Romans 7

Mossi Moore (KÃAB-PAALGÃ KOE-NOOGO)

← Chapter 6 Jump to: Chapter 8 →

1M ba-biisi, mam gomda ne neb sẽn mi tõogo: Yãmb zɩ tɩ tõog loeta ned a yõor tɛka?

2Woto, pag sã n kuil sɩda, tõogã loee yẽndã ne a sɩdã a sɩdã yõor tɛka. La sɩdã sã n ki, tõog ning sẽn dag n loe-a ne a sɩdã yii n bas-a lame.

3Dẽ, a sɩdã sã n ket n vɩ, t'a lebg dao a to paga, b na n bool-a lame tɩ pʋg-yoodre. La a sɩdã sã n ki, a paama yolsg ne tõogã. Dẽ, a sã n lebg ned a to paga, a ka pʋg-yoodr ye.

4Woto me m ba-biisi, yãmb yaa kũum, sã n yaa ne tõogã yelle, Kirist yĩngã maasem yĩnga, n na n lebg ned a to rẽnda, soab ning sẽn vʋʋg n yi kũum sʋka, tɩ tõnd na wom biis Wẽnnaam yĩngã.

5Bala, wakat ning yĩngã sẽn dag n so tõndã, tõogã sẽn kɩt tɩ yel-wẽnã ratem yikã dag n tʋmda tõnd yĩngã wil pʋsẽ, n kɩtdẽ tɩ tõnd womd biis sẽn wat ne kũum.

6La moasã, b yiisa tõnd tõog yembd pʋgẽ, bala, tõnd yaa kũum ne bũmb nins sẽn dag gãd tõnd yembd pʋgẽ wã, tɩ tõnd Wẽnnaamã sakrã yaa sɩɩgã tõog pʋgẽ, sẽn ya tõ-paalgã, la ka leb n ya tõ-kʋdgã sẽn gʋlsã pʋgẽ ye.

7Dẽ, tõnd na n yeelame tɩ bõe? Tõogã yaa yel-wẽnd la? Yaa vẽeneg tɩ ayo. La mam ka bãng yel-wẽn sẽn ya bũmb ninga, sã n ka tõogã maasem yĩng ye. Tõogã sã n dag n ka yeelẽ tɩ: Da maan sũ-kiir ye, mam dag n kõn bãng sũ-kiir sẽn yaa a soab ye.

8La yel-wẽnã paama tõogã sẽn yeelã n na n kɩt tɩ sũ-kiir buud fãa kẽ maam, bala, tõog sã n kaẽ, yel-wẽn yaa bõn-kɩɩnga.

9Ne maam, pĩnda, tõogã sẽn dag n ka be wã, mam dag n vɩɩme. La tõogã sẽn wa wã, yel-wẽn paama vɩɩm, tɩ mam ki.

10Woto, tõogã sẽn taasd ned vɩɩm pʋgẽ wã taee maam n taas kũumẽ.

11Bala, yel-wẽnã sẽn paam weerã, a talla tõogã n belg maam n tõoge, la a talla tõogã n kɩt tɩ mam ki.

12Woto, tõogã yaa bõn-sõngo, noyã me yaa bõn-sõamyã, n ya tɩrse la sõama.

13Dẽ yĩngã, bũmb ning sẽn ya sõama wã lebga kũum mam yĩnga? Yaa vẽeneg tɩ ayo. La sẽn na yɩlg tɩ yel-wẽn puk a meng n wilg t'a yaa yel-wẽnã, a talla bõn-sõng n wa ne mam kũum, tɩ tõogã maasem yĩnga nebã na yã tɩ yaa yel-wẽn kãseng tɩ looge.

14Sɩd me, tõnd miime tɩ tõogã yaa sɩɩg bũmbu. La mam yaa yĩnga, yel-wẽn sẽn so n maand a sẽn dat-ne.

15Bala, bũmb nins mam sẽn maandã, mam ka wʋmd b võor ye. Mam sẽn dat n maan bũmb ninsã, mam ka maand ye, la mam yaool n maanda bũmb nins mam sẽn kisã.

16Mam sã n maanda m sẽn ka rata, mam sẽn yetã zemsda ne tõogã sẽn yetã, tɩ tõogã yaa bõn-sõngo.

17Moasã, ka leb n ya maam n maand bõn-kãens ye, la yaa yel-wẽnã sẽn be mam pʋgẽ wã.

18Bala, mam miime tɩ bõn-sõng ka be mam pʋgẽ, mam yĩngã pʋgẽ ye. Bala mam tõee n paama datem tɩ maan neere, la m ka tar pãn-tõog tɩ maan-a ye.

19Mam ka maand neer ning mam sẽn datã ye, la m maanda wẽng ning m sẽn ka ratã.

20Mam sã n maand m sẽn ka ratã, ka leb n ya maam n maand ye, la yaa yel-wẽnã sẽn be mam pʋgẽ wã.

21Mam sẽn dat n maan neerã, mam mikame tɩ tõ-kãngã n be ne maam: Wẽng n yegd maam.

22Mam sũurã zĩ-zulungẽ wã, mam sũ-noog bee ne Wẽnnaam tõodã.

23La mam yãta tõog a to mam yĩnga wilẽ, t'a maood ne mam yam-wekrã tõogã, n kɩtd tɩ mam ya yel-wẽnã sẽn be mam yĩngã wilẽ wã tõog yamba.

24Mam yaa nĩmbãan-neda. Ãnna n na n yiis maam yĩn-kãngã sẽn ya kũumã nugẽ?

25Bɩ d pʋʋs Wẽnnaam bark tõnd Zu-soab a Zezi Kirist maasem yĩnga... Woto, ne mam yam-wekre, mam yaa Wẽnnaam tõogã yamba, la sã n yaa ne mam yĩngã, mam yaa yel-wẽnã tõog yamba.

← Chapter 6 Jump to: Chapter 8 →