Mark 9 — Mazanderani WMB (کتاب مقدس به زبان مازندرانی - گویش غربی)

1عیسی اَی هَم جماعت و شی شاگِردِنِ بُتِه: «حَیقَتاً شِمارِ گِمِه، بَعضیا هیجِه اِسّانِه تا نَوینِن گه خِدایی پادشاهی قِوَّتی هَمرا بیمو، نَمیرِنِه.»

2شش روز دییَر، عیسی پِطرُس و یعقوب و یوحنارِه بَیتِه و وِشونِه شی هَمرا یَتِه گَتِ کوهی سَر بَوِردِه تا تنیا دَوون. اوجِه، وِشونی چِشی وَر، وی دیم دَگرِسِه

3وی جِمِه بَرق زووِه و خِیلی اِسبی وِه، جوریگه دِنیایی دِلِه هیچکی نَتِنِّه یَتِه جِمِه رِه هَینجور اِسبی هاکِنِه.

4اوجِه، ایلیا و موسای پیغمبر وِشونی چِشی وَر ظاهِر بَوِنِه و عیسایی هَمرا دِ گَب زووِنِه.

5پِطرُس عیسی رِه بُتِه: «اِسّا، چَنی خِبِ اَما هیجِه دَرمی. بِل سِه تا سایِوون بَساجیم، یَتِه تِنِه، یَتِه موسی و یَتِه هَم اِیلیایی سِه.»

6پِطرُس نَئونِسِه چی بُئِه، چون وِشون خِیلی بَتِرسی وِنِه.

7اَزما یَتِه اَبِر وِشونی سَری وَر سایه دیم بَدا و یَتِه چِمِر اَبری جا بیمو گه: «هَین می عزیزِ ریکائِه، وی گَبِ گوش هادین.»

8ناخوَکی، وختی شی دور و وَرِ هارشینِه، بجز عیسی کَس دییَرِ شی وَر نَئینِه.

9وختی کوهی جا جِر ایمونِه، عیسی وِشونِه دَستور هادا اونچی گه بَئینِه رِه هیچکَسی وَر نُئِن تا وختی گه اِنسونی ریکا مِردِگونی جا زینِّه بَوو.

10وِشون هَین جَریانِ شی وَر داشتِنِه، ولی هَمدیَری جا پُرسینِه ’مِردِگونی جا زینِّه بَووئَن‘ یَعنی چی.

11وِشون عیسایی جا بَپُرسینِه: «چه توراتی مَلِّمِن گِنِنِه اَوَّل وِنِه ایلیای پِیغمبر بیِه؟»

12عیسی بُتِه: «البَتِه گه اَوَّل ایلیا اِنِه تا هَمه چیرِه اوَّلی تَرا دِرِس هاکِنِه. ولی چه مِقَدّسِ نِوِشته هایی دِلِه بَنوِشت بَوِه اِنسونی ریکا وِنِه خِیلی زَجر بَکِشِه و وی هَمرا بَد رَفتاری هاکِنِن؟

13ولی مِن شِمارِ گِمِه گه ایلیا بیمو و وِشون هر چی خوایسِنِه وی هَمرا هاکِردِنِه، دِرِس هَمونجور گه وی خَوَری بَنوِشت بَوِه.»

14وختی وِشون بَقیِه شاگِردِنی وَر بَرِسینِه، بَئینِه یَتِخِیلی ازدحام وِشونی دور اِسّانِه و توراتی مَلِّمِن وِشونی هَمرا بَحث کِنِنِه.

15جماعَت تا عیسی رِه بَئینِه، هَمه تَجِّب هاکِردِنِه و دُویی هَمرا عیسایی وَر بیمونِه و وِرِه سلام هاکِردِنِه.

16عیسی وِشونی جا بَپُرسیِه: «هَمدیری هَمرا چی بَحث کِنِنی؟»

17یَتِه مَردی اِزدحامی دِلِه جِواب هادا: «اِسّا، مِن شی ریکارِه تی وَر بیاردِمِه. چون وی یَتِه پَلیدِ روحی گِرِفتارِ گه هون روح وِرِه لال کِنِّه.

