Leviticus 20

nyankole

← Chapter 19 Jump to: Chapter 21 →

1Nyakubaho akagira Musa ati:

2Gambira Abaisiraeli oti: Omuntu weena ow'omu Baisiraeli nari ow'omu banyamahanga abaashuuhuukiire omu Baisiraeli, orihongyera Moleki omwe omu baana be, aitwe; abantu b'omuri egyo nsi bamuteere amabaare.

3Nyowe ogwo muntu ndyamuta omu kaso mmucwe omu bantu b'eihanga rye: ahabw'okwiha omwana omu baana be, akamuhongyera Moleki, akahagaza Omwanya gwangye Ogurikwera, kandi akajumisa eiziina ryangye eririkwera.

4Haza abantu b'omuri egyo nsi ku baryehuzya ogwo muntu owaahongyera Moleki omwana we, bataamwita,

5nyowe ndyamuta omu kaso n'ab'eka ye, mbacwe omu b'eihanga ryabo, we na boona abarikumukuratira kuhampuka na Moleki.

6Omuntu ku ariza omu bafumu n'abarogi kuhampuka nabo, ndyamuta omu kaso mmucwe omu bantu b'eihanga rye.

7Mbwenu nu mweyeze, mube abarikwera, ahabw'okuba ndi Mukama Ruhanga waanyu.

8Murinde ebi naatairebo, haza mubikore. Niinye Nyakubaho obeeza.

9Manya weena orikyeena ishe nari nyina aitwe, ahabw'okuba owaakyeena ishe nari nyinya niwe aba ari ow'okwitwa.

10Omuntu ku arishambana na muka mutaahi we, bombi kishambanisa na kishambanisibwa baitwe.

11Oribyama na muka ishe, biri ajwekire ishe busha, bombi baitwe; eshagama yaabo ebatukurire.

12Omushaija oribyama n'omukaamwana, bombi baitwe, ahabw'okuba nibaba bakozire ekirikuzira, eshagama yaabo ebatukurire.

13Omushaija ku aribyama n'omushaija nk'omukazi, bombi baryaba bakozire ekitakorwa, baitwe; eshagama yaabo ebatukurire.

14Omushaija ku arishwera omukazi na nyina kiryaba kiri ekibi kirikuhemura. We nabo bookibwe omu muriro, harekye kubaho okukora ebihagaro omuriimwe.

15Omushaija ku aribyama n'enyamaishwa, aitwe kandi n'egyo nyamaishwa mugiite.

16Omukazi ku arihikaana n'enyamaishwa, yaabyama nayo, ogwo mukazi n'egyo nyamaishwa mubiite bife, eshagama yaabyo ebitukurire.

17Omuntu ku arishwera munyaanya wa ishe nari wa nyina, baareebana enjuuro, n'ekihemu, bacuubwe omu baabo. Ahabw'okujweka munyaanya busha, kiryamutukurira.

18Omushaija ku aribyama n'omukazi ori omu kwezi, yaamujweka busha, biri ayerwire ah'eshagama ye erikuruga; n'omukazi nawe naaba ayeyerwire, bombi bacuubwe omu baabo.

19Otaribyama na nyokwento nari shwenkazi. Okukora ekintu nk'ekyo nikwo kujweka busha ow'obuzaare bw'ahaihi. Ekibi kyabo kiryabatukurira.

20Omushaija ku aribyama na muka ishento, biri ajwekire ishento busha; ekibi kyabo kiryabatukurira, bafe bucwekye.

21Omushaija ku arishwera muka mwene ishe, kiryaba ekihagaro, ahabw'okuba aryaba ajwekire mwene ishe busha. Baryafa bucwekye.

22N'ahabw'ekyo mugume mukuratire byona ebi naataireho, na byona ebi naaragiire kandi mubikore, ensi ei ndikubatwara kutuuramu etakaabatanaka.

23Kandi mutaritooreza emicwe y'eihanga eri naaza kubinga, ahabw'okuba ebyo byona nibyo naakozire, bikandeetera okubatamwa.

24Kwonka imwe nkabagira nti: Muryahungura ensi yaabo, ngibahe ebe eyaanyu; ensi erikuhimintuka amate n'obwoki. Niinye Mukama Ruhanga waanyu, owaabataaniise n'agandi mahanga.

25N'ahabw'ekyo mumanye omutaano gw'enyamaishwa ezirikuzira n'ezitarikuzira; n'ogw'enyonyi ezirikuzira n'ezitarikuzira; haza murekye kwesiisisa enyamaishwa nari enyonyi, nainga ekintu ekirikugyendesa enda aha itaka, ebi naabashoroororoire kuguma nimubizira.

26Mugume mube abarikwera, ahabw'okuba Nyowe Nyakubaho mba Orikwera, kandi nkabataanisa n'agandi mahanga, ngu mubone kuba abangye.

27Omushaija nari omukazi oriba omufumu orikuragura abazimu, nari orikuroga, ateerwe amabaare afe, eshagama ye ebe niwe yaatukurira.

← Chapter 19 Jump to: Chapter 21 →