John 15

Mazanderani GMB (گیله ماز)

← Chapter 14 Jump to: Chapter 16 →

1«مَن حَقیقی اَنگور دارهیسَم و می پیَر باغبانِ.

2هر اَنگور رَزی که میوِه نیارِه می پیَر اونِه بینِه، وَ هر اَنگور رَزی که میوِه بیارِه، اونِه هَرَس کانه تا بیشتر میوِه بیارِه.

3شُما اَلآن هَم کلامِ خاطِری که شِمِره باگوتَم، تَمیزین.

4شُما می دِلِه بُمانید و مَن شیمی دِلِه ماندِنَم. هَمونجور که رَز نَتَّنِه خودشه جی میوِه بیارِه اگه دارِ دِلِه نُمانه، شُما هم نَتَّنید میوِه بیارین اگه می دِلِه نُمانید.

5«مَن اَنگور دارَم و شُما اونه رَزین. کسی که می دِلِه ماندِنه و مَن اونه دِلِه، خیلی میوِه هارنه؛ چون می جی سیفا هیچ کاری نَتَّنید هَکُنید.

6اَگِه کَسی می دِلِه نُمانِه، ایتا رَزِ مِثانِ که اونه دور تُووادِنَن و خُشک بونه. خُشکِ رَزِ شانِه جَم کانَن و تَشِ دِلِه تُووادِنَن و سوزانِدِنَن.

7اَگِه می دِلِه بمانید و می کَلام شیمی دِلِه بمانه، هر چی خَنید درخواس هَکُنید که بَرآوَردِه بونه.

8می پیَرِ جَلال اینجور آشکار بونه که شُما خِیلی میوِه بیارین، وَ اینجور می شاگِردان بونید.

9«هَمونجور که پیر مَرِه دوس داره، مَنَم شِمِره دوس دارَم؛ می مُحَبَتِ دِلِه بمانید.

10اَگِه می اَحکامِ بِجا بیارین، می مُحَبَتِ دِلِه ماندِنید؛ هَمونجوری که مَن می پیَرِه اَحکامِ بِجا هارنَم و اونه مُحَبَتِ دِلِه ماندِنَم.

11این چیزان رِه شِمِره باگوتَم تا می خُشحالی، شیمی دِلِه دَبو و شیمی خُشحالی کامِل هَبو.

12«می حُکم اینه که هَمدِیگَرِ مُحَبَت هَکُنید، هَمونجور که مَن شِمِره مُحَبَت هَکُردَم.

13این مُحَبَتِ جی گَتِه تَر دَنیِه که یِنَفر خودشه جان خودِشه رَفیقِانِ وَسین هَدِه.

14اَگِه اونچه شِمِره حُکم کانَم رِه عَمل هَکُنید، می رَفیقانید.

15دِ شِمِره پاکار نُخواندِنَم، چون پاکار خودشه اَرباب کاران جی خَبر نِداره. بلکه شِمِره می رَفیق دُخواندِنَم، چون تمام چیزایی که می پیَرِ جی بِشنَوِسَّم رِه شِمِره اونه جی خَبَردار هَکُردَم.

16شُما مَرِه اِنتِخاب نَکُردِین، بلکه مَن شِمِره اِنتِخاب هَکُردَم و روانه هَکوردَم تا بیشین و میوِه بیارین و شِیمی میوِه بُمانه، تا هر چی پیَرِ جی می اِسمِ هَمرَه بِخواین شِمِره هَدِه.

17می حُکم شِمِرِه اینه که هَمدِیگَرِ مُحَبَت هَکُنید.

18«اَگِه دُنیا شِیمی جی بیزارِ، بِدانید که شیمی جی پِیشتَر می جی بیزار با.

19اَگِه شُما دُنیایِ وَسین بِین، دُنیا شِمِره ایتا خودشه آدَمانِ مِثان دوس داشتِه. وَلی چون دُنیایِ وَسین نییَین، بلکه مَن شِمِره دُنیایِ جی اِنتِخاب هَکُردَم، دُنیا شِیمی جی بیزارِ.

20کلامی که شِمِره باگوتَم رِه شیمی یاد بِدارین: ”پاکار خودشه اَرباب جی گَته تَر نیِه.“ اَگِه مَرِه اَذیَت و آزار هَکُردَن، شِمِره هَم اَذیَت وآزار کانَن؛ وَ اَگه می کَلامِ عَمل هَکُردَن، شیمی کَلام رِه هَم عَمل کانَن.

21وَلی می اسمِ خاطِری یِه که تمام این کاران رِه شیمی هَمرَه کانَن، چون اونیکه مَرِه روانه هَکوردِه رِه نِشناسِنَن.

22اَگه نومَه بام و اوشانه هَمرَه گَب نَزَبام گُناه نِداشتَن؛ وَلی اَلآن، خودِشانِه گُناهانِ وَسین عُذر و بَهانِه ای نِدارَن.

23کَسی که می جی بیزار هَبو، می پیَرِ جی هَم بیزارِ.

24اَگِه اوشانه دِلِه کارایی نَکُردِه بام که جُز مَن هیچکَس نَکُردِه، گُناه نِداشتَن؛ وَلی با اینکه اون کاران رِه بَدییَن، هَم می جی و هَم می پیَرِ جی بیزارِن.

25وَلی کلامی که اوشانه توراتِ دِلِه بوما، بایِسّی حقیقَت بَرِسِه که گونِه: ”اوشان بی دلیل می جی بیزار بان.“

26«وَلی وَختی اون پُشتیبان که پیَر طَرفِ جی شِمِره روانه کانَم بییِه، یَعنی روحِ راسّی که پیَرِ طَرَفِ جی هَنه، اون خودِش می بارِه شَهادَت دَنِه.

27و شُما هَم شَهادَت دَنید، چون اَز اوَّل می هَمرَه دَبِین.

← Chapter 14 Jump to: Chapter 16 →