Leviticus 11

nyankole

← Chapter 10 Jump to: Chapter 12 →

1Kandi Nyakubaho akagambira Musa na Arooni ati:

2Mugambire Abaisiraeli muti: Ebi nibyo bintu ebiine amagara, ebi murikwikirizibwa kurya omu nyamaishwa zoona eziri omu nsi.

3Nimwikirizibwa kurya enyamaishwa zoona ezaatsizemu ebinono, eziine ebyara bibiri kandi ezirikwekuuma.

4Kwonka omu zirikwekuuma nari ezaatsizemu ebinono, mutarirya ezi: engamira: ahabw'okuba eyekuuma, kwonka teyatsizemu byara. Egyo ahariimwe neezira.

5Taho endirira, ahabw'okuba eyekuuma, kwonka teyatsizemu byara. Ahariimwe neezira.

6Kandi n'akame, ahabw'okuba nako keekuuma kwonka tikaatsizemu byara. Ahariimwe nikazira.

7Taho empunu; yo eyatsizemu ebyara, kandi eine ebigyere by'ebyara bibiri, kwonka teyekuuma. Nayo ahariimwe neezira.

8Mutarirya enyama yaazo, kandi mutarikora aha mitumbi yaazo. Ahariimwe neezira.

9Ahari byona ebituura omu maizi, ebi nibyo murikwikirizibwa kurya; kyona eky'omu maizi ekiine amapapa n'engamba; yaaba bya mu mayanja nari eby'omu migyera, nimwikirizibwa kubirya.

10Kwonka ekintu kyona eky'omu mayanja nari eky'omu migyera, ekitaine mapapa na ngamba, eky'ebituura omu maizi ebikye n'ebihango kibe ekirikuzira ahariimwe.

11Bigume biri ebirikuzira ahariimwe. Mutarirya enyama zaabyo, kandi emitumbi yaabyo mugume muginagye.

12Kyona eky'omu maizi ekitaine mapapa na ngamba, kigume kibe ekirikuzira ahariimwe.

13Reero omu nyonyi, ezi nizo muraagume nimuzira. Zitaririibwa, ahabw'okuba nizizira. Nizo ezi:

14Eishamba, empungu mareere, kanyamushungushungu, ekyanira, n'ezindi mpungu z'emiringo ya nyakabaka.

15Ekyeetwa ekikoona kyona;

16maaya, ekishoma-bwire, kaamunywa-maizi, akaca n'oruganda rwako;

17ekihihizi, ekiyoyo, enyawaawa,

18enkoko y'omu maizi, ebishaayaaya, ebihuhura-bahuta,

19enkongoro, oruyongoyongo n'ez'oruganda rwarwo, enkooherwa, n'orubaka.

20Ebikooko by'amapapa byona ebirikugyendesa amaguru ana, ahariimwe nibizira.

21Kwonka omu by'amapapa ebirikugyendesa amaguru ana, nimwikirizibwa kurya ebiine amaguru aha bigyere byabyo, agu bitenteberezesa aha itaka.

22Omuribyo nimwikirizibwa kurya ebi: Enzigye n'eby'oruganda rwazo, ebiharara n'eby'oruganda rwabyo, ebijere n'oruganda rwabyo, n'eseenene n'oruganda rwazo.

23Kwonka ebindi bikooko byona ebiine amapapa kandi eby'amaguru ana, bibe ebirikuzira ahariimwe.

24Enyamaishwa ezo ziryabareetera kuba abahagaire, weena orikora aha mutumbi gwazo aryaba ohagaire okuhitsya omu mwabazyo.

25Kandi weena oryekorera ekihinju ky'omutumbi gwazo, ayozye ebijwaro bye, agume ari otashemeire okuhitsya omu mwabazyo.

26Enyamaishwa yoona eyatsizemu ebinono, kwonka etaine byara byebaganiisemu, kandi etarikwekuuma, egume eri erikuzira ahariimwe. Weena orizikoraho aryaba ohagaire.

27N'enyamaishwa zoona ezigyendesa ebiganja, ez'amaguru ana, ahariimwe nizizira; weena orikora aha mutumbi gwazo, aryaba ohagaire okuhitsya omu mwabazyo.

