Leviticus 10

nyankole

← Chapter 9 Jump to: Chapter 11 →

1Mbwenu Nadabu na Abiihu batabani ba Arooni, buri omwe akatwara ekyoterero kye, yaakitaho amakara garikwotsya, yaagamemeereraho obubaani, baayoterera Nyakubaho n'omuriro gurikuzira ogu atarabaragiire.

2Mpaho omuriro gwatimbira ahi Nyakubaho ari, gwabootsya, baafeera omu maisho ge.

3Musa nikwo kugambira Arooni ati: Ekyo nikyo Nyakubaho yaagambire ati: ndyayeyoreka omu bandi haihi ku ndi Orikwera; haza mpeebwe ekitiinwa omu maisho g'abantu boona. Arooni atyo ahunama.

4Musa ayeta Mishaeli na Elizafani, batabani ba Uzieli ishento Arooni; abagira ati: Ni mwirire haihi, mwihe emitumbi ya beene waanyu omu maisho gw'Omwanya Ogurikwera, mugitware aheeru y'orusiisira.

5Nabo bairira haihi bagikiririza omu myenda yaayo, bagishohoza aheeru y'orusiisira, nk'oku Musa yaaragiira.

6Reero Musa agira Arooni n'abatabani Eleazaari na Itamaari ati: Mutazingurura eishokye ry'aha mitwe yaanyu, kandi mutataagura ebijwaro byanyu mutakaafa, n'ekiniga kya Nyakubaho kikajuumikira eihanga ryona; kureka murekye beene waanyu ab'eihanga ryona erya Isiraeli bacurire abaitwa omuriro gwa Nyakubaho.

7Kandi mutashohora kurenga aha muryango gw'eihema ry'okubugabuganiramu mukafa, ahabw'okuba amajuta ga Nyakubaho agu musiigirwe gakibariho. Nabo baatwaza nk'oku Musa yaagamba.

8Nyakubaho akagambira Arooni naamugira ati:

9Mutarinywa viino nari eky'okunywa ky'amakuuta, iwe na batabani baawe mwaba nimuza omu ihema ry'okubugabuganiramu, mutakaafa. Haza ekyo kibe ekiragiro ekibateereirweho ebiro byona omu nzaaro zaanyu zoona,

10mubone kutaanisa ekirikwera n'ekitarikwera, ekirikuzira n'ekitarikuzira.

11Kandi mwegyese Abaisiraeli ebyatairweho byona, ebi Nyakubaho yaabagambiire naabatumaho Musa.

12Musa akagambira Arooni na Eleazaari na Itamaari abatabani abaatsigaireho ati: Mutware esaano etsigaire aha bitoijeirwe Nyakubaho byokiibwe omuriro, mugiriire aha rubaju rw'eitambiro etatumbisiibwe; ahabw'okuba n'erikwerera kimwe.

13Mugiriire omu Mwanya Ogurikwera, ahabw'okuba n'omugabo gwanyu n'abaana baanyu, ogwihirwe aha bitoijeirwe Nyakubaho ebicwekyeize omu muriro. Naanye nikwo ndagiirwe ntyo.

14Kwonka enkoro ezongazongiibwe, n'ekivune ekitoizirwe, imwe na batabani baanyu na bahara baanyu mubiriire omu mwanya oguboneire. Ahabw'okuba bibahairwe kuba omugabo gwanyu n'ogwa batabani baanyu nibiihwa aha bitambo by'okurya kumwe ebitoizirwe Abaisiraeli.

15Ekivune ekitoizirwe n'enkoro ezongazongiibwe bagume babireete hamwe n'ebitambo by'ebishaju by'okucwetsya bibone kuzongazongibwa biri ekitambo ekizongazongiibwe omu maisho ga Nyakubaho. Haza bigume bibe ebyanyu na batabani baanyu, biri omugabo gw'ebiro byona, nk'oku Mukama aragiire.

16Bwanyima Musa akateeraho munonga kubuuririza eby'embuzi y'empongano y'ekibi, yaashanga bagyokyeize kimwe! Yaagwerwa kubi Eleazaari na Itamaari beene Arooni abaatsigaireho, naabajuukirira ati:

17Ahabw'enki mutaariira mpongano y'ekibi omu Mwanya Ogurikwera, haza kiri ekintu kirikwerera kimwe; kandi kyabahairwe ngu mubone kwemera ekibi ky'abantu b'eihanga, n'okubakarabira omu maisho ga Nyakubaho?

18Reeba eshagama yaayo tiyaatwarwa ndugu y'Omwanya Ogurikwera.

19Arooni nawe agarukamu Musa ati: Manya eri izooba baatamba ekitambo kyabo ky'okuhongyerera ekibi n'ekitambo kyabo eky'okucwekyeza omu maisho ga Nyakubaho. Mbwenu eki kyangwaho! Eri izooba kuri naarya empongano y'ekibi Nyakubaho yaaba naakisiima?

20Ekyo Musa ku yaakihuriire, yaatuuza.

← Chapter 9 Jump to: Chapter 11 →