Leviticus 12

nyankole

← Chapter 11 Jump to: Chapter 13 →

1Nyakubaho akagambira Musa ati:

2Gambira Abaisiraeli oti: Omukazi ku arigira enda, yaazaara omwojo, obwo aryamara ebiro mushanju ari otashemeire. Nk'oku aba ari omu kwezi, abe nikwo yaaguma ari otashemeire.

3Reero aha kiro kya munaana, omwana asharweho ekikoba ky'omubiri gwe.

4Bwanyima ogwo mukazi amare ebiro makumi ashatu na bishatu by'okwezibwa kw'eshagama ye y'ekizaire; atariikirizibwa kukora aha kintu kyona ekirikwera, nobu kwakuba okutaaha omu Mwanya Ogurikwera, okuhitsya obu ariba oshemeire.

5Kwonka ku arizaara omwishiki, obwo aryamara wiiki ibiri ari otashemeire, nk'obu aba ari omu kwezi; bwanyima agumizemu okumara ebiro makumi mukaaga na mukaaga ari omu kwezibwa kw'eshagama ye ey'ekizaire.

6Ebiro by'okwezibwa kwe ku birihwa, yaaba by'omwojo nari by'omwishiki, aryareetera omuhongyerezi omwana gw'entaama oguhikize omwaka guzairwe, kuba ekitambo ky'okucwetsya; kandi n'enkombe nto nari eriiba, kuba empongano y'ekibi; abimushangise aha muryango gw'eihema ry'okubugabuganiramu.

7Mpaho omuhongyerezi abihongyere Nyakubaho, kandi akarabire ogwo mukazi, abone kwezibwa ahabw'eshagama ye eyaamurugiremu. Eryo niryo iteeka ry'omukazi orizaara omwana yaaba mwojo yaaba mwishiki.

8Ku ariremwa kutunga omwana gw'entaama, areete amaiba abiri nari enkombe ibiri nto: emwe ebe ey'ekitambo ky'okucwetsya, endi ebe empongano y'ekibi. Mpaho omuhongyerezi amukarabire, n'onu abone kwezibwa.

← Chapter 11 Jump to: Chapter 13 →