Joshua 21

nyankole

← Chapter 20 Jump to: Chapter 22 →

1Bwanyima abakuru b'emiryango ya baishenkuru b'Abaleevi bakaija ahari Eleazaari omuhongyerezi na Yoshwa mwene Nuuni n'aha bakuru b'emiryango ya baishenkuru b'enganda z'Abaisiraeli,

2baabagambirira Shiilo omu nsi ya Kanaani bati: Nyakubaho akaragiira Musa ngu tuheebwe endembo z'okutuuramu hamwe n'ebyanga by'okuriisizamu amatungo gaitu.

3Ahabw'okuragiirwa Nyakubaho, Abaisiraeli baaha Abaleevi endembo n'amariisizo, nibabiiha aha byanga byabo by'obutaka.

4Enteenyu yaakwata ab'emiryango y'Abaakoohati; Abaleevi baijukuru b'Arooni omuhongyerezi. Batyo baatunga endembo ikumi na ishatu okuruga aha z'ab'oruganda rwa Yuda n'orwa Simeoni n'orwa Benyamiini.

5Abaakohati abaatsigaireho ahabw'enteenyu baatunga endembo ikumi niziihwa aha z'ab'emiryango y'oruganda rwa Efuraimu, n'aha z'ab'oruganda rwa Daani, n'aha za kimwe kya kabiri ky'ab'oruganda rwa Manaase.

6Abaagereshooni, ahabw'enteenyu, baaheebwa endembo ikumi na ishatu z'ab'emiryango y'oruganda rwa Asheri, n'aha z'ab'orwa Nafutaali, kandi n'aha za kimwe kya kabiri ky'ab'oruganda rwa Manaase omuri Bashani.

7Abaameraari, nk'emiryango yaabo oku eri, baaheebwa endembo ikumi na ibiri, ziihirwe aha z'ab'oruganda rwa Reubeeni, n'aha z'ab'orwa Gaadi, n'orwa Zebuluuni.

8Ezo ndembo n'amariisizo gaazo Abaisiraeli bakaziha Abaleevi nibabateerera enteenyu, nk'oku Nyakubaho yaabaragiire, naabatumaho Musa.

9Bakabaha endembo ezi ezaaza kugambwaho, nibaziiha aha z'ab'oruganda rwa Yuda n'aha z'ab'orwa Simeoni,

10zaatwarwa baijukuru b'Arooni ab'emiryango y'Abaakoohati ab'omu Baleevi; ahabw'okuba nibo enteenyu yaabandize kukwata.

11Baabaha Kiriyataraba eya Araba ishe w'Abaanaki niyo Heburooni, omu nsi ya Yuda ey'ebibungo hamwe n'amariisizo gagyehinguririize.

12Kwonka emisiri y'orwo rurembo n'ebyaro byarwo bikaba byahairwe Kalebu mwene Yefuune kuba ebye.

13Kandi baijukuru b'Arooni omuhongyerezi baabaha Heburooni orurembo rw'oitsire omuntu kuhungiramu, hamwe n'amariisizo gaarwo, na Libuna, hamwe n'amariisizo gaarwo;

14Yatiri n'amariisizo gaayo;

15Holoni n'amariisizo gaayo; Debiri n'amariisizo gaayo;

16Aini n'amariisizo gaayo; Yuuta n'amariisizo gaayo, na Betishemeshi hamwe n'amariisizo gaayo endembo mwenda ezaarugire omu z'enganda ibiri.

17Reero omu z'ab'oruganda rwa Benyamiini: Gibeoni n'amariisizo gaayo, Geba n'amariisizo gaayo,

18Anatooti n'amariisizo gaayo, na Alumooni hamwe n'amarisizo gaayo endembo ina.

19Endembo za baijukuru ba Arooni abahongyerezi, zoona zikaba endembo ikumi na ishatu, hamwe n'amariisizo gaazo.

20Abandi Bakoohati ab'emiryango ya Koohati ey'Abaleevi, endembo ezaabahairwe zikaruga omu z'ab'oruganda rwa Efuraimu.

