Romans 10

Dutch Frisian

← Chapter 9 Jump to: Chapter 11 →

1Breeda, de Wensch enn mienem Hoate en miene Bedd fe ahn too Gott es, daut see jerad woare.

2Dan etj bezeij ahn, daut see Iewa fe Gott ha, oba nijch no Ertjantnis.

3Dan doa see Gottes Jerajchtijchtjeit nijch ertjande en äare eajne Jerajchtijchtjeit häatostale sochte, ha see sich de Jerajchtijchtjeit Gottes nijch hanjejäft unjadone.

4Dan Tjristus es daut Jesatzes Enj, jiedrem Jleewenden too Jerajchtijchtjeit.

5Mooses beschreef de Jerajchtijchtjeit, de ütem Jesatz es: „Dee Mensch, dee dise Dinje jedohne haft, woat doaderjch läwe“. {3Mos.18,5}

6Oba de Jerajchtijchtjeit üt Gloowe sajcht soo: Saj nijch enn dienem Hoate: „Wäa woat enn däm Himmel ennopp stiee?“ Daut es, omm Tjristus rauftohole;

7Oda: „Wäa woat erauf stiee enn däm Aufgrund?“ Daut es, omm Tjristus vonne Doodes enopptohole;

8Doch waut saje see? „Daut Wuat es dijcht bie die, enn dienem Mül en enn dienem Hoate“; {5Mos.30,12-14} dit es daut Wuat vom Gloowe, daut wie vetjindje,

9dan wann dü met dienem Mül Jesus aus Harr betjannst en enn dienem Hoate jleefst, daut Gott am vonne Doodes oppjewatjt haft, woascht dü jerad woare.

10Dan met däm Hoate woat jejleewt too Jerajchtijchtjeit, en met däm Mül oba woat betjannt tom Heil Radung.

11Dan de Schreft sajcht: „Jiedra, dee aun am jleewt, woat nijch too Schaunde woare“. {Jes.28,16}

12Dan doa es tjeen Unjascheet tweschen Jude en Griejche, dan de selja Harr von aulen es Ritj fe aule, dee am aunroope;

13„dan jiedra, dee dän Nome vom Harr aunroopt, woat jerad woare“. {Joel 2,32}

14Woo säle see däm aunroope, aun däm see nijch jejleewt ha? Oba woo woare see aun dän jleewe, von däm see nijch jeheat ha? Oba woo säle see heare ohne eenen Vetjindja Prädja?

15Oba woo säle see vetjindje, wann see nijch jeschetjt send? Aus jeschräwe steit: „Woo leeflijch send de Feet de Vetjindja, dee daut Goode vetjindje, [dee froohe Botschoft brinjt, de Fräd vetjindijt, de Heil vetjindijt]! {Jes.52,7}

16Oba nijch aula send de froohe Botschoft däm Evanjeelium jehuarsom jeworde. Dan Jesaja sajcht: „Harr, wäa haft onsa Vetjindjung jejleewt?“ {Jes.53,1}

17Aulsoo tjemmt de Gloowe üt de Vetjindjung Botschoft, oba de Vetjindjung derjch daut Wuat Gottes Tjristus.

18Oba etj saj: Ha see fleijcht nijch jeheat? Jo freilijch. „Äa Schaul es oppe gaunse Ead, äwa de gaunse Ead ütjegohne, en äare Wead Räd bett aum Enj de bewohnte Ead“. {Ps.19,5}

19Oba etj saj: Haft Iesrael nijch vestohne? Aus easchta säd Mooses: „Etj well jünt tom Aufjenst reize äwa een Nijch-Voltj, äwa een Onnvestendjet Voltj, well etj jünt oajalijch moake“. {5Mos.32,21}

20Oba Jesaja woagt daut en sajcht: „Etj sie jefunge worde von dän, dee mie nijch sochte, etj sie openboa jeworde dän, dee nijch no mie fruage”. {Jes.65,1}

21Oba betraffs Iesrael sajcht hee: “Dän gaunsen Dach ha etj miene Henj ütjestratjt no eenem onnjehuarsomen en wadaspanstjet wadarädendem Voltj”. {Jes.65,2}

← Chapter 9 Jump to: Chapter 11 →