Matthew 4

Dutch Frisian

← Chapter 3 Jump to: Chapter 5 →

1Donn word Jesus vom Jeist enne Wieste jefeaht, omm doa vom Diewel vesocht too woare;

2en aus hee veatijch Doag en veatijch Nacht jefaust haud, donn hungad am.

3En de Veseatja tjeem no am en säd: Wann dü Gott sien Sän best, dan saj, daut dise Steena selle Broot woare.

4Hee oba auntwuad en säd: Daut steit jeschräwe: „Nijch vom Broot auleen saul de Mensch läwe, oba von jiedrem Wuat, daut üt Gott sien Mül ütjeit“. {5Mose 8,3}

5Donn nehm de Diewel am met, enn de heilje Staut, en stald am opp de Tempelspets

6en säd too am: Wann dü Gott sien Sän best, dan sprinj schmiet die hia rauf, dan daut steit jeschräwe: „Hee woat siene Enjel wäajen die befäle jäwe, en dee woare die oppe Henj droage, doamet dü dien Foot nijch aun eenen Steen statst“. {Ps. 91,11-12}

7Jesus säd too am: Wada steitet doa jeschräwe: „Dü saust dän Harr dien Gott nijch oppe Proow stale“. {5Mose 6,16}

8Wada nehm de Diewel am no een sea huagen Boajch, en wees am aule Ritje oppe Welt en äare Harlijchtjeit

9en säd too am: Aul dit well etj die jäwe, wann dü ver mie dohlfälst en mie aunbäde woascht.

10Jesus säd too am: Goh wajch, von mie Soton! Dan daut steit jeschräwe: „Dü saust dien Harr en Gott, aunbäde en am auleen deene“. {5Mose 6,13}

11Donn veleet de Diewel am, en tjitj, de Enjel tjeeme no am en deende am.

12Aus hee head, daut Jehaun jefange jenohme wea, jintj hee no Galiläa;

13en hee veleet Natsaret en tjeem en wohnd enn Kapernaum, daut aum See Tiberius lijcht, enn de Jäajend bie Sebulon en Naftalie;

14omm dautet erfellt word, waut derjch däm Profeet Jesaja jesajcht es, de doa sajcht:

15„Daut Laund Sebulon en daut Laund Naftalie, aum See, aun jane aundre Sied vom Jordan, daut heidnesche Galiläa;

16daut Voltj, daut emm Diestren saut, haft een grootet Lijcht jeseehne, en dän, dee em Laund en em Schaute vom Doot saute, ahn es een Lijcht oppjegohne“. {Jes.9,1-2}

17Von doa aun funk Jesus aun too prädje, en too saje: „Doht Busse, dan daut Himmelritj es dijchtbie jekohme“.

18Aus hee aum galiläashe See jintj, sach hee twee Breeda, Siemoon, dee uck Peeta heet, en Aundreas sien Brooda, de een Nat emm See schmeete, dan see weare Fescha.

19En hee säd too ahn: „Kohmt met mie met, en etj woa jünt too Menschefescha moake“.

20See veleete platzlijch äa Nat en jinje met am met.

21En aus hee von doa wieda jintj, sach hee twee aundre Breeda: Joakopp, dän Tsebedäus sien Sän, en Jehaun, sien Brooda, met äa Voda Tsebedäus emm Schepp, en fletjte äare Nats, en hee roopt ahn.

22Donn veleete see platzlijch daut Schepp en äa Voda en jinje met am met.

23En Jesus jintj derjch gauns Galiläa, en leahd enn äare Sienagooge en prädijd daut Evanjeelium von daut Ritj en heeld aule Krankheite en Liedenschoffte emm Voltj.

24En hee word bekaunt beriemt enn gauns Sierean; en see brochte no am aule Liedende, dee veschiedenste Krankheite haude en met Weedoag jetjwält weare, en dee met beese Jeista besäte weare en moontsijchtich en dee jelämt weare; en hee heeld dee aula.

25En väl Voltj von Galiläa, en Dekapolis, en Jerusalem, en Judäa, en hinja däm Jordan, tjeem am hinjaraun.

← Chapter 3 Jump to: Chapter 5 →