, Wẽnnaam deng n dɩka b goamã n gũnug ne Zuif-rãmbã.

3La d na n yeelame tɩ bõe? Bãmb neb kẽer sã n ka maan sɩd ne Wẽnnaam, dẽ yĩnga, bãmb sẽn ka maan sɩdã na n kɩtame tɩ Wẽnnaam sɩdã ka maan a tʋʋmde?

4Yaa vẽeneg tɩ ayo. Nebã tog n bãngame tɩ baa ninsaalbã fãa sã n yagda zĩrĩ, Wẽnnaam yaa sɩd-soaba, wa b sẽn gʋlsã: Tɩ ne yãmb goama, b na mik tɩ yãmb yaa tɩrga, la tɩ yãmb bʋʋda kaoob wakate, bɩ y paam tõogre.

5La tõnd ka-tɩrlemã sã n kɩtdẽ tɩ Wẽnnaam tɩrlemã pukdẽ, tõnd na n yeelame tɩ bõe? Wẽnnaam sã n sak tɩ b sũur yiki, b yaa ka-tɩrlem soab sɩda? Mam sẽn gomda yaa ninsaalemdo.

6Yaa vẽeneg tɩ ayo. Sã n ka rẽ, Wẽnnaam na n yɩɩ a wãn n kao dũni bʋʋdo?

7La sã n yaa tɩ ne mam zĩrĩ wã Wẽnnaam sɩdã pukdame n paasde tɩ ya bãmb waoogre, bõe tɩ b na n leb n kao mam bʋʋd wa yel-wẽn maanda?

8La wa tẽn-kãn-neb kẽer sẽn kãnegd tõnd n yetẽ tɩ d gomda a woto wã, bõe tɩ tõnd ka na n maand wẽng tɩ sẽn ya sõmb tõe n tũ be n wa? Nin-kãens sɩbgrã yaa bũmb sẽn zemse.

9La rẽ wã, tõnd yɩɩda neb a taabã la? Baa bilfu! Bala, tõnd zoe n wilgame tɩ nebã fãa, Zuif-rãmba la sẽn ka-b Zuif-rãmbã bee yel-wẽnã yembd pʋgẽ

10wa sẽn gʋlsã: Ned sẽn zems ka be ye! Baa a yen ka ye.

11Ned baa a yen yam ka weke, baa a yen ka baood Wẽnnaam ye. Neba fãa menemame, n naag taab n lebg ka-barka.

12Ned baa a yen ka be sẽn maand neer ye, baa a ye!

13Bãmb kokorã yaa wa yaoog b sẽn fõke. B zɛlmã wã belgda neba. Ruruug zẽnem n be bãmb no-bɩmsẽ wã.

14Bãmb noor pida ne kãab-wẽng la toolem.

15B naowã tʋʋla ne a kẽng n tɩ raag zɩɩm.

16B sẽn pɩʋʋgẽ fãa, yaa sãoong ne toog bala.

17B ka mi bũmb ning sẽn wat ne laafɩ ye.

18B toor ka be ne Wẽnnaam zoees ye.

19Tõnd yaool n miime tɩ bũmb ning fãa tõogã sẽn yetã, a yeta neb nins fãa sẽn loe ne tõogã, tɩ noyã fãa na mume, tɩ nebã na bãng tɩ Wẽnnaam nifẽ, nebã fãa yaa bɛɛgdba.

20Bala, ned baa a yen ka na n paam zemsg Wẽnnaam taoor tõogã sakr yĩng ye, bala, tõogã kɩtdame bal tɩ ned bãng yel-wẽnd sẽn ya a soaba.

21La moasã Wẽnnaam tɩrlem pukame tɩ tõog toog kaẽ ye, la tõogã ne Wẽnnaam no-rɛɛsdbã sɛb kɩta tɩrlemã kaseto,

22sẽn yaa tɩ tẽeb ne a Zezi Kirist wata ne Wẽnnaam tɩrlem neb nins fãa sẽn tẽedã yĩnga. Bala, welgr ka ye:

23Nebã fãa maana yel-wẽna, n kong Wẽnnaam ziirã.

24La b paamda zemsgã zaalem bala, Wẽnnaam nimbãan-zoeerã yĩnga, fãagr ning sẽn be a Zezi Kirist pʋgẽ wã maasem yĩnga.

25Yaa bãmb la Wẽnnaam pĩnd n yãk n kõ, neb nins sẽn na n tẽ bãmbã yel-wẽna yiisg yĩnga, ne b zɩɩmã. Woto na n wilga Wẽnnaam tɩrlem. Bãmb sẽn bas nebã n ka sɩbg-b b yel-wẽn nins b sẽn dag n maan Wẽnnaam sũ-marã wakatã yĩnga,

26bãmb da rat n wilga b tɩrlemã moasã wakatã, tɩ nebã na bãng tɩ bãmb yaa tɩrga, bãmb sẽn kɩtd tɩ ned ning sẽn tẽed a Zezi wã zemsã.

27Woto yĩngã, bõe pʋgẽ la ned tõe n waoog a menga? Bũmb ka be ye. Ne tõ-bʋgo? Ne tʋʋm tõogo? Ayo! La yaa ne tẽeb tõogo.

28Bala, tõnd geendame tɩ ninsaal paamda zemsg tẽeb yĩnga, tɩ tõog tʋʋmã toog kaẽ ye.

29Walla, Wẽnnaam yaa Zuif-rãmbã bal Wẽnnaam la? Bãmb ka buud a taabã me Wẽnnaam la? N-ye, bãmb yaa buud a taabã me Wẽnnaam,

30bala, Wẽnnaam a yen tãa n be n na n kɩt tɩ sẽn kẽ-b bãongã zems tẽeb yĩnga, la b kɩt tɩ sẽn ka kẽ-bã me zems tẽeb yĩnga.

31Woto wã, dẽ yĩnga tõnd dɩkda tẽebã n kiisd tõogã la? Yaa vẽeneg tɩ ayo. Ka woto ye: tõnd wilgdame tɩ tõogã yaa sõama.

← Chapter 2 Jump to: Chapter 4 →