Joshua 16

nyankole

← Chapter 15 Jump to: Chapter 17 →

1Ekyanga ki baijukuru ba Yosefu baabagaine kikaba nikitandikira Yorudaani haihi na Yeriko, aha rubaju rw'amaizi ga Yeriko aga burugwa-izooba, okuhika omu ihamba; kiinamura nikiiha Yeriko, kiza omu nsi y'ebibungo kihika Beteli.

2Reero kiruga Beteli kihika Luuzi; kigumizamu kihika Atarooti, ensi y'Abaaruki.

3Bwanyima kirunduka nikigarura burugwa-izooba kihika aha mwatano gw'ensi y'Abayafuleeti, okuhikira kimwe aha mwatano gwa Betihorooni ey'eifo; kigumizamu kihika Geza kugarukira aha Nyanja.

4Abaayosefu: Manaase na Efuraimu, bakatunga obutaka bwabo.

5Ekyanga ky'Abaefuraimu, nk'oku emiryango yaabo yaabaire eri, kyaba kiti: Omwatano gw'obutaka bwabo ahari burugwa-izooba gukaiha Atarooti-adara, gwahika Betihorooni eya ruguru;

6kandi gwaiha aho gwata aha Nyanja. Aha bukiizi-bwa-bumosho ni Mikimeeta. Reero ahari burugwa-izooba omwatano gwakuba nigugarura Tanatishioli, gwagumizamu gwaraba burugwa-izooba gwahika Yanoa.

7Reero gwarunduka nigwiha Yanoa gwata Atarooti na Naara, gwahika Yeriko gwagarukira Yorudaani.

8Okwiha Tapua ogwo mwatano gutoora buregyerwa-izooba, guhika aha Kagyera Kana, gugarukira aha Nyanja. Obwo nibwo butaka bw'oruganda rw'Abaefuraimu, nk'emiryango yaabo oku eri,

9hamwe n'ebirorero ebyatairwe hangahari ahabw'Abaefuraimu omu nsi y'obutaka bw'Abaamanaase; ebyo birorero byona n'ebyaro byabyo.

10Kwonka shi tibarabingiremu Banyakanaani abaabaire batwire Gezeri. N'ahabw'ekyo Abanyakanaani batuura hamwe n'Abaefuraimu, okuhitsya n'eri izooba; kwonka bari ab'okukora emirimo y'obuhuuku.

← Chapter 15 Jump to: Chapter 17 →