21Baaheebwa Shekemu, orurembo rw'okuhungiramu owaita omuntu, hamwe n'amariisizo gaarwo omu nsi y'ebibungo eya Efuraimu; na Gezari hamwe n'amariisizo gaayo,

22Kibuzaimu n'amariisizo gaayo, Betihorooni n'amariisizo gaayo endembo ina;

23kandi omu z'ab'oruganda rwa Daani: Eliteke hamwe n'amariisizo gaayo, Gibetoni n'amariisizo gaayo,

24Aiyalooni n'amariisizo gaayo, Gatirimooni n'amariisizo gaayo endembo ina;

25kandi omu z'aba kimwe kya kabiri ky'ab'oruganda rwa Manaase, baihayo Taanaka n'amariisizo gaayo, na Gatirimooni n'amariisizo gaayo endembo ibiri.

26Endembo z'ab'emiryango y'Abakoohati abaatsigaireho zoona hamwe zaaba ikumi, hamwe n'amariisizo gaazo.

27Abaagereshooni ab'emiryango y'Abaleevi bakaheebwa aha ndembo za kimwe kya kabiri ky'ab'oruganda rwa Manaase. Nizo ezi: Golani ey'omuri Bashani, orurembo oruhungirwamu owaita omuntu, hamwe n'amariisizo gaarwo; na Beeshiteera hamwe n'amariisizo gaayo endembo ibiri.

28Kandi aha z'ab'oruganda rwa Isakaari; Kiishioni hamwe n'amariisizo gaarwo, Daabera n'amarrisizo gaayo;

29Yaarimuti n'amariisizo gaayo, Engaanimu n'amariisizo gaayo endembo ina.

30Omu z'ab'oruganda rwa Asheri: Mishali hamwe n'amariisizo gaayo, Abudooni n'amariisizo gaayo,

31Helikaati n'amariisizo gaayo na Rehobu hamwe n'amariisizo gaayo endembo ina.

32Kandi omu z'ab'oruganda rwa Nafutaali: Kedeshi omuri Galilaaya, orurembo orurikuhungirwamu owaita omuntu, hamwe n'amariisizo gaarwo; na Haamotidoori n'amariisizo gaarwo endembo ishatu.

33Endembo z'emiryango etari emwe ey'Abaagereshooni zoona hamwe zikahika ikumi na ishatu, hamwe n'amariisizo gaazo.

34Mbwenu Abaleevi abaatsigaireho ab'emiryango ya Meraari bakaheebwa endembo nibaziiha omu z'ab'oruganda rwa Zebuluuni. Nizo ezi: Yokineamu hamwe n'amariisizo gaarwo, Karita n'amariisizo gaayo,

35Dimuna n'amariisizo gaayo, Nahalaali n'amariisizo gaayo endembo ina.

36Kandi omu z'ab'oruganda rwa Reubeeni baihayo Beezeeri hamwe n'amariisizo gaayo, Yahazi n'amariisizo gaayo,

37Kedemooti n'amariisizo gaayo, na Mefaata hamwe n'amariisizo gaayo endembo ina.

38Reero omu z'ab'oruganda rwa Gaadi baabaha Ramoti ey'omuri Gileadi hamwe n'amariisizo gaayo, orurembo rw'okuhungirwamu oitsire omuntu; na Mahanaimu hamwe n'amariisizo gaayo,

39Heshibooni n'amariisizo gaayo, Yaazeri n'amariisizo gaayo zoona hamwe endembo ina.

40Haza endembo z'ab'emiryango y'Abaameraari etari emwe, niyo miryango y'Abaleevi eyaabaire etsigaireho, ezi baabahaire zaahika zoona endembo ikumi na ibiri.

41Endembo z'Abaleevi ezaabaire ziri ahagati y'ensi y'Abaisiraeli zoona zikahika makumi ana na munaana, hamwe n'amariisizo gaazo.

42Buri rumwe rukaba rwine amariisizo gaarwo agarwehinguririize; kiri kityo aha ndembo zoona.

43Okwo nikwo Nyakubaho yaahaire Abaisiraeli ensi ei yaarahiire kuha baishebo. Nabo ku baaherize kugikubuura, baagituuramu.

44Nyakubaho yaabaha obuhuumure aha mbaju zoona, nk'oku yaarahiire kubuha baishebo. Omu bazigu baabo boona tihaagira n'omwe owaabaasize kubaza omu kaso; ahabw'okuba Mukama akaba abahaire okusingura abazigu baabo boona.

45Ebirungi byona ebi Nyakubaho yaaraganiise ab'enju ya Isiraeli tihariho na kimwe eki atarahikiriize; byona bikaba kwo.

← Chapter 20 Jump to: Chapter 22 →