Romans 4

Mossi Moore (KÃAB-PAALGÃ KOE-NOOGO)

← Chapter 3 Jump to: Chapter 5 →

1Dẽ yĩnga, tõnd na n goma d yĩng yaab a Abraham yell n yeel tɩ bõe? Bõe la b paam-yã?

2Sã n yaa sɩd tɩ yaa tʋʋmã yĩng la a Abraham paam tɩrlem, b tõe n waooga b menga. La Wẽnnaam taoore, a ka a woto ye.

3Sɩd me, Wẽnnaam gʋls-sõamyã yetame tɩ bõe? A Abraham tẽe Wẽnnaam, la Wẽnnaam gesa a Abraham wa nin-tɩrga, a tẽebã yĩnga.

4La ned sã n tʋm tʋʋmde, a yaoodã ka nimbãan-zoeer kũun ye, yaa a rẽnda.

5Sã n yaa ne ned ning sẽn ka tʋm-a, la a yaool n tẽ soab ning sẽn kɩtd tɩ wẽng maand lebg tɩrgã, b geta a soabã wa nin-tɩrga a tẽebã yĩnga.

6Woto me, a Daviid yetame tɩ ned ning Wẽnnaam sẽn kõt tɩrlem t'a ka tʋm bũmbã tara sũ-noogo. A yeelame:

7Bark bee neb nins b yel-wẽnã sẽn paam sugrã, tɩ b yel-wẽnã paam ludbã zutu.

8Bark bee ned ning Zu-soabã sẽn ka geelgd a yel-wẽnã zugu.

9Sũ-no-kãng yaa zũinsã yĩng bal bii, bɩ yaa ne moosã me? Bala, tõnd yetame yaa: Ne a Abraham, b geelga b tẽebã wa tɩrlem.

10Wakat ning b sẽn geelg b tẽebã wa tɩrlema, dẽ tɩ b dag n yaa wãn-wãna? Dẽ tɩ b dag n kẽe bãong bɩ b ka kẽ? B dag n nan ka kẽ bãong ye, b da ket n yaa moaaga.

11La b reega bãongã kõom sẽn ya bãnd sẽn wilg t'a paama tɩrlem tẽeb yĩnga, la rẽ tɩ b ket n yaa moaaga. Woto, b yaa nebã fãa sẽn tẽedã ba, tɩ baa ne b sẽn ka kẽ bãongã, bɩ Wẽnnaam geelg-b tɩrlemã.

12Woto bãmb yaa zũinsã me ba. Ka yĩngã bãong bal la b kẽ ye, b kẽnda tẽeb ning tõnd yaab a Abraham sẽn dag n tar b moonem wakatã pʋgẽ.

13Sɩd me, ka ne tõogã la Wẽnnaam kãab a Abraham wall a yagensã tɩ b na n sooga dũni wã ye, la yaa ne tẽeb tɩrlem.

14Sã n yaa tõog yĩng la ned paamd dogem-pʋɩɩre, dẽnd tẽeb yaa zaalem, la b kiisa kãabgã sẽn kãabã.

15Bala, tõogã wata ne sũ-yikri, la zĩig ning tõog sẽn ka be, beegr me ka ye.

16Dẽ, yaa ne tẽebo, tɩ b tõe n yeel tɩ yaa nimbãan-zoeere, tɩ kãabg ning Wẽnnaam sẽn kãabã na pids a Abraham yagensã fãa yĩnga. Ka b rãmb sẽn tar-b tõogã yĩng bal ye, la yaa ne neb nins sẽn tar-b tõnd ba a Abraham tẽebã wa b sẽn gʋlsã:

17Mam kɩtame tɩ fo lebg buud wʋsg ba. Bãmb yaa tõnd fãa ba, Wẽnnaam ning b sẽn tẽ wã taoore. Yaa Wẽnnaam ning sẽn kõt kũum vɩɩm, la b kɩtd tɩ bũmb nins sẽn ka be wã zĩndi.

18A Abraham maana tẽeb ne bũmb ned sẽn ka tõe n tẽ, b tẽeme n lebg soolem wʋsg ba wa Wẽnnaam sẽn dag n yeelã: Fo yagensã na n yɩɩ a woto.

19B ka bas tɩ b tẽebã boog ye, b kell n maana tẽeb ne b yĩngã sẽn kolg kũumã, bal b yʋʋmã dag n kolga koabga, la a Sara rogem me ra loogame.

20La Wẽnnaam sẽn kãab-bã, b ka sãmbe, b sẽn ka tẽeb yĩng ye. La b tẽebã sẽn paas-b pãngã yĩnga, b kõo Wẽnnaam waoogre.

21Bala, b sũur kɛɛma ne yel-kãngã: Bũmb ning Wẽnnaam sẽn kãabã, b tara pãng n na n pids-a.

22Dẽnda n kɩt tɩ b geelg a Abraham tẽebã wa tɩrlemã.

23Ka bãmb b yembr yĩng la b gʋls n yeel tɩ b geelga b tẽebã wa tɩrlemã ye,

24la yaa tõnd me yĩnga. B na n geelga tõnd tẽebã wa tɩrlem, tõnd sẽn tẽed a soab sẽn vʋʋg tõnd Zu-soab a Zezi tɩ b yi kũum sʋkã,

25soab ning b sẽn kʋ tõnd beegr yĩnga, la sẽn vʋʋg tɩ tõnd tõe n paam tɩrlemã yĩnga.

← Chapter 3 Jump to: Chapter 5 →