Joshua 5

nyankole

← Chapter 4 Jump to: Chapter 6 →

1Abagabe b'Abaamori abaabaire batwire seeri ya Yorudaani ogurikugarura burengyerwa-izooba, n'ab'Abanyakanaani abatwire omu myegyeego y'enyanja, ku baahuriire Mukama ayomeize Abaisiraeli amaizi ga Yorudaani, okuhitsya obu baayambukire, baahahaara, emitima yaabahwa omunda ahabw'okutiina Abaisiraeli.

2Ago magingo Nyakubaho yaagambira Yoshwa ati: Shatura amabaare, ogaihemu emisyo, oshare Abaisiraeli omurundi gwa kabiri.

3Yoshwa atyo ashatura amabaare, agaihamu emisyo asharira Abaisiraeli omuri Giibeati-Haaraloti.

4Kandi eki nikyo Yoshwa yaabashariire: Ahabw'okuba oyetwa omushaija weena ow'abaarugire Misiri, abashaija boona abarwani bakaba baafeereire omu muhanda omu ihamba baherize kuruga Misiri.

5Abantu boona abaarugireyo, nobu baraabe baabaire baashazirwe, kwonka boona abaazairwe nibakigyenda bari omu ihamba, baarugire Misiri, bakaba batakashazirwe.

6Manya Abaisiraeli bakamara emyaka makumi ana omu ihamba nibagyenda, okuhitsya obu abashaija abarwani ab'eihanga ryona abaarugire Misiri baahwaireho, ahabw'okutakora ebi Nyakubaho yaabaragiire. Nawe akabarahirira ku ataribareka kureeba ensi ei yaarahiire baatatenkuriitwe kugituha ensi erikuhimintika amate n'obwoki.

7N'ahabw'ekyo abaana baabo abu Nyakubaho yaagarwire omu bigyere bya baishebo, nibo Yoshwa yaashazire. Manya abo bakaba batashazirwe ahabw'okuba omuri orwo rugyendo bakaba batakashazirwe.

8Ab'eihanga boona ku baaherize kusharwa, baaguma omu myanya yaabo omu rusiisira okuhitsya obu baakizire.

9Mpaho Nyakubaho yaagira Yoshwa ati: Eri izooba naabaihaho ekihemu kya Misiri. Ogwo mwanya nikyo gweterwa Giligaali, n'eri izooba.

10Abaisiraeli ku baabaire bakisiisiire Giligaali, baagira omukoro gw'okwijuka okuhingurwaho aha kiro kya ikumi na bina eky'okwo kwezi omu mwabazyo, omu mpita za Yeriko.

11Reero omu kasheeshe k'ekiro ekyakuratiire Okuhingurwaho, eryo izooba baarya ebyezire omuri egyo nsi: Emigaati etatumbisiibwe n'ebicoori bikarangire.

12Ku baariire ebyezire omuri egyo nsi, omu kasheeshe akaakuratsireho emaanu yaarekyera aho kugwa. Abaisiraeli tibaatunga maanu bundi, kureka baaguma nibarya ebyezire omu nsi ya Kanaani omuri ogwo mwaka.

13Yoshwa ku yaabaire ari haihi na Yeriko, ku yaimukize amaisho, yaareeba ahonaaho omuntu amwemereire omu maisho, akwaitse rurara esyoirweyo. Yoshwa atyo amuhika, amubuuza ati: Ori ow'abaitu nari ori ow'abazigu baitu?

14Onu amugarukamu ati: Ngaaha, kureka hati naija ndi omukuru w'eihe rya Nyakubaho. Yoshwa ajuumara aha nsi, aramya, kandi agira ogwo muntu ati: Mbwenu mukama wangye, nyowe omwiru waawe nondagiira ki?

15Ogwo mukuru w'eihe rya Nyakubaho agira Yoshwa ati: Juura enkaito omu bigyere byawe, ahabw'okuba omwanya gu oyemereiremu n'ogurikwera. Yoshwa nawe akora atyo.

← Chapter 4 Jump to: Chapter 6 →