28Kandi weena oryekorera omutumbi gwazo, ayozye ebijwaro bye, agume ari otashemeire okuhitsya omu mwabazyo. Ebyo n'ebirikuzira ahariimwe.

29Kandi eby'omu birikwegyendesa aha itaka nibyajuza enda, ahariimwe nabyo nibizira; emikorwa, embeba, entsigira-muteete n'oruganda rwayo,

30ekihangare, engamba, ekinya, n'akanyarugondo n'enyaruju.

31Omu bintu byona ebirikwajuza enda ebyo nimubizira. Weena oribikoraho bifiire abe ohagaire okuhitsya omu mwabazyo.

32Ekintu eki birigwera bifiire, kiryahagara, nobu kyakuba kiri ekiti, ekijwaro, oruhu, ekiguniya nari ekintu kyona ekirikukoresibwa. Ekyo kintu kijabikwe omu maizi okuhitsya omu mwabazyo kibone kuba ekishemeire.

33Kimwe omuribyo ku kirigwa omu rwabya rw'eibumba, kyona ekirurimu kiryaba ekihagaire, kandi orwo rwabya murwate.

34Ekyokurya kyona ekiriibwa, ku kirishukwaho amaizi gaaruga omuri orwo rwabya, kiryahagara. Neky'okunywa kyona ekirinywerwa aha rwabya nk'orwe, kiryahagara.

35Ekintu kyona ekirigwerwa ekihinju ky'omutumbi, kiryaba ekihagaire, yaaba nyungu eteeka yaaba mahega, kyatagurwe, ahabw'okuba kiryaba ekihagaire kandi ekirikuzira ahariimwe.

36Enshuro n'ekiziba ekirimu amaizi, nobu byo biriguma bitasiisikaire, kwonka ekirikora aha mutumbi gw'ebyo bintu kiryaba ekisiisikaire.

37Kandi ekihinju ky'omutumbi gwabyo ku kirigwa aha mbibo y'okubibwa, egyo mbibo eryaguma eshemeire.

38Kwonka ku eriba etumbikirwe omu maizi, ekihinju kyona eky'omuntumbi ku kirigigwera, biri yaaba esiisikaire ahariimwe.

39N'enyamaishwa ei murikwikirizibwa kurya ku erifa, orikora aha mutumbi gwayo aryaba ohagaire okuhitsya omu mwabazyo.

40Kandi orirya enyama y'omutumbi gwayo, ayozye ebijwaro bye, haza agume ari otashemeire okuhitsya omu mwabazyo. N'oryekorera ogwo mutumbi, ayozye ebijwaro bye, abe otashemeire okuhitsya omu mwabazyo.

41Ekintu kyona eky'amaguru ana ekirikwajuza enda n'ekirikuzira, kitaririibwa.

42Kyona ekirikugyendesa amaguru ana, nari ekiine amaguru maingi, ebintu byona ebirikugyendesa enda n'amaguru ana aha itaka, mutaribirya, ahabw'okuba nibizira.

43Mutaryehagazisa ekintu kirikugyendesa enda, kandi mutaribyesiisisa mukasiisikara.

44Manya ndi Mukama Ruhanga waanyu. N'ahabw'ekyo mweyeze, mube abarikwera nk'oku ndi Orikwera. Mutaryehagazisa ekintu ekirikugyendesa amaguru ana nikyekurura aha itaka.

45Manya ndi Mukama owaabareetsire nimbaiha omu nsi ya Misiri, ngu mbe Ruhanga waanyu. N'ahabw'ekyo mube abarikwera ahabw'okuba ndi Orikwera.

46Eryo niryo iteeka erikwatiraine n'enyamaishwa n'enyonyi n'ekihangirwe kyona ekiine amagara, ekirikugyendera omu maizi, n'ekirikugyendesa enda aha itaka;

47ery'okutaanisa ebirikuzira n'ebitarikuzira, hamwe n'ebihangirwe ebiine amagara ebirikwikirizibwa kuriibwa n'ebirikuzira.

← Chapter 10 Jump to: Chapter 12 →