18روح وختی وِرِه گیرنِه وِرِه بِنِه زَنِّه، جوریگه وی دِهِن کَف کِنِّه، وی دَنِّنِ قِفل و وی تَن خِشک وونِه. تی شاگِردِنی جا بَخوایسِمِه هون روحِ می ریکایی جا دیرگا هاکِنِن، ولی نَتِنِسِنِه.»

19عیسی وِشونی جِواب بُتِه: «اِی بی ایمونِ نَسل، تا کِی وِنِه شِمِه هَمرا دَووم؟ تا کِی وِنِه شِمارِ تَحَمِل هاکِنِم؟ وِرِه می وَر بیارین.»

20وِشون ریکارِه عیسایی وَر بیاردِنِه. هون روح وختی عیسی رِه بَئیِه، دَرجا ریکارِه غَشگَری دیم بَدا، ریکا بِنِه ای سَر دیم بَخاردِه و هَمونجور گه وی دِهِن کَف کِردِه، خاکی سَر غَلت خاردِه.

21عیسی ریکایی پیری جا بَپُرسیِه: «چَن وَختِ هَینجورِ؟» جِواب هادا: «از وَچِه وونی.

22هَین روح چَنکَش وِرِه تَش و اُوئی دِلِه دیم بَدا تا وِرِه نابود هاکِنِه. اگه بَتِنّی اَمارِه رَحم هاکِن و کِمَک هاکِن.»

23عیسی بُتِه: «اگه بَتِنّی؟ اونیسِه گه ایمون دارنِه هَمه چی ممکِنِه.»

24هون ریکائی پیر دَرجا بِلَنِ اَوازی هَمرا بُتِه: «ایمون دارمِه؛ مِنِه کِمَک هاکِن تا شی بی ایمونی ای حریف بَووم!»

25وختی عیسی بَئیِه یَتِه جَماعَت دُویی هَمرا اوجِه اِنِنِه، هون پَلیدِ روحِ تَشَر بَزو، بُتِه: «اِی لال و غولِ روح، تِرِه دَستور دِمِه ویجا دیرگا بیئِی و دِ هیچ وَخت وی دِلِه نَشوئی!»

26روح نَعرِه بَکشیِه و ریکارِه بَدجور دِکِت هادا و ویجا دیرگا بیمو. ریکا هِتی مِیِّتی تَرا بَوِه، جوریگه خِیلی از جَماعت بُتِنِه: «بَمِردِه.»

27ولی عیسی ریکائی دَسِ بَیتِه، وِرِه بِلَن هاکِردِه، و ریکا شی لینگی سَر هِرِسا.

28وختی عیسی خِنِه بوردِه، وی شاگِردِن خَلوَتی دِلِه ویجا بَپُرسینِه: «چه اَما نَتِنِّسِمی هون پَلیدِ روحِ دیرگا هاکِنیم؟»

29عیسی وِشونِه بُتِه: «هَینجور روح بجز دِعا هیچی ای هَمرا دیرگا نَشونِه.»

30وِشون اوجِه ای جا بوردِنِه و جَلیلی مَنطَقِه ای جا بِگذِشتِنِه. عیسی نَخوایسِه هیچکَس دِنِّه وی کِجِه دَرِه،

31چون شی شاگِردِنِه تَعلیم داوِه و وِشونِه گِتِه: «اِنسونی ریکا مَردِنی دَس تَسلیم وونِه و وِشون وِرِه کِشِنِنِه. ولی سِه روز بعد از بَمِردَن، زینِّه وونِه.»

32شاگِردِن وی مَنظورِ نِفَهمِسِنِه و تَرسینِه ویجا سوال هاکِنِن.

33اَزما وِشون کَفَرناحومی شهری سِه بَرِسینِه. وختی خِنِه ای دِلِه دَوِنِه، عیسی شاگِردِنی جا بَپُرسیِه: «راه دِلِه چی بَحث کِردِنی؟»

34ولی وِشون هیچی نُتِنِه، چون راه دِلِه همدیری هَمرا هَین بَحثِ کِردِنِه گه کی هَمه ای جا گَت تَرِ.

