Ezra 8

Nepali 2008 - (सरल नेपाली पवित्र बाइबल)

← Chapter 7 Jump to: Chapter 9 →

1बेबिलोनियामा कैदी भई बसेका र अर्तासास्‍त महाराजा छँदा एज्रासँग यरूशलेम फर्किआउने गोत्र— गोत्रका प्रधानहरूको नामावली यस्‍तो छ:

2[2-14] पीनहासका गोत्रबाट: गेर्शोम ईतामारका गोत्रबाट: दानिएल दाऊदका गोत्रबाट: शकन्‍याहका छोरा हत्तूश परोशका गोत्रबाट: जकरिया र तिनीसँग आएका त्‍यस गोत्रका १५० जना पुरुष (उनीहरूको पुर्ख्‍यौलीसम्‍बन्‍धी कागज-पत्र थियो) पहत-मोआबका गोत्रबाट: जरयाहका छोरा एल्‍यहोएनै र उनीसित २०० जना पुरुष जत्तूका गोत्रबाट: यहासेलका छोरा शकन्‍याह र उनीसित ३०० जना पुरुष आदीनका गोत्रबाट: जोनाथनका छोरा एबेद र उनीसित ५० जना पुरुष एलामका गोत्रबाट: अतल्‍याहका छोरा यशयाह र उनीसित ७० जना पुरुष शपत्‍याहका गोत्रबाट: मिखाएलका छोरा जबदियाह र उनीसित ८० जना पुरुष योआबका गोत्रबाट: यहीएलका छोरा ओबदिया र उनीसित २१८ जना पुरुष बानीका गोत्रबाट: योसिपियाका छोरा शलोमीत र उनीसित १६० जना पुरुष बेबैका गोत्रबाट: बेबैका छोरा जकरिया र उनीसित २८ जना पुरुष अज्‍गादका गोत्रबाट: हक्‍कातानका छोरा योहानान उनीसित ११० जना पुरुष अदोनीकामका गोत्रबाट: एलीपेलेत, यीएल र शमायाह र तिनीहरूसित ६० जना पुरुष (तिनीहरू केही समयपछि फर्किआएका थिए।) बिग्‍वैका गोत्रबाट: उत्तै र जक्‍कूर र तिनीहरूसित ७० जना पुरुष।

15मैले सम्‍पूर्ण दललाई अहावा सहरतिर बग्‍ने नहरको छेउमा भेला गरें र हामी त्‍यहाँ तीन दिनसम्‍म डेरा गरेर बस्‍यौं। मैले देखें कि दलमा पूजाहारी त रहेछन् तर लेवीहरूचाहिँ थिएनन्।

16मैले नौ जना अगुवाहरू: एलीएजर, अरीएल, शमायाह, एल्‍नातान, यारीब, एल्‍नातान, नातान, जकरिया र मशुल्‍लाम र दुई जना गुरुहरू योयारीब र एल्‍नातानलाई बोलाउन पठाएँ।

17मैले तिनीहरूलाई कासिपिया जन-समुदायका मुखिया इद्दोकहाँ उनी र मन्‍दिरमा काम गर्ने उनका सहकर्मीहरूलाई मन्‍दिरमा परमेश्‍वरको सेवा गर्न मानिसहरू पठाइदेऊन् भनी खबर दिनलाई पठाएँ।

18परमेश्‍वरको अनुग्रहले तिनीहरूले हामीहरूकहाँ महली गोत्रका एक जना लेवी शरेबियाह अति योग्‍य मानिस पठाइदिए र उनीसँग उनका छोराहरू र कुटुम्‍बहरू गरी अठार जना पुरुषहरू आए।

19तिनीहरूले मरारी गोत्रबाट हशब्‍याह र यशयाहलाई पनि तिनका कुटुम्‍बबाट बीस जना पुरुषसहित पठाए।

20तीबाहेक दुई सय बीस जना मन्‍दिरका काम गर्ने थिए, जसका पिता-पुर्खालाई दाऊद राजा र उनका भारदारहरूले लेवीहरूलाई सघाउन नाम तोकिदिएका थिए। तिनीहरू सबैका नाम सूचीमा लेखिएका थिए।

21त्‍यहाँ अहावाको नहरछेउ मैले सबैलाई उपवास बस्‍न र आफैंलाई हाम्रा परमेश्‍वरको अघि नम्र बनाई हाम्रो यात्रामा उहाँको अगुवाइको निम्‍ति र हाम्रा छोरा-छोरी र धन-सम्‍पत्तिको रक्षाको निम्‍ति बिन्‍ती गर्न आज्ञा दिएँ।

