Romans 16

Mossi Moore (KÃAB-PAALGÃ KOE-NOOGO)

← Chapter 15 Jump to:

1Mam tʋmda d ba-bi-poak a Feebe yãmb nengẽ. A yaa Sãnkre wẽnd-doogã yel-gɛt poaka.

2Reeg-y-yã-a Zu-soaba pʋgẽ, wa sẽn zems nin-sõamy maanego. Bũmb sã n wa n beẽ fãa t'a rat yãmb sõngre, bɩ a paam yãmba, bala, a sõnga neb wʋsgo, la a sõnga maam me.

3Pʋʋs-y-yã a Piriska ne a Akilas sẽn ya mam tʋmd-n-taas a Zezi Kirist tũudmã pʋgẽ wã.

4B gẽnega b yõor n na n fãag maam. Ka maam n yen n bal n pʋʋsd-b bark ye, buud a taabã wẽnd-dotã fãa me pʋʋsd-b lame.

5Pʋʋs-y nin-tũusds nins sẽn be bãmb zakẽ wã me. Pʋʋs-y m zo-nongr a Epayinet sẽn ya Azi soolmã dẽenem biis Kirist yĩnga.

6Pʋʋs-y-yã a Maari sẽn nams a meng wʋsg yãmb yĩngã.

7Pʋʋs-y-yã a Andronikus ne a Zunyas sẽn ya mam ba-rãmba la m zĩnd-n-taas bi-bees roogẽ. B yaa neb tẽn-tʋmdbã sẽn nong wʋsgo, la b pʋs n denga maam n lebg Kirist neba.

8Pʋʋs-y-yã a Ampiliyatus sẽn ya mam zo-nongr Zu-soabã pʋgẽ wã.

9Pʋʋs-y-yã a Yʋrbẽ sẽn ya tõnd tʋmd-n-taag Kirist pʋgẽ, la y pʋʋs m zo-nongr a Ɛstakis.

10Pʋʋs-y-yã a Apelɛs, sẽn modg Kirist tũudmã pʋgẽ wã. Pʋʋs-y-yã a Aristobul zaka rãmba.

11Pʋʋs-y m saam-biig a Herodyõ. Pʋʋs-y neb nins sẽn be a Narsis yirã n be Zu-soabã pʋgẽ wã.

12Pʋʋs-yã a Tirfɛn ne a Tɩrfoz, tɩ b yaa pagb sẽn modgd b mens Zu-soabã yĩnga. Pʋʋs-y d zo-nongr a Pɛrsid sẽn modgd a meng wʋsg Zu-soabã yĩnga.

13Pʋʋs-y-yã a Rufus sẽn ya nin-yãkdg Zu-soabã pʋgẽ, la y pʋʋs a ma sẽn ya mam me ma wã.

14Pʋʋs-y-yã a Asẽnkirt, ne a Felgõ, ne a Hɛrmes, ne a Patrobas, ne a Hɛrmas ne ba-biis nins sẽn be ne bãmbã.

15Pʋʋs-y-yã Filolog ne a Zuli, a Neere ne a ma-bi-poakã, la a Olẽmpas ne nin-sõamy nins fãa sẽn be ne bãmbã.

16Pʋʋs-y taab ne mok-sõngo. Kirist Wẽnd-dotã fãa toonda yãmb pʋʋsem.

17M ba-biisi, mam sagenda yãmb tɩ y gũus ne neb nins sẽn wat ne welgre la bõn-lakdse, tɩ kɩɩsd zãmsg ning yãmb sẽn paamã. Zãag-y y meng ne-ba.

18Bala, neb a woto ka tʋmd tõnd Zu-soabã, Kirist yĩng ye, yaa b mens pʋs yĩnga. B belsda neb nins sẽn ka yamã ne gom noodo la ne pẽgre.

19Sã n yaa ne yãmba, neba fãa mii yãmb sakrã yelle. Mam sũur nooma ne yãmb yellã, la mam nongame tɩ yãmb bãng yam ne bũmb nins sẽn ya sõama, la y yɩ yɩlma n da maand wẽng ye.

20Bilf sã n paase, Wẽnnaam na n luba a Sʋtãan tɩ yãmb tab-a ne y nao wã. Bɩ tõnd Zu-soab a Zezi barkã zĩnd ne yãmba.

21Mam tʋmd-n-taag a Tɩmote ne a Lusiyus la a Zazõ la Sozipatɛɛr sẽn ya m saam-biisã pʋʋsda yãmba.

22Maam a Tɛrtiyus, sẽn gʋls seb-kãngã Zu-soaba pʋgẽ wã pʋʋsda yãmba.

23Mam gãag-soab a Gayus sẽn ya Wẽnd-do-tõrã gãag-soabã pʋʋsda yãmba. A Erast sẽn ya tẽngã ligd gũudã pʋʋsda yãmba. D ba-biig a Kartus me pʋʋsda yãmba.

24Bɩ tõnd Zu-soab a Zezi Kirist barkã zĩnd ne yãmb fãa. Ãmina.

25Bɩ soab ning sẽn tar-a pãn-tõog tɩ kɩt tɩ yãmb yals kãenkãe wa koe-noogã mam sẽn moondã sẽn yetã, wa sẽn zemsd ne yel-solemdã pukri, yel-solemd ning sẽn dag n solg hal sɩngr wẽndẽ wã.

26La moasã, Wẽnnaam no-rɛɛsdbã pĩnd-n-bãngr goamã sɛb puk-a-la wa Wẽnnaam sẽn ka sɩngr kõn zĩnd saabã sẽn yeelã, n wilg soolem dãmba fãa nebã, tɩ b tõe n sak tẽebã.

27Bɩ Wẽnnaam, sẽn ya b yen tãa n ya yam soabã soog ziiri, wakat fãa, a Zezi Kirist maasem yĩnga. Ãmina!

← Chapter 15 Jump to: