Romans 15

Mossi Moore (KÃAB-PAALGÃ KOE-NOOGO)

← Chapter 14 Jump to: Chapter 16 →

1Tõnd dãmb sẽn tar pãngã, tõnd tog n tebenda neb nins sẽn ka pãngã b pãn-komsmã pʋgẽ, la d da bao sẽn noom tõnd ye.

2Bɩ tõnd ned kam fãa maan sẽn noom a to, sẽn ya sõmb wɛɛngẽ, t'a tõe n bɩ.

3Bala, Kirist ka bao sẽn noom b meng ye, la a wa b sẽn gʋlsã: Tʋy nins nebã sẽn tʋʋd yãmbã lʋɩɩ mam zugu.

4Mik bũmb nins b sẽn pĩnd n gʋlsã gʋlsa tõnd zãmsg yĩnga, tɩ tõnd tõe n paam saag-sõngo, sũ-mare la belsg ning Wẽnnaam gʋls-sõamyã sẽn kõtã yĩnga.

5Bɩ Wẽnnaam sẽn pid ne sũ-mar la belsgã sõng yãmb tɩ y paam tagsg a yembr taab yĩnga, wa a Zezi Kirist sẽn datã,

6tɩ yãmb na kõ Wẽnnaam sẽn ya tõnd Zu-soab a Zezi Kirist ba wã waoogre, ne yam a yembre la koɛɛg a yembre.

7Reeg-y taab neer wa Kirist sẽn deeg yãmbã, Wẽnnaam waoogr yĩnga.

8Sɩda, mam yetame tɩ Kirist lebga zũinsã tʋmtʋmda, sẽn na yɩlg n wilg tɩ Wẽnnaam yaa sɩda, la b wilg tɩ bũmb nins Wẽnnaam sẽn dag n kãab b ba-rãmbã yaa sɩda.

9La buud a taabã neb waoogda Wẽnnaam, b nimbãan-zoeerã yĩnga, wa b sẽn da gʋls n yeelã: Rẽnda n kɩt tɩ mam na n gom soolem dãmb sʋk n wilg tɩ m mii yãmba, la m na n yɩɩlame n waoog y yʋʋrã.

10B leb n yeelame yaa: Soolem dãmbã, lagem-y Wẽnnaam nebã n maan sũ-noogo.

11N le paase, soolem dãmbã fãa neba, pẽg-y Zu-soabã, la tɩ tẽms toay-toay nebã pẽg bãmba.

12A Ezayi me yeelame yaa: A Izayi yagengã na n pukame. B na n yikame n soog soolem dãmbã. Soolem dãmbã neb tẽeb na n bee ne bãmba.

13Bɩ Wẽnnaam, saag-sõng sẽn yit a soab nengẽ wã pid yãmb ne sũ-noog fãa la bãan fãa tẽeb pʋgẽ, tɩ saag-sõng na pid yãmba, Sɩɩg-sõng pãng yĩnga.

14Sã n yaa ne yãmb yelle, m ba-biisi, mam sũur kɛɛm tɩ yãmb pida ne sõmblem, la y pid ne bãngr fãa, la y yaa neb sẽn tõe n keoog taaba.

15Baoosgo, bũmb kẽer pʋgẽ, mam gʋlsa yãmb ne gãndalsem, wa m dat n kɩtame tɩ yãmb tẽeg bũmb nins y sẽn mi, la yaa Wẽnnaam sẽn maan maam neere,

16n kɩt tɩ mam ya Kirist tʋmtʋmd buud a taabã sʋkã yĩnga. Mam maanda Wẽnnaam koe-noogã tʋʋmd sẽn ya tẽeb bũmbã, tɩ buud a taabã nebã na yɩ wa kũun sẽn noom Wẽnnaam, neb Wẽnnaam Sɩɩg-sõng sẽn welg toor Wẽnnaam yĩnga.

17Dẽ, mam tara bʋʋm tɩ waoog m meng Kirist pʋgẽ, Wẽnnaam taoore. 18-19 Bala, mam ka na n saag n pʋd bũmb yelle, tɩ ka Kirist sẽn tũnug maam n maane, sã n yaa m goamẽ, wall m tʋʋmẽ, tɩ ne Sɩɩg-sõng pãnga, la m maan bãn sẽn tar pãnga, la ne bõn-yɛɛsdse, tɩ m tõe n sõng buud a taabã neb tɩ b sak Wẽnnaam. Yaa woto yĩnga, sẽn sɩng ne Zeruzalɛm, n gilg hal tɩ ta Iliri, mam moona Kirist koe-noogã wʋsgo.

18La mam yãka yam tɩ moon koe-noog zĩis nins b sẽn zɩ n pʋd Kirist yʋʋrã ye, tɩ m da wa n me ned a to yẽbgr zug ye. La a wa b sẽn gʋls n yeelã:

19Neb nins sẽn ka gom bãmb yell b sʋkã na n yãame, la neb nins sẽn dag n ka wʋm b kibarã, na n wʋma a võore.

20Rẽnda n gɩdg maam naoor wʋsg tɩ mam ka wa yãmb nengẽ ye.

21Moasã, mam ka leb n tar tʋʋm zĩig soolem kãens ye. La hal yʋʋm wʋsgo, mam da ratame tɩ m sã n wa n dabd Ɛspaẽ, bɩ m tũ yãmb nengẽ.

22Mam maanda tẽeb tɩ m sã n wa n loogdẽ, m na yãnd-yã, la m yamleoog tɩ zĩnd ne yãmbã sã n doke, y na yãag-m n kẽng Ɛspaẽ.

23Mõs-moasã wã mam dabda Zeruzalɛm, nin-sõamyã sõngr yĩnga.

24Bala, Masedoan ne Akayi nebã yãka yam n lob taab ligdi n na n sõng naong rãmbã sẽn be ba-biisã sʋk Zeruzalɛmã.

25Yɩɩ bãmb yam-yãkre, la yaa bũmb b sẽn da segd n maane. Bala, buud a taabã neb sã n paama pʋɩɩr ne bõn-sõamy nins sẽn be Zuif-rãmba nengẽ tẽeba wɛɛngẽ wã, bãmb me tog n sõnga Zuif-rãmbã ne b yĩngã yelle.

26B sẽn maan a woto wã, mam sã n tɩ kɩs ligdã n sa, mam na n yii be n tũ yãmb nengẽ n kẽng Ɛspaẽ.

27Mam miime tɩ m sã n wa wat yãmb nengẽ, yaa ne Kirist barkã la m na n wa.

28M ba-biisi, mam sagenda yãmb ne tõnd Zu-soab a Zezi yʋʋre, la ne nonglem Sɩɩg-sõng sẽn kõtã, tɩ y naag ne maam n zabe, y sẽn na n pʋʋs mam yĩnga,

29tɩ mam tõe n paam yolsg ne ka-tẽeb rãmb sẽn be Zude wã, la tɩ nin-sõamy wã na reeg kũunã mam sẽn tar n kẽnd Zeruzalɛmã sõama.

30Woto, sã n ta Wẽnnaam yam, mam na n taa yãmb nengẽ ne sũ-noogo, la mam na n paama vʋʋsem bilf yãmb sʋka.

31Bɩ Wẽnnaam sẽn so laafɩ wã zĩnd ne yãmb fãa. Ãmina!

← Chapter 14 Jump to: Chapter 16 →