22यात्रामा शत्रुहरूबाट हाम्रो रक्षाको निम्‍ति महाराजालाई घोडचढी सैनिक माग्‍न मलाई लाज लाग्‍यो किनभने मैले उनलाई हाम्रा परमेश्‍वरले उहाँमाथि भरोसा राख्‍ने सबैलाई आशिष् दिनुहुन्‍छ र उहाँलाई त्‍याग्‍नेहरूसित असन्‍तुष्‍ट भई दण्‍ड दिनुहुन्‍छ भनेको थिएँ।

23यसैकारण हामीहरू उपवास बस्‍यौं र हाम्रो रक्षाको लागि परमेश्‍वरलाई प्रार्थना गर्‍यौं र उहाँले हाम्रो प्रार्थनाको उत्तर दिनुभयो।

24मुख्‍य पूजाहारीहरूबाट मैले शरेबियाह, हशब्‍याह र अरू दश जनालाई चुनें।

25तब मैले महाराजा, उनका सल्‍लाहकार र भारदारहरू र इस्राएलका मानिसहरूले मन्‍दिरमा चलाउन भनी दिएका सुन, चाँदी र भाँडा-कुँडा तौलेर ती पूजाहारीहरूलाई दिएँ।

26[26-27] मैले तिनीहरूलाई यी कुराहरू दिएँ: चाँदी— २२,००० किलोग्राम १०० वटा चाँदीका भाँडाहरू ७० किलोग्राम सुन ३,४०० किलोग्राम २० वटा सुनका बटुकाहरू ९ किलोग्राम २ वटा सुन्‍दर कासाँका बटुकाहरू (सुनको दाम बराबर थियो)

28मैले तिनीहरूलाई भनें, “तिमीहरू परमप्रभु आफ्‍ना पुर्खाका परमेश्‍वरको निम्‍ति पवित्र छौ, त्‍यसरी नै उहाँलाई स्‍वेच्‍छाले भेटीका रूपमा चढाएका सुन र चाँदीका भाँडाहरू पनि पवित्र छन्।

29तिमीहरू मन्‍दिरमा नपुगेसम्‍म होशियारीसाथ तिनीहरूको रक्षा गर। त्‍यहाँ पुगेर पूजाहारीको कोठामा तिनीहरूको तौल लेओ र ती पूजाहारी र लेवीहरूका अगुवा र यरूशलेममा बास गर्ने इस्राएलीहरूका अगुवाहरूलाई देओ।”

30यसरी ती पूजाहारी र लेवीहरूले ती सुन, चाँदी र भाँडा-कुँडाहरू यरूशलेमका मन्‍दिरमा पुर्‍याउन आफ्‍ना जिम्‍मामा लिए।

31“पहिलो महिनाको बाह्रौँ दिन हामीले यरूशलेम जान अहावाको नहर छोड्यौं। हाम्रा परमेश्‍वर हामीसित हुनुहुन्‍थ्‍यो र हामीलाई यात्रामा शत्रुहरूका आक्रमण र बाटो ढुकाइबाट बचाउनुभयो।

32यरूशलेम पुगेर हामीले तीन दिन बितायौँ।

33चौथो दिन हामी मन्‍दिर गयौं, चाँदी, सुन र भाँडाहरू तौलियौं र उरियाहको छोरो मरेमोत पूजाहारीका हातमा जिम्‍मा लाइदियौं। उनीसित पीनहासको छोरो एलाजार र दुई लेवीहरू येशूअको छोरो योजाबाद र बिन्‍नूईको छोरो नोअदिया थिए।

34सबै कुरा गन्‍ती गरी तौलियो र साथसाथै सम्‍पूर्ण कागज-पत्र तयार गरियो।

35“त्‍यसपछि कैदबाट फर्किआएका सबैले इस्राएलका परमेश्‍वरलाई होमबलि चढाउन आ-आफ्‍ना बलिदानहरू ल्‍याए। तिनीहरूले सारा इस्राएलको निम्‍ति बाह्र वटा साँढे, छयान्‍नब्‍बे ठूला भेडा र सतहत्तर वटा थुमा बलि गरे। तिनीहरूले बाह्र वटा बोका पनि आफैंलाई पापबाट चोख्‍याउँदै होमबलि चढाए। यी सबै पशुहरू परमप्रभुलाई होमबलि चढाई जलाइ।

36महाराजाले दिएका कागज-पत्र पनि लिएर तिनीहरूले पश्‍चिम यूफ्रेटिस प्रान्‍तका बडा-हाकिम र भारदारहरूलाई दिए र ती अधिकृतहरूले त्‍यसपछि इस्राएलीहरूलाई र मन्‍दिरको पूजा कार्यमा सहायता दिए।

← Chapter 7 Jump to: Chapter 9 →