1 Chronicles 5

Quechuan QXO (Biblia en Quechua del sur de Conchucos)

← Chapter 4 Jump to: Chapter 6 →

1Israelpa mayor tsurinmi karqan Rubén. Mayor karpis mädistanwan pununqanpitam mayor kay derëchunta papäninpita chaskirqantsu. Payta entregananpa rantinmi mayor kay derëchunta Josépa tsurinkunatana papänin Israel entregarqan.

2Tsay derëchuta chaskirpis manam Josépa tsurinkunatsu wakin Israel trïbukunapita mas poderyuq kayarqan, sinöqa Judá trïbu runakunam mas poderyuq kayarqan. Tsaymi Israel nacionpa mandaqnin reypis Judá trïbupita karqan.

3Israelpa mayor tsurinmi karqan Rubén. Rubénpa tsurinkunam kayarqan Hanoc, Falú, Hezrón y Carmi.

4Joelpa tsurinmi karqan Semaías. Semaíaspa tsurinmi karqan Gog. Qoqpa tsurinmi karqan Simei.

5Simeipa tsurinmi karqan Micaía. Micaíapa tsurinmi karqan Reaía. Reaíapa tsurinmi karqan Baal.

6Baalpa tsurinmi karqan Beera. Beeram karqan Rubén trïbu runakunapa mandaqnin. Tsay witsanmi Asiria nacionpa mandaqnin Tiglat-pileser paykunata prësu apakurqan.

7Beerapita miraqkunapa jutinkunam castanpa castanpa kaynö qellqashqa kaykan: Jeiel (Jeielqa mas mandaqmi karqan), Zacarías

8y Bela. Belaqa Azazpa tsurinmi karqan. Azazqa Semapa tsurinmi karqan. Semanam karqan Joelpa tsurin. Rubén trïbu runakunam täyarqan Aroer partipita hasta Nebo markayaq y tsaypita hasta Baal-meónpa lindërunyaq.

9Galaad partichö tsaytsikaman ashmankuna mirashqa kaptinmi rupay yarqamunan kaq lädupapis Rubén trïbu runakuna täyänanpä aywayarqan. Tsaymi tsaychöpis täyarqan hasta desiertu qallanqanyaq. Tsay desiertuqa hasta Éufrates mayuyaqmi chan.

10Saúl rey kanqan witsanmi Rubén trïbu runakunaqa agareno runakunata atacayarqan. Agareno runakunaqa Galaad parti rupay yarqamunan kaq läduchömi täyarqan. Paykunata vinciskirmi agareno runakunapa markankunachö Rubén trïbu runakuna täyarqan.

11Rubén trïbu runakuna täyanqan lädunchömi Gad trïbu runakunapis täyarqan. Paykunam Basán partichö täyarqan hasta Salca partiyaq.

12Basánchöqa Joelmi mandaq karqan. Joelta mandar yanapaqnin runam Safán karqan. Safánta mandar yanapaqnin runam karqan Jaanai. Jaanaita mandar yanapaqnin runam karqan Safat.

13Paykunapa wakin trïbu mayinkunam mandayarqan Gad trïbuchö kaykaq qanchis castakunata. Tsay mandaqkunam karqan Micael, Mesulam, Seba, Jorai, Jacán, Zía y Heber.

14Tsay qanchis mandaqkunam kayarqan Abihailpita miraqkuna. Abihailqa Huripa tsurinmi karqan. Hurinam Jaroapa tsurin karqan. Jaroam karqan Galaadpa tsurin. Galaadmi karqan Micaelpa tsurin. Micaelmi karqan Jesisaipa tsurin. Jesisaim karqan Jahdupa tsurin. Jahdum karqan Buzpa tsurin.

15Ahími karqan Abdielpa tsurin y Gunipa willkan. Paymi karqan llapan Gad castakunapa mandaqnin.

16Gad trïbu runakunam täyarqan Galaad partichö, Basán partichö kaykaq markakunachö y Sarón partichö kaykaq ashma mitsikuyänankunachö.

17Llapan tsay jutikunatam acta libruman qellqarqan Judá nacionpa mandaqnin rey Jotam kaykaptin. Tsaynöllam tsay witsan Israel nacionpa mandaqnin rey kaykarqan Jeroboam.

18Rubén trïbu, Gad trïbu y pullan Manasés trïbupitam pelyay yachaq kayarqan chusku chunka chusku waranqa qanchis pachak joqta chunka (44,760) runakuna. Paykunam espädata, escüduta y flëchatapis guërraman aywar shumaq manijayta yachayaq.

19Tsaymi guërrata rurayarqan agareno runakunawan. Agareno runakunatam yanapayarqan Jetur runakuna, Nafis runakuna y Nodab runakuna.

20Pullan guërrachö kaykarmi Rubén trïbu, Gad trïbu y pullan Manasés trïbu runakunaqa Tayta Diosta mañakuyarqan yanapananpä. Tsaynö yärakur mañakuyaptinmi paykunata Tayta Dios yanaparqan. Tsaymi agareno runakunata y yanapaqnin runakunatapis llapanta vinciyarqan.

21Tsaynö vinciskirmi paykunapa ashmankunata apayarqan pitsqa chunka waranqa (50,000) camëllukunata, ishkay pachak pitsqa chunka waranqa (250,000) üshakunata y ishkay waranqa (2,000) ashnukunata. Tsaynöllam prësu apayarqan pachak waranqa (100,000) runakunatapis.

22Tayta Dios yanapaptinmi tsay guërrachö tsaytsika contran runakunata wanutsiyarqan. Tsaypitam Rubén trïbu runakuna, Gad trïbu runakuna y pullan Manasés trïbu runakunaqa agareno runakuna täyanqanchö täkuyarqan Babiloniaman prësu apayanqanyaq.

23Pullan Manasés trïbu runakuna alläpa mirarmi Basánpita hasta Baal-hermónyaq y Senirpita hasta Hermón jirkayaq täyarqan.

24Tsay pullan Manasés trïbu castakunapa mandaqninkunam kayarqan Efer, Isi, Eliel, Azriel, Jeremías, Hodavías y Jahdiel. Paykunaqa llapanpis valienti jövin y maytsaychöpis reqishqam kayarqan.

25Rubén trïbu, Gad trïbu y pullan Manasés trïbu runakunaqa unay castankuna adorayanqan Tayta Diosta cäsuyänanpa rantinmi juk dioskunatana adorayarqan. Tsay dioskunaqa kayarqan Tayta Dios ushakätsinqan jäpa runakuna adorayanqan dioskunam.

26Tsay dioskunata adorayaptinmi Israel runakunata kuyaq Tayta Dios pasaypa rabyanar Asiria nacionpa mandaqnin Pul jutiyuq Tiglat-pileserta animatsirqan paykunata atacar prësu apayänanpä. Tsaymi wakinta apayarqan Halahman, wakinta Haborman, wakinta Haraman y wakintana Gozán mayu lädunman. Tsaychömi paykuna hasta kananyaqpis taykäyan.

← Chapter 4 Jump to: Chapter 6 →