Revelation 20

Mazanderani GMB (گیله ماز)

← Chapter 19 Jump to: Chapter 21 →

1ایما بَدییَم ایتا فِرِشتِه آسِمانِ جی دَرِه جیر هَنه، و هاویه یه چاه کیلیت اونه هَمرَه دَرِه، و ایتا گَتِه زَنجیل خودشه دَسِ دِلِه دارِه.

2و فِرِشتِه، اژدها رِه، اون قَدیمی مار رِه، که همون اِبلیس یا شِیطانِ، بِیته و تا هِزار سال اونه زِندانِی هَکُردِه

3و اونه هاویه یه چاه دِلهِ تُووادَه و اونه دَرِ دَبِسِّه و مُهر و موم هَکُردِه تا دِ مِلّتِشان رِه گول نَزِنِه تا اون هزار سال تَمام هَبو. ایما اون بایِسّی یه مُدّتِ وَسین آزاد هَبو.

4ایما تَختائی رِه بَدییَم که اوشانِ سَر کَسایی نیشته بان که اوشانه داوری یه اقتدار هَدَه هَبا با. و آدمانِ جانها رِه بَدییَم که عیسی مسیحِ شهادت هَدَنِ خاطری و خُدایِ کلامِ وَسین، اوشانه سَرِشان اوشانه تَنِ جی سیفا هَبا با. و کَسایی رِه بَدییَم که اون وحشی جانِوَر و اونه مجسمِه رِه پَرَسِّش نَکُرده بان، و اونه علامتِ خودِشانِه پیشانی و دَسِ سَر قبول نَکُرده بان. اوشان یِدَفِه دیگه زندهِ هَبان و مَسیح هَمرَه هزار سال سلطنت هَکُردَن.

5این اوّلین زندهِ هَبوسَّن مُردگانِ جی با. و مُردِگان دِ زندهِ نَبان تا اون هزار سال تَمام هَبو.

6مُقدّس و مُبارکِ اونیکه اوّلین زندهِ هَبوسَّنِ دِلِه سهم دارِه. دوّمین مرگ اینجور آدمانِ سَر، هیچ قُدرتی نِداره، بلکه اوشان خُدا و مَسیح کاهِنان بونَن و اونه هَمرَه هزار سال سلطنت کانَن.

7وختی که اون هزار سال تَمام هَبو، شِیطان خودشه زِندانِ جی آزاد بونه

8و دِرگا هَنه، تا مِلّتِشان رِه زمینِ چارگوشه یه سَر گول بَزِنِه- اون جوج و ماجوج رِه که اوشانه تعداد دریاکِنارِ وازیک مِثانِ، جَنگ وَسین جَم کانه.

9و اوشان زمینِ گَتِه دَشتِ سَر پِیش بَشَن و مُقدّسینِ اردوگاه، و اون عزیزِ شهرِ دُر هَکُردَن، ولی آسمانِ جی تَش جیر بوماَ و اوشانه نابود هَکُردِه.

10و اِبلیس که اوشانه گول بَزَه با، تَش و گوگِردِ دریاچه یه دِلهِ تُووادِه هَبا، اوجِه که اون وحشی جانِوَر و دِروئی پِیغمبر تُووادِه هَبا بان. ایشان شُو و روز تا اَبد و تا اَبد عذاب کَشِنَن.

11ایما ایتا گَتِ اِسبی تَخت بَدییَم، و یِنفر که اونه سَر نیشته با. آسِمان و زمین اونه حُضور جی فَرار کانه بان و هیچ جایی اوشانه وَسین دَنِبا.

12و مُردِگانِ بَدییَم، گَت تا کوچِیک، اونه تَختِ پِیش ایسَبان و دفترِشان واز هَبان. ایما ایتا دیگه دفتر واز هَبا که حیاتِ دفتَر با و مُردِگان اون چیزانِ هَمرَه که اون دفترِشانِ دلِه بَنویشتِه هَبا با، و طبقِ اونچه که هَکُردهِ بان داوری هَبان.

13و دریا مُردگانی که خودشه دِلِه داشتِه رِه پَس هَدَه؛ مرگ و مُردِگانِ دُنیا اون مُردِئِشان رِه که خودشه دِلهِ داشتِن رِه پَس هَدَن، و هر کدام طبقِ کارایی که انجام هَدَه بان، داوری هَبان.

14ایما، مَرگ و مُردِگانِ دُنیا تَشِ دریاچه دِلهِ تُووادِه هَبان. این تَشِ دریاچِه، دُوّمین مَرگِ.

15و هر کَس که اونه اِسم، حیاتِ دفتَرِ دِلِه بَنویشته نَبا با، تَشِ دریاچه یه دِلِه تُووادِه هَبا.

← Chapter 19 Jump to: Chapter 21 →