Leviticus 3

nyankole

← Chapter 2 Jump to: Chapter 4 →

1Omutoijo gw'omuntu ku guriba guri ekitambo ky'okurya kumwe yaatoija enyamaishwa erikuruga omu busyo, enimi nari enyana, aryagitoijera Nyakubaho etaine kamogo.

2Ate omukono gwe aha mutwe gw'eki yaatoija, akiitire aha muryango gw'eihema ry'okubugabuganiramu. Reero abahongyerezi beene Arooni bamiisiire eitambiro eshagama okuryehinguririza.

3Kandi ahari ekyo kitambo ky'okurya kumwe aryaihaho eky'okutoijera Nyakubaho ekyokize. Aryatoija ebishaju ebishwekire enyama z'omunda.

4Aiheho n'entsigo zombi n'ebishaju byazo ebiri aha mugongo, n'enyama ez'akashaabo eziri aha kine.

5Mpaho beene Arooni babyokyeze aha itambiro eririho ekitambo ky'okucwetsya ekiri aha nku ezitungikirwe aha muriro, kibe ekitambo ekyokize eki ekisooroora kyakyo kiraagwise gye Nyakubaho.

6Omutoijo gwe ku guriba guri ekitambo ky'okurya kumwe eky'okutoijera Nyakubaho, guri enyamaishwa eihirwe omu busyo bw'entaama nari bw'embuzi, guri empaya nari omwagazi, agutoije gutaine kamogo.

7Ku aritoija omwana gw'entaama kuba ekitambo kye, obwo agutoije omu maisho ga Nyakubaho;

8naata omukono gwe aha mutwe gw'eki yaatoija, kandi naakiitira omu maisho g'eihema ry'okubugabuganiramu; na beene Arooni bamiisiire eitambiro eshagama, okuryehinguririza.

9Reero ahari ekyo kitambo ky'okurya kumwe eky'okutoijera Nyakubaho kyokize, aiheho enyama z'ebishaju, n'omukira gwayo gwona gw'ebishaju, agukuuriraine n'engugye, n'ebishaju ebishwekire enyama z'omunda, n'ebiziriho byona.

10Aiheho n'entsigo zombi n'ebishaju byazo ebiri aha mugongo, n'enyama z'akashaabo ez'aha kine.

11Reero omuhongyerezi abyokyeze aha itambiro, bibe ebyokurya byokize ebitoijeirwe Nyakubaho.

12Omutoijo gwe ku guriba guri embuzi, agutoijere Nyakubaho.

13Ate omukono gwe aha mutwe gwayo, kandi agwitire omu maisho g'eihema ry'okubugabuganiramu; na beene Arooni bamiisiire eitambiro eshagama okuryehinguririza.

14Haza ahari ekyo kitambo kye ky'okutoijera Nyakubaho kyokize, aiheho ebishaju ebishwekire enyama z'omunda, n'ebiziriho byona.

15Aiheho n'entsigo zombi n'ebishaju byazo, n'eby'aha mugongo, n'enyama z'akashaabo ez'aha kine.

16Omuhongyerezi abyokyeze aha itambiro, bibe egabo etoizirwe eyokize eine ekisooroora kirikugwisa gye. Enyama ez'ebishaju zoona n'eza Nyakubaho.

17Kiryaguma kiri ekiragiro ekitairweho eky'ebiro byona omu nzaaro zaanyu zoona n'omu maka gaanyu goona imwe okutarya bishaju nobu yaakuba eshagama.

← Chapter 2 Jump to: Chapter 4 →