Joshua 6

nyankole

← Chapter 5 Jump to: Chapter 7 →

1Mbwenu ahabw'okutiina Abaisiraeli, Yeriko ekaba ekingiirwe omunda n'aheeru, hataine orikushohora nari orikutaahamu.

2Reero Nyakubaho yaagira Yoshwa ati: Reeba, naakurekurira Yeriko n'omugabe waayo n'amamanzi gaayo.

3Mugyende nimurwehinguririza. Abashaija abarwani boona beehinguririze orwo rurembo omurundi gumwe. Mumare ebiro mukaaga nimukora mutyo.

4Kandi abahongyerezi mushanju bagyende bakwaitse enzamba mushanju z'amahembe g'engondoore z'entaama beebembeire eshanduukye. Reero aha kiro kya mushanju, mwehinguririze orwo rurembo emirundi mushanju, abahongyerezi nibateera enzamba.

5Mbwenu ku baraateere enzamba y'akasirikiriro ey'eihembe ry'engondoore y'entaama, mwahurira muti eiraka ry'egyo nzamba, abantu boona baamuze nibateera munonga orwari. Haza orugo rw'orwo rurembo nirwija kukumbagara, abantu barweshukyemu buri omwe naataahira ahu ari.

6Mpaho Yoshwa mwene Nuuni ayeta abahongyerezi, abagira ati: Muheekye eshanduukye y'endagaano, kandi abahongyerezi mushanju bagyende bakwaitse enzamba mushanju z'amahembe g'engondoore z'entaama beebembeire eshanduukye ya Nyakubaho.

7Mpaho aragiira abantu ati: Nimugumizemu, mwehinguririze orurembo, abashaija abarwani bagyende beebembeire eshanduukye ya Nyakubaho.

8Yoshwa ku yaaherize kuragiira atyo abo bantu, abahongyerezi mushanju abakwaitse enzamba mushanju z'amahembe g'engondoore z'entaama bari omu maisho ga Nyakubaho, baagyenda nibateera enzamba, eshanduukye y'endagaano ya Mukama ebakuratiire.

9Kandi abakwaitse eby'okurwanisa baayebembera abahongyerezi abarikuteera enzamba. Reero abarinzi ab'enyima baija bakuratiire eshanduukye; enzamba nazo zaagumizamu nizaaniira.

10Kwonka Yoshwa yaaragiira abantu ati: Mutateera orwari, n'amaraka gaanyu gatahurirwa; kandi hatagira ekigambo kyabaruga omu kanwa, okuhitsya aha izooba ri ndaabaragiirireho kuteera orwari, mukaba nibwo mwaruteera.

11Atyo ayeziguurutsya eshanduukye ya Nyakubaho orurembo omurundi gumwe. Mpaho bagarukayo omu rusiisira, baraaramu.

12Omu kasheeshe, Yoshwa aimuka kare, n'abahongyerezi baheeka eshanduukye ya Nyakubaho.

13N'abahongyerezi mushanju, abakwaitse enzamba mushanju z'amahembe g'engondoore z'entaama bari omu maisho g'eshanduukye ya Nyakubaho, baarabaho, bagumiizemu nibateera enzamba; n'abakwaitse eby'okurwanisa babari omu maisho, kandi abarinzi b'enyima bakuratiire eshanduukye ya Nyakubaho; obwo enzamba nizaaniira, zitarikuremuura.

14N'aha izooba rya kabiri baayehinguririza orwo rurembo omurundi gumwe, baagarukayo omu rusiisira. Baatwaza batyo okumara ebiro mukaaga.

15Aha kiro kya mushanju, baimuka kare omushekye nigujuguta, baayehinguririza orurembo emirundi mushanju nka buri. Eryo izooba ryonka nibwo baarwehinguririza emirundi mushanju.

16Aha murundi gwa mushanju, abahongyerezi ku baateire enzamba, Yoshwa yaagambira abantu ati: Muteere orwari, ahabw'okuba Nyakubaho yaabaha orurembo.

17Orwo rurembo n'ebirurimu byona n'eby'okuhwera kimwe, bikacwekyerezibwa. Kureka Rahabu maraaya, n'abari hamwe nawe omu nju nibo baraagumeho; ahabw'okuba akashereka entatsi zi twatumire.

18Kwonka imwe mwerinde mutakora aha kintu kyona eky'okucwekyerezibwa. Ahabw'okuba ebyo byonzira ku muraaheze kubiheera kimwe Nyakubaho, mwagira eki mwatwara, nimuba mureeteire orusiisira rw'Abaisiraeli kucwekyerera, murugwisiize akagwe.

19Kwonka efeeza zoona n'ezaabu n'ebintu by'omuringa n'eby'ekyoma, ebyo n'ebirikwera bya Nyakubaho, eby'okutwarwa omu ibiikiro rye.

20Abo bantu batyo baamuza, n'enzamba ziteerwa. Ku baahuriire bati eiraka ry'enzamba, baateera munonga orwari, orugo rwakumbagara rwagwa aha nsi, baaruragaramu; buri muntu yaatembera ahi yaabaire ari, baarukwata.

21Baacwekyerereza kimwe ebyamwo byona; abashaija n'abakazi, abato n'abakuru, ente, entaama n'endogoya; byona baabiitsa rurara y'obwogi.

22Bwayima Yoshwa yaagira abashaija bari, bombi abaatatsire egyo nsi ati: Nimuze omu nju y'egyo nshambani, mwihemu ogwo mukazi n'abe boona, nk'oku mwamurahiire.

23Batyo abo batsigazi baatatsire, bataahamu baihamu Rahabu, na ishe, na nyina, na banyaanya n'abe boona. Bareeta abanyabuzaare be boona, babata aheeru y'orusiisira rw'Abaisiraeli.

24Reero bootsya orurembo n'ebirurimu byona, okwihaho efeeza n'ezaabu n'ebintu eby'omuringa n'eby'ekyoma. Ebyo babita omu ibiikiro ry'enju ya Nyakubaho.

25Kwonka Rahabu maraaya, n'ab'eka ya ishe, n'abe boona, Yoshwa abarokora. Ogwo mukazi atuura omu Baisiraeli okuhitsya n'eri izooba, ahabw'okuba akashereka entatsi zi Yoshwa yaatumire kutata Yeriko.

26Yoshwa omuri ago magingo yaabarahiza naabeehanangiriza omu maisho ga Nyakubaho ati: Omuntu oriimuka akagaruka kwombeka oru rurembo Yeriko, akyeenwe! Ku aritaho omusingi gwarwo, omwana we w'omujigaijo afe! Kandi ku aribyara amarembo gaarwo, omwana we bucuranda afe!

27Nyakubaho nikwo yaagumire atyo na Yoshwa, okurangaanwa kwe kukabuga ensi yoona.

← Chapter 5 Jump to: Chapter 7 →