Romans 5

Mossi Moore (KÃAB-PAALGÃ KOE-NOOGO)

← Chapter 4 Jump to: Chapter 6 →

1Dẽ, tõnd sẽn paam zemsg tẽeb yĩngã, tõnd tara zems-n-taar ne Wẽnnaam tõnd Zu-soab a Zezi Kirist maasem yĩnga.

2Yaa bãmb maasem yĩng la tõnd paam n kẽ barkã pʋgẽ ne tẽebo, la tõnd yasa kãenkãe bark kãng pʋgẽ, la tõnd maanda sũ-noogo, d sẽn gũud Wẽnnaam ziirã ne tẽebã yĩngã.

3La sẽn yɩɩd rẽnda, tõnd maanda sũ-noog baa namsg pʋgẽ, tõnd sẽn mi tɩ namsgã wata ne sũ-mare,

4tɩ sũ-mar wat ne maan-sɩd sẽn wat ne tõogre, tɩ maan-sɩd sẽn wat ne tõogrã wat ne tẽeb pidsg gũudum.

5Tẽeb pidsg gũudum yaool n ka tudgd ned ye, bala, Wẽnnaam Sɩɩg-sõng b sẽn kõ tõndã pidsda tõnd sũyã ne Wẽnnaam nonglem tõnd sũyã pʋse.

6Bala, wakat ning tõnd sẽn da ka pãngã, Wẽnnaam wakatã sẽn wa n ta, Kirist kii nin-wẽnsã yĩnga.

7Yaa toog tɩ ned sak n ki nin-tɩrg yĩnga. Daar ninga, nina na paam raood n ki nin-sõng yĩnga.

8Wakat ning tõnd sẽn dag n ket n ya yel-wẽn maandba, Kirist kii tõnd yĩnga, la ne rẽnda, Wẽnnaam wilga b nonglem tõnd yĩnga.

9Moasã, tõnd sẽn paam zemsg Kirist zɩɩmã raagr yĩngã, tõnd kõn põs Wẽnnaam sũ-yikr bãmb maasem yĩng n yɩɩd sɩda?

10Bala, sã n yaa tɩ tõnd sẽn dag n ket n ya bɛɛbã, tõnd yellã ne Wẽnnaamã paama yiisg Bãmb Bi-riblã kũum yĩnga, moasã yellã sẽn sa wã, tõnd kõn paam fãagr bãmb vɩɩmã yĩng n yɩɩd sɩda?

11Sẽn yɩɩd rẽ yɛsa, tõnd maanda sũ-noog Wẽnnaam pʋgẽ, tõnd Zu-soab a Zezi Kirist maasem yĩnga, soab ning sẽn wa ne zemsg tõnd ne Wẽnnaam sʋk moasã wã.

12Yaa woto yĩnga, a wa yel-wẽna sẽn wa dũni ned a yembr maasem yĩngã, tɩ yel-wẽnã wa ne kũum, tɩ nebã fãa kiidẽ, b fãa sẽn maan yel-wẽnã yĩngã...

13Bala, hal tɩ ta wakat ning b sẽn moon tõogã, yel-wẽn dag n bee dũni, la b rag n ka geend yel-wẽnã tõogã sẽn dag n ka wã ye.

14Baoosgo, kũum zĩnda a Adam wakat hal tɩ ta a Moyiis wakate. Baa neb nins sẽn ka beeg a Adam beegrã buud kiime. A Adam yaa sẽn da tog n wa-a wã wẽnego.

15Kũun ning sẽn kõt zaalmã yell ka wẽnd kongrã yell ye. Bala, neb wʋsg sã n kii ned a yembr beegr yĩnga, sẽn yɩɩda, Wẽnnaam kiiga b barkã, la kũun sẽn yit ned a yen bark pʋgẽ, a Zezi Kirist, neb wʋsg zut wʋsgo.

16Kũun-kãng yellã ka wẽnd nin-yend yel-wẽnã yell ye. Bala, bʋʋd sẽn pʋgd kongr a yen tãa wã wata ne sɩbgre, tɩ kũun ning sẽn kõt zaalem kongr zugẽ wã wat ne tɩrlem kũuni.

17Kũum sã n bee ned a yen tãa kongrã yĩnga, neb nins sẽn dag deeg Wẽnnaam bark-kãsengã la tɩrlem kũunã kõn vɩɩmd n dɩ naam a Zezi Kirist b yen tãa maasem yĩng n yɩɩd sɩda?

18Woto yĩnga, a wa ned a yen tãa beegr sẽn kɩt tɩ sɩbgr paam nebã fãa wã, woto me, tɩrlem tʋʋmd a yen tãa maasem yĩnga, tɩrlem sẽn kõt vɩɩmã tata neba fãa.

19Sɩd me, a wa ned a yen tãa kɩɩsg yĩng sẽn kɩt tɩ neb wʋsg lebg yel-wẽn maandba, woto me, ned a yen tãa sakr yĩnga, b na n kɩtame tɩ neb wʋsg lebg tɩrse.

20La tõog yaool n waame tɩ kongr lebg kãsenga. La zĩig ning yel-wẽn sẽn paam pãnga, barkã paama paoosg n yɩɩda.

21Woto, a wa yel-wẽnã ne kũum sẽn soog zĩigã, barkã sooga zĩig me tɩrlemã yĩnga, tɩ d tõe n paam vɩɩm sẽn kõn sa, tõnd Zu-soab a Zezi Kirist maasem yĩnga.

← Chapter 4 Jump to: Chapter 6 →