Joshua 9

nyankole

← Chapter 8 Jump to: Chapter 10 →

1Abagabe ba seeri ya Yorudaani, abatwire omu nsi y'ebibungo n'omu mpita n'omu myegyeego y'Enyanja Empango ogurikureeba Lebanooni; Abahiiti, Abaamori, Abakanaani, Abapeerizi, Abahiizi n'Abayebusi, ku baahuriire ebyo,

2baayeteerana n'omutima gumwe kurwanisa Yoshwa n'Abaisiraeli.

3Kwonka Abaagibeoni, ku baahuriire oku Yoshwa agizire Yeriko na Aayi,

4baayecwera obwengye, baagyenda baayekomera entanda. Baata aha ndogoya zaabo amaguniya n'endyanga za viino ebikuzire biteirwe ebiremu.

5Baata omu bigyere byabo enkaito zikuzire zitairwe ebiremu, baajwara n'emyenda ekuzire; entanda zaabo zikaba zoomire kandi zihumbire.

6Batyo baija baashanga Yoshwa omu rusiisira Giligaali. Baamugira we n'Abaisiraeli bati: Nituruga omu nsi ya hare. Mbwenu nitubeeshengyereza, mukore naitwe endagaano.

7Kwonka Abaisiraeli baagira abo Bahiivi bati: Obundi mukaaba mutwire naitwe. Mbwenu obwo tukaakora tuta endagaano naimwe?

8Baagarukamu Yoshwa bati: Turi abairu baawe. Na Yoshwa yaabagira ati: Muri baahi? Kandi nimuruga hi?

9Baamugira bati: Itwe abairu baawe nituruga omu nsi ya hare ahabw'okuhurira okurangaanwa kwa Mukama Ruhanga waawe. Manya tuhuriire ebi barikumugambaho, n'ebi yaakozire omuri Misiri,

10kandi n'ebi yaakozire abagabe bombi ab'Abaamori, abaabaire bari seeri ya Yorudaani: Sihooni omugabe w'Abaheshibooni, na Ogi omugabe wa Bashani, batwire Ashitarooti.

11Abakuru baitu n'abatuuzi b'omu nsi yaitu boona batugizire bati: Mwetwarire entanda ahabw'orugyendo, mugyende mubabugane. Haza mubagire muti: Turi abairu baanyu! Mbwenu nu, nimukore naitwe endagaano.

12Egi n'emigaati yaitu: Obu twagiiha omuka kwija nitugiriira omu muhanda, ekaba neetagata aha izooba ri twaimukiizeho orugyendo kwija kubareeba. Hati reeba, eyomire kandi ehumbire.

13Ezi ndyanga za viino zikaba ziri nsya obu twaziijuza. Mbwenu reeba, zitaagataagukire. Kandi ebi bijwaro hamwe n'enkaito zaitu bikuzire ahabw'orugyendo ruraingwa munonga.

14Batyo abakuru b'Abaisiraeli baarya ahari ezo ntanda, haza tibaayebuuza hari Mukama kubahabura.

15Yoshwa atyo akora nabo endagaano y'obusingye kutabaita. N'abeebembezi b'eihanga babahamiza.

16Ku haahingwireho ebiro bishatu bakozire nabo endagaano, Abaisiraeli baamanya ku bari bataahi baabo abahereraine nabo.

17Abaisiraeli batyo baimutsya, bagyenda, bahika omu ndembo zaabo aha kiro kya kashatu. Endembo zaabo zikaba ziri Gibeoni, Kefiira, Berooti na Kiiriyatiyearimu.

18Kwonka Abaisiraeli tibabaita; ahabw'okuba abeebembezi b'eihanga bakaba baabarahiire Mukama Ruhanga wa Isiraeli. Ab'eihanga boona nikwo kwetomboitera abo beebembezi.

19Kwonka abeebembezi baagira ab'eihanga ryona bati: Tubarahiire Mukama Ruhanga wa Isiraeli. N'ahabw'ekyo titurikubaasa kubaita.

20Mbwenu ka tubagire tuti: tubarekye bagume bahuriire, kashanga ya Ruhanga etakaatugwera ahabw'endahiro ei tubarahiire.

21Abeebembezi bongyera babagira bati: Mubarekye bagumeho bari abashatuzi b'enku kandi ab'okutahira eihanga ryona amaizi. Abateeraniire aho baikiriza eki abo beebembezi baagamba.

22Yoshwa abeeta ababuuza ati: Mutubeihiire ki, mukatugira muti: Turi hare munonga naimwe haza kunu mutwire naitwe?

23Mbwenu nu, mwakyeenwa. Bamwe omuriimwe nibaija kuguma bari abahuuku b'okushatura enku n'okutahira amaizi enju ya Ruhanga wangye.

24Bagarukamu Yoshwa bati: Manya itwe abairu baawe abantu bakatugambira nibatuhamiza ku Mukama Ruhanga waawe yaaragiire omugaragwa we Musa kubaha egi nsi yoona, n'okucwekyereza abagitwiremu, bakabahigiza. N'ahabw'ekyo tukabatiina munonga, ngu mutakaatwita, twakora ekyo kintu.

25Mbwenu reeba, turi omu mikono yaanyu, mutukore eki muraareebe ngu ni kirungi kandi kihikire.

26Nawe aba nikwo yaabatwaza. Abaiha omu mikono y'Abaisiraeli, bareka kubaita.

27Haza eryo izooba Yoshwa abahindura abashatuzi b'enku n'ab'okuguma nibatahira amaizi eihanga ryona n'eitambiro rya Nyakubaho omu mwanya gu aritoorana, okuhitsya n'eri izooba.

← Chapter 8 Jump to: Chapter 10 →