Revelation 12

Mazanderani GMB (گیله ماز)

← Chapter 11 Jump to: Chapter 13 →

1و ایتا گَتِه نِشانه آسِمانِ دِلِه ظاهِر هَبا: ایتا زِنا که آفتو خودشه تَن داشتِه و ماه اونه لِنگِ جیر و ایتا تاج که دَوازَّه تا سِتارِه داشتِه اونه سَر دَبا.

2اون زِنا شکمداربا، و بِزاسَّنِ درد و بِزاسَّنِ عذابِ جی شیوَن کانِبا.

3ایما ایتا دیگه نِشانه آسِمانِ دِلِه ظاهِر هَبا: بِیِیش، ایتا گَتِه سُرخِ اژدها که هفتا کَلِّه و دَه تا شاخ داشتِه، و اونه کَلِّه شانِ سَر هفتا تاج دَبا.

4خودشه دُمِ هَمرَه آسمانِ ستارگانِ یه سِوّمِ جَم هَکُردِه و زَمینِ سَر بَریختیه. اژدها اون زِنایِ پِیش که خَسِّه بِزا، بییَسَه، تا وقتی که اونه وَچه دُنیا بوما، اونه قورت هَدِه.

5اون زِنا ایتا ریکا بِزاسِّه، ایتا ریکا که قَرارِ آهنی عصای هَمرَه تمام مِلّتای سَر حکومت هَکونه. ولی اونه وَچِه بئیتهِ هَبا و خُدا و اونه تختِ وَر رَوانه هَبا.

6و اون زِنا صَحرایِ سمت بَشَه، اون جایی که خُدا اونه وَسین فَراهم هَکُردهِ با، دَر بَشَه، تا اوجِه هزار و دویس و شَص روز اونه بِدارِن.

7و آسِمانِ دِلِه جنگ هَبا. میکائیل و اونه فرشتگان اژدهایِ هَمرَه بَجِنگِسَّن. اژدها و اونه فرشتگان اوشانِ پِیش جنگِ وَسین بییَسَن،

8وَلی اژدها شِکَست بُخاردِه و دِ آسِمانِ دِلِه جایی اوشانه وَسین دَنِبا.

9و گَتِه اژدها جیر تُووادِه هَبا، یعنی اون قدیمی مآر که اِبلیس یا شیطان دُخوانِسِّه بونه که تمام دُنیا رِه گُمراه کانه. اون، زمینِ سَر تُووادِه هَبا و اون فِرشتگان هم اونه هَمرَه جیر تُووادِه هَبان.

10ایما ایتا بُلَندِ صدا آسِمانِ دِلِه بِشنَوِسَّم که گونه با: «اَسِه اَمی خُدایِ نِجات و قُوَّت و پادشاهی، و اون مَسیح اقتدار بوماَ. چون اونیکه اَمیِ اَداشانِ تُهمت زنه با که شُو و روز اَمیِ خُدای وَرجه اوشانه تُهمت زَنه با، جیر تُووادِه هَبا.

11و اوشانِ، وَرِّه یه خونِ هَمرَه و خودشانِ شهادتِ کلامِ هَمرَه اونه سَر حَریف هَبان. چونکه اوشان خودِشانِه جان دوس نِداشتَن، حتّی تا مرگ موقِه.

12پَس اِی آسِمان و اِی کسایی که آسِمانِ دِلِه دَرِین، خُشحالی هَکُنید! وَلی وای بِحالِ شُما، اِی زمین و اِی دریا، چونکه اِبلیس بدجور غیظ هَمرَه شِیمی سَر جیر بوما، چون دانهِ وَخت کَمِ.»

13و وختی اژدها بَدییَه که زَمینِ سَر تُووادِه هَبا، اون زِنایِ دُمّال بَشَه که ایتا ریکا بِزاسِّه با.

14وَلی اون گَتِه عقابِ دُتا بال اون زِنا رِه هَدَه هَبا، تا اون جایی که صَحرایِ دِلِه اونه وَسین فراهم هَبا با پَرواز هَکونه و اوجِه مارِ جی دور بُمانه، زَمانی و زمانهایی و نِصفِ زمانی اونه بِدارِن.

15اون مار ایتا اُو روخانِه یه اُویه مِثان خودشه دَهَنِ جی دِرگا هَکُردِه که اون زِنایِ دُمّال بوشو، تا لاه اونه خودشه هَمرَه بَبِره.

16وَلی زمین اون زِنایِ کُمَک بوما و خودشه دَهَنِ واز هَکُردِه و لاهی که اژدها خودشه دَهَنِ جی دِرگا هَکُردهِ با رِه، قورت هَدَه.

17ایما اژدها زِنایِ سَر غیظ هَکُردِه و بَشَه تا اونه بَقیِه ایل و تِبار هَمرَه جنگ هَکونه؛ یَعنی اوشانِ هَمرَه که خُدایِ اَحکامِ جی اطاعت کانَن و عیسی یِه شَهادتِ قایِم چَسبِنِن.

18و اژدها دریا کنار مُنتظر بُمانسِّه.

← Chapter 11 Jump to: Chapter 13 →