John 17

Mazanderani GMB (گیله ماز)

← Chapter 16 Jump to: Chapter 18 →

1عیسی خودشه گَبِ تَمام هَکُردِه، آسِمان بِیشییِه و باَگوته: «پیَر، اونه موقِه بَرِسییَه. تیِ ریکا رِه جَلال هَدِه تا ریکا هَم تِرِه جَلال هَدِه.

2چون تمام آدَمان اختیارِه اونه هَدَیی، تا هَمه اوشانیکه تو اونه هَدَیی رِه اَبَدی زندگی هَدِه.

3وَ اَبَدی زندِگی اینه که تِرِه تَنها حَقیقی خُدا و عیسی مَسیح که تو روانه هَکوردی رِه بِشناسَن.

4مَن کاری که تو مَرِه بِسپارِسّی رِه اَنجام هَدَم و اینجوری زَمینِ سَر تِرِه جَلال هَدَم.

5پس اِی پیَر، اَسِه تیِ وَرجه مَرِه جَلال هَدِه، همون جَلالِی که پیش اَز اونکه دُنیا به وجود بیِه تی وَرجه داشتِم.

6«مَن تی اسمِ اوشانِ رَه که تو این دُنیایِ دِلِه مَرِه هَدَیی، آشکار هَکُردَم. اوشان تِی شین بان و تو اوشانه مَرِه هَدَیی، وَ اوشان تی کَلامِ بِجا بیاردِن.

7اَسِه بِفَهمِسَّن اونچه که مَرِه هَدَیی راس راسی تی طَرفِ جی با.

8چون کلامی رِه که مَرِه هَدَیی، اوشانه هَدَم، وَ اوشان اونِه قَبول هَکُردَن و راس راسی بِفَهمِسَّن تی طَرفِ جی بومَم، وَ باوَر هَکُردَن که تو مَرِه روانه هَکوردی.

9مَن اوشانه وَسین دُعا کانَم؛ مَن این دُنیایِ وَسین دُعا نُکانَم، بلکِه اوشان وَسین که تو مَرِه هَدَیی دُعا کانَم؛ چون اوشان تی شیئَن.

10هر چی مَن دارَم تِی شین هیسِه و هر چی تو داری می شین هیسِه؛ وَ مَن ایشانِ دِلِه جَلال بِیتَم.

11اینِ جی بیشتر دِ دُنیایِ دِلِه نُماندِنَم، وَلی اوشان هَلَه دُنیایِ دِلِه دَرِن؛ مَن تی وَرجه هَنَم. اِی قدّوسِ پیَر، اوشانیکه مَرِه هَدَیی رِه تیِ اسمِ هَمرَه حِفظ هَکُن، تا ایتا هَبون، همونجوری که اَما ایتاَ هیسیم.

12مَن تا وَختی که اوشانه هَمرَه دَبام اوشانیکه تو مَرِه هَدَیی رِه تی اسمِ هَمرَه حِفظ هَکُردَم، مَن اوشانه جی حِفاظَت هَکُردَم، اوشانِ جی هیچکدام هَلاک نَبان، جز اون هَلاکتی ریکا، تا اونچه مُقَدَّسِ نِوِشتِه های دِلِه بَنوِشتِ هَبا بِه حقیقَت بَرِسِه.

13وَلی اَسِه تی وَرجه هَنَم و این گَبارِه موقِه ایی زَنَم که هَلَه این دُنیایِ دِلِه دَرِم، تا می خُشحالی رِه خودِشانِه دِلِ میَن کامِل بِدارِن.

14مَن تی کَلامِ اوشانه هَدَم، وَلی دُنیا اوشانه جی بیزار با، چون این دُنیایِ جی نییَن، هَمونجور که مَن این دُنیایِ جی نییَم.

15مَن نَخَنَم اوشانه این دُنیایِ جی بَبِری، بلکه خَنِم اوشانه اون شَریرِ جی حِفظ هَکُنی.

16اوشان این دُنیایِ جی نییَن، هَمونجور که مَن این دُنیایِ جی نییَم.

17حَقیقَتِ اوشانه یاد هَدِه تا مُقَدَّس هَبون، تی کَلام حَقیقَتِ.

18هَمونجور که تو مَرِه دُنیایِ دِلِه روانه هَکوردی، مَنَم اوشانه دُنیایِ دِلِه روانه هَکوردَم.

19مَن خودَم رِه اوشان وَقف کانَم تا اوشان هَم خودشانِ حقیقَت وَقف هَکُنَن.

20«می دَرخواس فقط اوشانِ وَسین نییِه، بلکه کَسانی رِه هَم که تَوسطِ اوشانه پِیغِام مَرِه ایمان هارنَن،

21تا هَمه ایتا هَبون، هَمونجوری که تو اِی پیَر می دِلِه دَری و مَن تی دِلِه. جوری هَکُن که اوشان هَم اَمی دِلِه دَبون، تا دُنیا باوَر هَکونه که تو مَرِه روانه هَکوردی.

22مَن جَلالِی که مَرِه هَدَیی رِه اوشانه هَدَم تا ایتا هَبون، هَمونجور که اَما ایتا هیسیم؛

23مَن اوشانِ دِلِه و تومی دِلِه دَری. جوری هَکُن تا اوشان هَم کامِلاً ایتاَ هَبون تا دُنیا بِدانه که تو مَرِه روانه هَکوردی، وَ اوشان رِه هَمونجوری دوس داشتی که مَرِه دوس داشتی.

24اِی پیَر، خَنَم اوشانی که مَرِه هَدَیی می هَمرَه دَبون، هَموجِه که مَن دَرَم، تا می جَلالِ بِینَن، جَلالِی که تو مَرِه هَدَیی؛ چون قبل اَز اینکه دُنیا شِروع هَبو مَرِه دوس داشتی.

25«اِی صالِحِ پیَر، هر چَن دُنیا تِرهِ نِشناسِنِه، وَلی مَن تِرِه اِشناسِنَم، وَ ایشان دانَن که تو مَرِه روانه هَکوردی.

26مَن تی اسم اوشانه بِشناساندَم و باز هَم شناساندِنَم، تا مُحَبَتی که تو مَرِه داشتی، اوشانه دِلِه هَم دَبو و مَنَم اوشانه دِلِه دَبوم.»

← Chapter 16 Jump to: Chapter 18 →