Revelation 15

Mazanderani GMB (گیله ماز)

← Chapter 14 Jump to: Chapter 16 →

1اون موقِه ایتا دیگه گَتِ وعجیب نِشانه آسِمانِ دِلهِ بَدییَم: هَفتا فرشته که هَفتا بَلا اوشانه هَمرَه دَبا، اوشان آخرین بَلائِشان هیسَن - چون اوشان هَمرَه خُدایِ غضب تَمام بونه با.

2وَ یِچّی بَدییَم که شیشه ایی دریا رِه ماندِنِه با که تَشِ هَمرَه قاطی هَبا با، وَ اوشانی رِه هم بَدییَم که شیشه ایی دَریایِ وَر ایسَبان و اون وحشی جانِوَر و اونه مُجَسَمِه و اونه اِسمِ شُماره یه سَر پیروز هَبا بان و سازِ چنگهائی اوشانه دَسِ دِلِه دَبا که خدا اوشانه هَدَه با.

3وَ اوشان خُدایِ خادم، موسایهِ سرود، و وَرِّه یه سرودِ خواندِنه بان و گونه بان: «تی کاران گَت و عجیبِ، اِی خُداوند خُدای قادِرِ مطلق. تی راهها چَنّی عدل و حَقِ، اِی مِلّتهای پادشاه.

4اِی خُداوند، کیِه که تی جی نَتِرسِه، وَ تی اِسمِ جَلال نَدِه؟ چون فقط تو، قدّوسی. تمام مِلّتِشان هَنَن و تِرِه پَرَسِّش کانَن چونکه تی عادلانۀ کاران اَسِه آشکار هَبا.»

5باز بَدییَم که معبد، یعنی شهادَتِ خیمه، آسمان دِلِه واز هَبا

6وَ هفتا فِرشته که هَفتا بَلا رِه داشتِن اون مقدّسِ جایِ جی دِرگا بومَن و اوشان ایتا لِواس کَتان پارچه یه جی که پاک با و سو سو زنه با دَکُردِه بان و ایتا شال که طِلای جی با خودِشانِه سینه یه دور داشتِن.

7و ایتا اَز اون چارتا زندهِ مَخلوق، اون هفتا فِرشته رِه هفتا طِلا پیالِه که خُدای غضبِ جی پُر با هَدَه، خُداییِ که تا اَبد و تا اَبد زِندِه هیسه.

8وَ اون مقدّسِ جا، خُدایِ جَلال و قُوّتِ هَمرَه دود جی پُر هَبا، وَ تا اون موقِه که اون هَفتا فرشتِه یه هفتا بَلا تَمام نَبا، هیچکَس نَتَّنِسِّه اون مقدّسِ جایِ، دِلِه بوشو.

← Chapter 14 Jump to: Chapter 16 →