1 Chronicles 29

Quechuan QXO (Biblia en Quechua del sur de Conchucos)

← Chapter 28 Jump to:

1Tsaypitanam tsaychö qorikashqa kaykaq Israel runakunata rey David nirqan: «Rey kananpä tsurï Salomónta Tayta Dios akrashqa kaptinpis payqa jövinllarämi. Tsaynöllam shäritsinanpä kaq templuqa runapa wayintsu kanqa, sinöqa Tayta Diospa wayinmi.

2Tsaymi sirvinqä Tayta Diospa templunta tsurï shäritsinanpä puëdinqäpita alistarqü qorita, qellayta, broncita, fiërruta y qerukunata. Tsaynöllam ónice rumikunata, tukuy casta kuyayllapä rumikunata y tsaytsika marmolta alistarqü.

3«Tsaynöllam sirvinqä Tayta Diospa templunta imanöpapis ruratsiyta munar tsay jananmanpis kikïpa kaqta qorita y qellayta churarqü.

4Churanqä qorim pachak waranqa (100,000) kïlu Ofirpita allin kaq qori. Churanqä yuraq qellaymi ishkay pachak kimsa chunka puwaq waranqa (230,000) kïlu. Tsay qellayqa kanqa templu pirqata enchapatsinanpämi.

5Tsaynöllam tsay qoripita y qellaypita yachaq runakuna templupa adornunkunata rurayanqa. Kananqa Tayta Diospa templunta shäritsinantsikpä qamkunapis kanqanpita churayämuy».

6Tsaynö niptinmi cada castapa y cada trïbupa mandaqninkuna, waranqa (1,000) soldädukunapa capitanninkuna, pachak (100) soldädukunapa capitanninkuna y David arutsinqan runakunapa capatazninkunapis apayämunanpä kushishqa awniyarqan.

7Tsay templuta shäritsinanpämi apayarqan pachak joqta chunka pitsqa waranqa (165,000) kïlu qorita, chunka waranqa (10,000) qoripita rurashqa qellayta, kimsa pachak kimsa chunka waranqa (330,000) kïlu yuraq qellayta, joqta pachak waranqa (600,000) kïlu broncita y kimsa millón kimsa pachak waranqa (3,300,000) kïlu fiërrutapis.

8Tsaynöllam tesorëruta entregayarqan tsaytsika kuyayllapä rumikunata. Tesorëruqa karqan Gersónpita miraq Jehielmi.

9Tayta Diospa templunta shäritsiyänanpä llapan voluntäninkunawan aparmi runakuna pasaypa kushikuyarqan. Tsaynöllam rey Davidpis pasaypa kushikurqan.

10Tsaymi llapan runakunapa puntanchö Tayta Diosta adorar David nirqan: «¡Israel yärakunqan Tayta Dios, imayyaqpis alabashqa kaykullay!

11Tayta Dios, qam japallaykim llapanpä poderösu kanki. Japallaykim alabashqa kanaykipä kanki. Llapan contraykikunatam vincinki. Llapanpitapis mas respitashqam kanki. Ciëlupis, kay patsapis y llapan imaykapis qampam kaykan. Qampa podernikichömi imaykapis kaykan. Llapanpita mas poderösu kaptikim qamta alabayä.

12«Qam yanapaptikim runakuna rïcuyäyan. Qam yanapaptikim respitashqapis kayan. Qammi llapanta mandanki. Kallpayuq kaypis y poderyuq kaypis qampitam kaykan. Respitashqa kananpä y poderösu kananpäpis qammi runakunata yanapanki.

13Tayta Diosllä, tsaypitam qamta agradëcikur kushishqa alabayä.

14«Taytay, templuykita shäritsiyänäpä llapan apayämunqäpis qampita bendicionta chaskiyanqallämi kaykan. Tsaymi noqapis y mandanqä runakunapis merëciyätsu apayämunqäkunata chaskiyämänaykipä.

