Matthew 2

Dutch Frisian

← Chapter 1 Jump to: Chapter 3 →

1Aus Jesus, enn Betlehem emm judeschen Laund, jebuare wea, enn de Tiet aus Heroodes Tjeenijch wea, tjeeme vom Oosten ütem Morjelaund Stearnforscha no Jerusalem, en säde:

2„Wua es de Tjeenijch de Jude, dee jebuare es? Dan wie ha sien Stearn emm Morjelaund jeseehne, en send jekohme, am auntobäde“.

3Aus Tjeenijch Heroodes daut head, wea hee erschratjt en gauns Jerusalem met am.

4In hee vesaumld aule Hüagepriesta en Schreftjeleade ütem Voltj, en forscht no, wua de Tjristus jebuare woare sull.

5See oba säde too am: Enn Betlehem enn Judäa; dan aulsoo steit derjch dän Profeet jeschräwe:

6„En dü Betlehem, emm Judischen Laund, dü best nijch de jerinjsta unja de Firste Harscha enn Judäa; dan üt die woat een Harscha häa kohme, dee mien Voltj Iesrael weide woat“. {Micha 5,1}

7Donn roopt Heroodes de Stearnforscha heemlijch, en forscht ahn jeneiw üt no de Tiet wanea de Stearn verndach jekohme wea;

8en hee schetjt ahn no Betlehem, en säd: Goht en forscht jeneiw no daut Tjint; en wann jie daut jefunge ha, dan sajcht mie daut, doamet uck etj kohm omm daut auntobäde.

9See oba, aus see däm Tjeenijch jeheat haude, jinje see han. En tjitj, de Stearn, dän see emm Morjelaund jeseehne haude, jintj ver ahn, bottet äwa de Städ stohne bleef, wua daut Tjint wea.

10Aus see oba däm Stearn sache, freide see sich sea.

11En see tjeeme ennet Hüs enenn, en sache daut Tjint met Maria, siene Mutta, en see volle ver am han, en bäde daut Tjind aun, en see muake äaren Schauts op, en opfade am Jeschentje: Gold, en Weiruuk, en Miren.

12En aus see emm Droom von Gott jewoarnt worde, nijch tridj no Heroodes too gohne, reisde see opp eenen aundren Wajch enn äa Laund.

13Aus see oppem Tridwajch weare, tjeem däm Harr sien Enjel no Joosaf emm Droom en säd: Stoh opp, nehm daut Tjint en siene Mutta en ran no Ejipten, en bliew doa, bott etj die saje woa; dan Heroodes woat daut Tjint seatje, omm daut ommtobrinje.

14Hee stund opp, nehm daut Tjind en siene Mutta, enne Nacht, en reisd no Ejipten.

15En hee bleef doa bott Heroodes jestorwe wea, omm daut erfellt wudd, waut von däm Harrn jesajcht es derjch dän Profeet, de doa sajcht: „Ut Ejipten ha etj mien Sän jeroopt“. {Hos.11,1}

16Heroodes wea sea doll, aus hee sach, daut hee von de Stearnforscha hinjagohne wea; en hee schetjt no Betlehem en de gaunse Ommjäajend, omm aule Junges, unja twee Joa en jinja, doot tomoake, no de Tiet, de hee von de Stearnforscha jeneiw erfoahre utjeforscht haud.

17Doa word erfellt, waut derjch dän Profeet Jeremia jesajcht es, de doa sajcht:

18„Eene Stemm es enn Rama jeheat worde, Hiele en väl Kloage: Raheel hielt äwa äare Tjinja, en see well sich nijch treeste lohte, dan dee send nijch mea“. {Jeremia 31,15}

19Oba aus Heroodes jestorwe wea, seeh, doa tjeem däm Harr sien Enjel, emm Droom, no Joosef enn Ejipten

20en säd: Stoh opp, en nehm daut Tjint en siene Mutta, en tratj tridj no daut Laund Iesrael; dan dee send jestorwe, de daut Tjint ommtobrinje sochte.

21Hee stund opp, nehm daut Tjint en siene Mutta, en tjeem enn daut Laund Iesrael.

22Aus hee oba head, daut Archelaus äwa Judäa rejead, enn sien Voda Heroodes siene Städ, haud hee Angst doa han too gohne; en aus hee emm Droom jewoarnt wort, jintj hee enn de Jäajend von Galiläa.

23En hee tjeem no de Staut, jenant Natsaret; doamet wudd erfellt, waut derjch de Profeete es jesajcht worde: „Hee saul Natsareena jenant woare“.

← Chapter 1 Jump to: Chapter 3 →