35عیسی هِنیشتِه و هون دِوازِه شاگِردِ شی کَفا بَخونِسِه و بُتِه: «هر‌ کی خواینِه اَوَّلین ووئِه، وِنِه آخَرین ووئِه و هَمه ای نوکر ووئِه.»

36اَزما عیسی یَتِه وَچِه رِه بَیتِه، وِشونی میِن بِشتِه و وَچِه رِه کَشِه بَیتِه و وِشونِه بُتِه:

37«هر‌ کی هَینجور وَچِه رِه می اِسمی خاطری قَبول هاکِنِه، مِنِه قَبول هاکِردِه؛ و هر کی مِنِه قَبول هاکِنِه، نا مِنِه، بَلگی اونیگه مِنِه بَرِسانی رِه قَبول هاکِردِه.»

38یوحنا عیسی رِه بُتِه: «اِسّا، یَنَفرِ بَئیمی تی اِسمی هَمرا دِو دیرگا کِردِه، ولی چون اَمِه جا نَوِه، وی دَمِ بَیتِمی.»

39ولی عیسی بُتِه: «وی دَمِ نَیرین، چون هیچکی نَتِنِّه می اِسمی هَمرا مُعجِزه هاکِنِه و اَقَدّی دییَر، می بَدی رِه بُئِه.

40چون هر کی اَمِه ضِد نَووئِه، اَمِه جائِه.

41حَیقَتاً شِمارِ گِمِه، هر کی هَینِسه گه شِما مسیحی سِه هَسّنی حتّی یَتِه کَچِه اُو شِمارِ هادِه، به هیچ وَجه شی اَجرِ از دَس نَدِنِه.

42«هر کی باعِث بَوو یَتِه اَزین کِچیکِن گه مِنِه ایمون دارنِه گِناه دَکِفِه، وِنِه بهتَر وِه یَتِه گَتِه آسیو سَنگ وی گِردَن وَسِّنِه و وِرِه دَریایی دِلِه دیم داوِنِه!

43اگه تی دَس تِره گِناه کَشانِّه، اونِه بَورین. تیسِه بِهتَرِه گه یَتِه دَسی هَمرا اَبَدی زندگی ای دِلِه بوری تا هَینگه دِتا دَسی هَمرا جَهِنِمی دِلِه بوری. هون تَشی گه هیچ وَخت دَکوشانی نَوونِه.

44جایی گه وِشونی اَجیک نَمیرنِه و تَش هیچ وَخت دَکوشانی نَوونِه.

45اگه تی لینگ تِرِه گِناه کَشانِّه، اونِه بَورین. تیسِه بِهتَرِ گه یَتِه لینگی هَمرا اَبَدی زندگی ای دِلِه بوری، تا هَینگه دِتا لینگی هَمرا جَهِنِمی دِلِه دیم بَدا بَووئی.

46جایی گه وِشونی اَجیک نَمیرنِه و تَش هیچ وَخت دَکوشانی نَوونِه.

47اگه تی چِش تِرِه گِناه کَشانِّه، اونِه دَر بیار، تیسِه بِهتَرِ گه یَتِه چِشی هَمرا خِدایی پادشاهی ای دِلِه بوری، تا هَینگه هر دِتا چِشی هَمرا جَهِنِمی دِلِه دیم بَدا بَووئی،

48”جایی گه وِشونی اَجیک نَمیرنِه و تَش هیچ وخت دَکوشانی نَوونِه.“

49چون هَمه تَشی هَمرا نِمَک هاشی وونِنِه.

50نِمَک خِبِ، ولی اگه نِمَک شی شوری رِه از دَس هادِه، چِتی بِشِنِه اَی اونِه شور هاکِردِن؟ شِما هَم شی دِلِه نِمَک دارین و هَمدیری هَمرا صِلح و صفایی دِلِه زندگی هاکِنین.