15Unay castäkuna qorpalla kayanqannömi noqakunapis kay patsachö qorpalla kaykäyä. Imayka llantuynömi ushakaqlla kaykäyä.

16Tayta Diosllä, templuykita shäritsiyänäpä apayämunqäpis qampita chaskiyanqallämi kaykan.

17«Tayta Diosllä, musyankim shonqunchö runa imata yarpanqantapis. Pipis munanqaykinö kawaptinqa kushikunkim. Tsaymi noqapis templuykipä llapan shonqüwan apamurqü. Tsaynöllam kuyanqayki runakuna llapan shonqunkunawan apayämunqanta rikar kushikü.

18Unay castäkuna Abraham, Isaac y Israel yärakuyanqan Tayta Dios, imaypis yanapaykayällämay llapan shonqükunawan qam munanqaykinö kawayänäpä.

19Tsurï Salomóntapis tantiyaykatsillay mandamientuykikunata, yachatsikuynikikunata y leynikikunata llapan shonqunwan imaypis cäsunanpä. Alistanqäkunawan templuykita shumaq shäritsinanpä yanapaykullay».

20Tayta Diosta mañakuskirmi runakunata David nirqan: «Llapaykikuna Tayta Diosnintsikta alabayay». Tsaynö niptinmi unay castankuna yärakuyanqan Tayta Diospa puntanman y reypa puntanman llapan qonquriykur alabayarqan.

21Tsaypita waraynin junaqnam waranqa (1,000) torïtuta, waranqa carnërukunata y waranqa carnishkunata pishtaskir rupatsina sacrificiukunata rupatsiyarqan. Tsaynöllam wakin sacrificiukunatapis rupatsir jananman vïnutapis wiñayarqan. Tsay sacrificiukunatam llapan Israel runakunapa jutinchö rupatsiyarqan.

22Tsay junaqmi Tayta Diospa puntanchö kushishqa mikuyarqan upuyarqan. Tsaypitam Tayta Diospa puntanchö Davidpa tsurin Salomónpa umanman aceitita wiñarqan rey kananpä. Tsaywanqa ishkay kutinam rey kananpä umanman aceitita wiñarqan. Tsaynöllam Sadoctapis mandaq sacerdöti kananpä aceitita wiñaparqan.

23Tsaynöpam Salomónta Tayta Dios churarqan papänin Davidpa trokin Israel runakunapa mandaqnin rey kananpä. Rey kar llapan ruranqanpis alli kaptinmi Israel runakuna llapanpis payta respitar cäsuyarqan.

24Tsaynöllam mandaq runakuna, soldädukuna y Davidpa tsurinkunapis rey Salomónta kushishqa chaskiyarqan.

25Salomónta llapanchöpis Tayta Dios yanapanqantam Israel runakuna tantiyayarqan. Tsaynö yanapaptinmi punta reykunapitapis mas poderösu karqan.

26Llapan Israel runakunapa mandaqnin reymi Isaípa tsurin David karqan.

27Puntataqa Hebrón markachömi qanchis wata rey karqan. Tsaypitanam Jerusalénchöpis kimsa chunka kimsa (33) wata rey karqan. Tsaymi Israel runakunapa mandaqnin rey karqan chusku chunka (40) wata.

28Davidqa pasaypa rukunam wanukurqan. Payqa rïcum karqan y pïmaypitapis respitashqam karqan. Paypa trokinnam tsurin Salomónna rey karqan.

29Rey David llapan ruranqanpis qallanqanpita ushanqanyaqmi qellqashqa kaykan profëta Samuel qellqanqanchö, profëta Natán qellqanqanchö y profëta Gad qellqanqanchö.

30Tsaychömi qellqashqa kaykan imanö mandanqanpis, poderösu kanqanpis, ima päsanqanpis, Israel nación imanö kanqanpis y wakin nacionkuna imanö kanqanpis.

← Chapter 28 Jump to: