Romans 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1Dẽ, fo sẽn ya ned ning fãa, fo sẽn kaood f taab bʋʋdã, fo kõn paam bũmb n dõd n yi ye. Bala, fo sẽn kaood neb a taab bʋʋdã, fo dogenda yell f meng zugu. Tɩ bõe, fo kaooda f taabã bʋʋdo, la f yaool n maand wa bãmb bala.

2Sɩd me, tõnd miime tɩ Wẽnnaam bʋ-kaoor neb nins sẽn maand a woto wã yĩng tũuda sɩda.

3Fo tẽedame tɩ f sẽn kaood f taab bʋʋdo, n maand wa bãmbã fo na n põsa Wẽnnaam bʋ-kaoorã?

4Bɩ fo ka nand bãmb sõmblemã, la bãmb sũ-bʋgsmã, la bãmb sũ-marã sẽn waoogã, n ka miẽ tɩ Wẽnnaam sõmblemã tusda foom tɩ f tek yam n kos sugri?

5La ne fo sũurã riglingã la f sũurã sẽn ka baood tekrã, fo tigsda sũ-puugr n bĩngd f meng Wẽnnaam sũ-puugrã daar yĩnga, daar ning bãmb bʋ-kaoorã sẽn zemsã sẽn na n pukã,

6bãmb sẽn na n keo ned kam fãa wa sẽn zems a tʋʋmdã:

7neb nins sẽn modgd tɩ maan neere, n baood ziiri, la waoogre, la b baood vɩɩm sẽn kõn sa wã na n paam-a lame,

8la neb nins nokoɛɛm sɩɩg sẽn tar tɩ b kɩɩsd sɩd la b sakd ka-tɩrlemã na n paama Wẽnnaam sũ-yikri la b sũ-puugri.

9Zuif-rãmb pipi tɩ sẽn ka-b Zuif-rãmbã pʋgda. Ned ning fãa sẽn maand wẽngã na n paama to-kãsenga la pelen-yɩgse.

10Ned ning fãa sẽn maand neere, na n paama ziiri, waoogre la bãane. Zuif-rãmbã pipi tɩ sẽn ka-b Zuif-rãmbã pʋgda.

11Bala, Wẽnnaam ka bakd neb ye.

12Neb nins fãa sẽn ka bãng tõogã, la sẽn maan yel-wẽnã na sãam me tɩ tõog toor kaẽ ye. La neb nins sẽn paam tõogã la sẽn maan yel-wẽnã, tõogã la b na n ges n kao bãmb bʋʋdo.

13Sɩd me, ka neb nins sẽn kelgd tõogã n zems Wẽnnaam nifẽ ye. La yaa neb nins sẽn sakd tõogã n na n paam zemsgo.

14Buud a taabã sẽn ka tar tõogã sã n kell n maand bũmb nins tõogã sẽn yetã, bãmb sẽn ka tar tõogã, bãmb mensã mii b sẽn tog n maane.

15B wilgdame tɩ bũmb nins tõogã sẽn datã gʋlsa bãmb sũyã pʋse. Bãmb sũ-bãngrã kɩta rẽnda kaseto, la bãmb tagsgã rõta bãmba wall a zabd n sõngd bãmba.

16Daar ning Wẽnnaam sẽn na n kɩt tɩ Kirist Zezi kao nebã tʋʋm-solgdsã bʋʋd wa koe-noog ning mam sẽn moondã sẽn yetã, bõn-kãens na n pukame.

17Fo boonda f meng tɩ Zuif, n teegd tõogã, n waoogd f menga, f sẽn ya wẽn-tũudã yĩngã.

18Fo yetame tɩ f mii bãmb daabã, tɩ tõogã sẽn zãms foomã yĩnga, fo mii bũmb ning sẽn ya sõama la sẽn ya wẽng n bake.

19Fo sẽn yet f meng tɩ f yaa zoens tɛtã, la neb nins sẽn be lik bida pʋgẽ wã vẽenemã,

20n ya ka-yam dãmbã zãmsdã, la kamb karen-saambã, yaa tɩ fo tẽedame tɩ f tara bãngr la sɩd sor tõogã pʋgẽ.

21Fo zãmsda neb a taabã, la f ka zãmsd f meng ye.

22Fo moondame n yetẽ tɩ b ra zu ye, la f yaool n zuuda! Fo yetame tɩ b ra yo ye, la f yaool n yooda! Fo geta wẽnd-naands wa bõn-põosgo, la f yaool n kẽed b rotẽ wã n zuud-ba!

23Fo sẽn dɩk tõogã n waoogd f mengã, fo kɩɩsda tõogã n paoogd Wẽnnaam.

24Bala, buud a taabã neb paoogda Wẽnnaam yʋʋr yãmb yĩnga, wa sẽn be gʋls-sõamyã pʋgẽ wã.

25Sɩda, bãong yaa bũmb sẽn be yõodo, fo sã n sakda tõogã. La fo sã n kɩɩs tõogã, fo bãongã lebga moonem bala.

26La sẽn ka kẽ-a bãong sã n sakd bũmb nins sẽn gʋls tõogã pʋgẽ wã, b ka na n ges a moonemã wa bãong kõom sɩda?

27Sẽn ka tol n kẽ-a bãongã sã n pidsd tõogã sẽn yetã, a kõn kao fo bʋʋdo, fo soab sẽn tar tõogã sebr la bãongã sɩda?

28Ka ned ning sẽn tar-a Zuif yalẽ wã bal n ya Zuif ye. La bãongã ka bũmb ning b sẽn ne yĩn-nemdã pʋgẽ wã ye.

29La Zuif yaa ned ning sẽn ya-a Zuif a sũur pʋgẽ, la bãong meng yaa sũurẽ dẽnda, sẽn zems Sɩɩgã rẽnda, la ka tõogã rẽnd ye. Zuif kãng pẽgr ka yit ninsaalb nengẽ ye, la yaa Wẽnnaam nengẽ.

← Chapter 1 Jump to: Chapter 3 →