Joshua 18

nyankole

← Chapter 17 Jump to: Chapter 19 →

1Ebyo ku byahwaire, eihanga ry'Abaisiraeli ryona ryateeranira Shiilo, ryateerayo eihema ry'okubugabuganiramu; obwo ensi ebagomookyeire.

2Kwonka omu Baisiraeli hakaba hakitsigairemu enganda mushanju ezitakabaganisiziibwe itaka ryazo ry'obuhunguzi,

3Yoshwa nikwo kugira Abaisiraeli ati: Nimuherera hi kweganda kuza kukubuura ensi ei Mukama Ruhanga wa baashwenkuriimwe yaabahaire?

4Nimutoorane abashaija bashatu omu buri ruganda, mbatume, bagyende hoonahoona omuri egyo nsi, bahandiikye oku ebyanga byayo bishemereire kukubuurwa, na bwanyima bagarukye ahi ndi.

5Bagibaganisemu ebyanga mushanju. Abaayuda bagume omu kicweka kyabo eky'aha bukiizi-bwa-buryo; n'ab'omuryango gwa Yosefu omu kyabo eky'aha bukiizi-bwa-bumosho.

6Kandi muhandiikye nimushoboorora eby'egyo nsi omu bicweka muahanju. Haza ebi mwahandiika mubindeetere; naanye mbateerere enteenyu omu maisho ga Mukama Ruhanga waitu.

7Abaleevi bo ti b'okubagana naimwe, ahabw'okuba obuhunguzi bwabo n'okuba abahongyerezi ba Nyakubaho. Kandi Abaagaadi n'Abaareubeeni n'ekicweka ky'ab'oruganda rwa Manaase baaherize kuheebwa eitaka ryabo ry'obuhunguzi seeri ya Yorudaani embari ya burugwa-izooba, eri Musa omugaragwa wa Mukama yaabahaire.

8Batyo abo bashaija baimutsya orugyendo, na Yoshwa abeehanangiriza kuhandiika eby'egyo nsi, naabagira ati: Mugyende hoonahoona muhandiikye nimushoboorora eby'egyo nsi. Reero mugarukye ahi ndi; naanye mbateerere enteenyu Shiilo, omu maisho ga Nyakubaho.

9Mpaho abo bashaija bagyenda, bahika hoonahoona omuri egyo nsi, haza bahandiika omu kitabo nibashoboorora ebyayo omu bicweka mushanju nibareebera aha ndembo. Bwanyima bagaruka ahi Yoshwa ari omu rusiisira rwa Shiilo;

10nawe abateerera enteenyu Shiilo omu maisho ga Nyakubaho. Kandi aho Yoshwa aba niho yaabaganisiza Abaisiraeli egyo nsi, buri ruganda ekyanga kyarwo.

11Enteenyu ekakwata ab'oruganda rwa Benyamiini, nk'emiryango yaabo oku eri; ekyanga ki baahairwe kyaba ahagati y'eky'Abaayuda n'eky'Abaayosefu.

12Aha bukiizi-bwa-bumosho omwatano gwabo gwatandikira Yorudaani, gwagumizamu gwahika aha rubaju rwa Yeriko; gwainamuka gwaraba omu nsi y'ebibungo orubaju rwa burengyerwa-izooba, gwagarukira aha ihamba rya Betaaveni.

13Okwiha aho, ogwo mwatano guraba aha bukiizi-bwa-buryo nigutoora Luuzi, guhika aha rubaju rwa Luuzi egyo niyo Beteli bwanyima gurunduka, guhika Atarooti adara aha rushozi oruri aha bukiizi-bwa-buryo bwa Betihorooni eya ifo;

14gutyo gutoora orundi rubaju, gukiikamira aha rubaju rwa burengyerwa-izooba aha bukiizi-bwa-buryo, nigwiha aha rushozi oruri aha rubaju rw'obukiizi-bwa-buryo aharikureebana na Betihorooni, gugarukira Kiriyatabali niyo Kiriyatiyearimu orurembo ry'Abaayuda. Orwo nirwo rubaju rw'oburengyerwa-izooba.

15Reero orubaju rw'obukiizi-bwa-buryo nigutandikira ahi Kiriyatiyearimu erikugarukira; gwiha aho gugumizamu guhika Efurooni, aha nshuro z'amaizi ga Nefutoa;

16gutyo gushuuma guhika aha mwatano gw'orushozi orurikureebana n'oruhanga rwa mwene Hiinomu, oruri aha muheru gw'obukiizi-bwa-bumosho bw'orwo ruhanga rw'Abareefa; gushuumira omu ruhanga rwa Hiinomu aha bukiizi-bwa-buryo obw'aha rubaju rw'Abayebusi, gurunduka guhika Eniroogyeli;

17reero gukiikama nigugarura obukiizi-bwa-bumosho, gugumizamu guhika Ensheemeshi; guruga aho guhika Gelilooti, ahashungaine n'akatembo ka Adumimu; mpaho gushuuma guhika aha ibaare rya Bohaani mwene Reubeeni;

18gugumizamu guhika aha bukiizi-bwa-bumosho bw'aha rubaju rwa Betaraba, gushuuma guhika Araba;

19bwanyima gugumizamu guhika aha bukiizi-bwa-bumosho, aha rubaju rwa Betihogala; gutyo gugarukira aha mukono gw'Enyanja y'Omwonyo, aha muheru gw'obukiizi-bwa-buryo obwa Yorudaani. Ogwo nigwo mwatano gw'aha bukiizi-bwa-buryo.

20Yorudaani niyo mwatano gwayo gw'aha rubaju rw'oburugwa-izooba. Obwo nibwo butaka bw'ab'oruganda rwa Benyamiini, nk'oku miryango yaabo eri, n'oku omwatano gwayo guri aha mbaju zoona.

21Mbwenu ezi nizo ndembo z'ab'oruganda rw'Abaabenyamiini, nk'emiryango yaabo oku yaabaire eri: Yeriko, Betihogala, Emekeezi,

22Betaraba, Zemaraimu, Beteli,

23Aviimu, Para, Ofura,

24Keefazimooni, Ofuni, Geba-endembo ikumi na ibiri n'ebyaro byazo:

25Gibeoni, Raama, Beerooti,

26Mizipe, Kefiira, Moza,

27Rekemu, Iripeeli, Taarala,

28Zela, Haelifu, Yeebu, niyo Yerusalemu, Gibea na Kiriyayearimu endembo ikumi na ina n'ebyaro byazo. Obwo nibwo butaka bw'ab'oruganda rwa Benyamiini, nk'emiryango yaabo oku eri.

← Chapter 17 Jump to: Chapter 19 →