Romans 9

Mossi Moore (KÃAB-PAALGÃ KOE-NOOGO)

← Chapter 8 Jump to: Chapter 10 →

1Mam yeta sɩd Kirist pʋgẽ, mam ka yagd zĩri ye. Mam sũ-bãngrã kɩta maam bõn-kãng kaseto, Sɩɩg-sõng maasem yĩnga.

2Sũ-sãoon-kãsenga, la sũ-bõdem n be mam sũurẽ wã daar fãa.

3Bala, mam dag n nongẽ lame tɩ kãab wẽng zĩnd mam zugu, la m welg ne Kirist m ba-biisã, la m ba-rãmba ne yĩng yelle, sõngr yĩnga.

4Bãmb yaa Israyɛl rãmba, b rãmb Wẽnnaam sẽn deeg n maan b kamba tɩ b so ziiri, la kaoolã, la tõogã, la kaorengo, la kãabdo, la yaab-rãmba.

5Sã n yaa ne yĩng yelle, yaa bãmb n dog Kiristã, soab ning sẽn yɩɩd bũmba fãa, n ya Wẽnnaam sẽn ya bark soab wakat sẽn ka sɩngr n ka saabã. Ãmina!

6A ka tɩ Wẽnnaam goama lebga zaalem ye. Bala, ka b rãmb fãa sẽn ya a Israyɛl yagensã n ya Israyɛl ye.

7Ka b sẽn ya a Abraham roogã neb yĩng la b yaa a yagens ye. La b yeelame yaa: Na n tũnuga a Izak tɩ fo paam yagens sẽn tar fo yʋʋre,

8Sẽn dat n togs tɩ ka kamb nins sẽn ya b yĩng neongã n ya Wẽnnaam kamb ye, la yaa neb nins b kãab-bã la b geend wa b yagense.

9Sɩd me, ad kãabgã gomde: Woto wẽnde, mam na n lebg n waame, la rẽ t'a Sara paama bi-ribla.

10Sẽn yɩɩda, yɩɩ woto me ne a Rebeka, sẽn tall tõnd ba a Izak bal pʋgã.

11Bala, kamba da nan ka rog ye, la b da nan ka maan neer bɩ wẽng ye. Baoosgo, Wẽnnaam daabã kell n yalsame wa sẽn zems bãmb sẽn yãke, la yãkrã ka tũud ne tʋʋmã ye, a tũuda ne sẽn bool-a wã.

12B yeela a Rebek yaa:

13Yao wã na n sooga kẽemã, wa sẽn gʋlsa: Mam nonga a Zakoob, la mam kisga a Ezayu.

14Dẽ, tõnd na n yeelame tɩ bõe? Dẽ yĩnga, ka-tɩrlem bee Wẽnnaam pʋgẽ laa? Yaa vẽeneg tɩ ka ye.

15Bala, b yeela a Moyiis yaa: Mam na n zoee ned ning m sẽn na n zoe a nimbãanegã nimbãanega, la m na kʋma ned ning m sẽn na n kʋmã.

16Woto yĩnga, yel-kãng ka tũud ne soab ning sẽn data, wall ne soab ning sẽn zoet ye, bee ne Wẽnnaam, soab ning sẽn zoet nimbãanegã.

17Bala, Wẽnnaam gʋls-sõamyã yeela Faarõ yaa: Mam zẽka foom ne m raabo, n na n tall foom n wilg m pãngã, tɩ b na moon mam yʋʋrã tẽng zug tɛk fãa.

18Woto, bãmb zoeta ned ning b sẽn dat n zoe a nimbãanegã nimbãanega, la bãmb sẽn dat t'a soab sũur yɩ kɛgenga, b kengda a soabã sũurã.

19Dẽ, fo na n yeela maam yaa: Bõe la bãmb na n leb n yeel tɩ ka zemse? Bala, ãnna n tõe n kɩɩs bãmb sẽn datã?

20La fo yẽ, foo la ãnda n tõe n wẽ nokoeemd ne Wẽnnaam? Bũmb ning yagbã sẽn yagdã na n yeela yagbã tɩ yaa bõe yĩng t'a yagd yẽnda a woto?

21Ka yagbã n so yagdã, n yãkd yagd a yembr pʋgẽ n yagd teoogo a tʋʋm sẽn be waoogre, la a yagd teoogo a tʋʋm sẽn be paoogr la?

22La Wẽnnaam sã n maan sũ-mar wʋsg ne lagd sẽn wat ne sũ-yikri la sẽn maan sãoong yĩngã, n na n wilg b sũ-yikri la b kɩt tɩ nebã bãng bãmb pãngã?

23La bãmb sã n dag n datame n kɩt tɩ lagd sẽn zems ne nimbãan-zoeere, la bãmb sẽn pĩnd n yãk tɩ b paam ziirã bãng bãmb ziirã sẽn zems to-to?

24Dat n togs tɩ tõndo, neb b sẽn boole, ka Zuif-rãmbã sʋk bal ye, la bu-zẽmsã sʋk me,

25wa bãmb sẽn yeel a Ooze sebrã pʋgẽ wã: Ned ning sẽn dag ka mam nedã, mam na n boola a soab tɩ m neda, la ned ning sẽn dag n ka m noangã, mam na n bool-a lame tɩ m noanga.

26La zĩig ning meng b sẽn dag n yet bãmb tɩ b ka mam nebã, be bala, b na n boola bãmb tɩ Wẽnnaam sẽn vɩ kom-dibli.

27A Ezayi me goma Israyɛl yell n yeele: Baa Israyɛl nebã sõor sã n ta ko-kãsengã biisrã sõore, neb bilf bal n na põse.

28Bala, bũmb ning Zu-soabã sẽn yeelã, b na n maan-a-la zãng tẽng zugu, la b na n maan-a-la tao-tao.

29La a wa a Ezayi sẽn da pĩnd n yeelã, Saasẽ sodaas naabã sã n dag ka kellẽ tõnd buudã, tõnd dag n na n lebgẽ la wa Sodom, la tõnd dag n na n wẽnegẽ la Gomoor.

30Dẽ, tõnd na n yeelame tɩ bõe? Bu-zẽmsã, sẽn dag n ka baood-b tɩrlemã paama tɩrlem, tɩrlem ning tẽeb sẽn kõtã.

31Tɩ Israyɛl nebã sẽn dag n baood tõog sẽn wat ne tɩrlemã ka paam tõ-kãng ye.

32Bõe yĩnga? Yaa tɩ Israyɛl ka bao tɩrlemã ne tẽeb ye, la yaa ne tʋʋmã. Bãmb laka kug-lakdgã,

33wa sẽn gʋlsã: Ade, mam ningda kug-lakdgã la kugr sẽn lubd neb Siyõ pʋgẽ. La ned ning sẽn tẽed-a bãmb kõn paam yãnd ye.

← Chapter 8 Jump to: Chapter 10 →