Daniel 11 — Quechuan QXO (Biblia en Quechua del sur de Conchucos)

1Mastam lïnu röpashqa runa nimarqan: «Media nacionpita rey Darío juk watana mandanqan witsanpis noqam ángel Miguelta yanapar mas valuratsirqä.

2«Kanan willashayki imapis päsananpä kaqkunata. Persia nacionchömi kanqa kimsa reykuna. Paykunapa qepanmanpis mas juk reyrämi kanqa. Tsay reymi kimsa kaq reykunapitapis mas rïcu kanqa. Rïcu munayyuq karmi llapan mandanqan nacionkunawan Grecia nacionpa contran shäriyanqa.

3«Tsaypitanam mas munayyuq rey kanqa. Paymi maytsay nacionkunata vinciskir poderninchö tsararanqa.

4Tsaynöpam atska nacionkunata jukllaylla kananpä qorinqa. Tsaypitanam chusku nacionman rakikanqa. Juk kanqa norti kaq lädupa, juk kanqa sur kaq lädupa, juk kanqa rupay yarqamunan kaq lädupa y juk kanqa rupay ullunan kaq lädupa. «Tsay reypa trokin manam paypita miraqkunatsu mandakuq kayanqa, sinöqa jäpa runakunam. Paykunaqa manam punta kaq rey poderyuq kanqannönatsu kayanqa.

5Tsaynö kaykaptinpis Egipto nacionpa mandaqnin reymi poderyuq kanqa. Peru paypa soldädunkunapa capitanninmi mas poderyuq kar atska markakunatapis poderninchö tsararanqa.

6«Tsaypita atska watakuna päsaskiptinnam Egipto nacionpa mandaqnin reyqa Siria nacionpa mandaqnin reywan alli kawayänanpä jipash tsurinta paywan casaratsinqa. Tsaynö casaratsiptinmi tsay warmita traicionpita wanutsinqa wamrantinta, runantinta y cuidaq soldäduntinta.

7Tsaynö wanutsiptinmi tsay wanuq warmipa turin soldädunkunawan aywanqa Siria nacionpa mandaqnin reywan guërrata rurananpä. Murallashqa markaman yaykurmi vinciskir poderninchö katsinqa.

8Tsaypita Egiptuman kutikurmi ïdulukunata y qellaypitawan qoripita rurashqa alhäjakunata apanqa. Tsaypitaqa Siria nacionpa mandaqnin reywan atska wata manam wajupänakuyanqatsu.

9«Tsaypitanam Siria nacionpa mandaqnin rey aywar Egipto nacionpa mandaqnin reyta soldädunkunawan atacayanqa. Vinciyta mana puëdirmi markanman kutikunqa.

10«Peru tsurinkunam alistakuyanqa Egiptuman kutir yapay atacayänanpä. Atskaq soldädukunata qoriskirmi empëñu aywayanqa imaykatapis apaq atskayashqa mayunö. Reypa murallashqa markanman chaykurmi atacayanqa.

11Tsaymi pasaypa rabyarnin Egipto nacionpa mandaqnin rey soldädunkunawan guërrata rurananpä yarqamunqa. Atska soldäduyuq kaptinpis llapantam vincinqa.

12Llapanta vinciskirmi tsay reyqa pasaypa allish tukur contrankunata waranqa waranqapa wanutsinqa. Peru tsaynö karpis tsay reypa poderninqa pöcu tiempullam düranqa.

13«Watakuna päsaskiptinnam Siria nacionpa mandaqnin rey yapay qorinqa atska soldädukunata. Tsay soldädukunaqa mas atska y mas alli alistakushqam kayanqa. Paykunawanmi kutinqa Egipto nacionpa mandaqnin reyta atacayänanpä.

14«Tsay witsanmi Egipto nacionpa mandaqnin reypa contran atskaq shäriyanqa. Tsaynöllam achäquita ashipäkuq Israel mayikikunapis paypa contran shäriyanqa. Tsaynö shärirpis mana vinciyaptinmi revelacionchö Tayta Dios tantiyatsinqan cumplinqa.

15«Siria nacionpa mandaqnin reymi soldädunkunawan aywar murallashqa marka waqtanman allpata qoriyanqa tsaypa yaykuskir atacayänanpä. Atacaptinmi Egipto nacionpa soldädunkuna mayjina alli chölu karpis imanaytapis puëdiyanqatsu.

16Tsay atacaq soldädukunam tsay markata chipyaq ushakätsiyanqa. Tsaypitanam kuyayllapä Israel naciontapis poderninman churayanqa.

17«Tsaypitanam Siria nacionpa mandaqnin reyqa Egipto nacionta imanöpapis vinciyta munar tsay nacionpa mandaqnin reywan warmi tsurinta casaratsinqa. Tsaynö casaratsinqa warmi tsurin rikapakuskir willaptin traicionpita atacayta yarparmi. Peru tsaynö casaratsiptinpis manam yarpanqannötsu kanqa.

18«Tsaymi Siria nacionpa mandaqnin rey jukläman aywar lamar kuchunchö kaykaq atska markakunata vincinqa. Tsaypitanam juk nacionpita shamuq capitán vincinqa. Tsaymi tsay reyqa pasaypa penqakushqa quëdanqa.

19Tsaypitanam reyqa kutikunqa murallashqa markanman. Tsaychömi desgracia päsaptin wanur ushakanqa.

20«Tsay reypa trokinnam juk rey yaykunqa. Paymi mandanqan nación mas munayyuq kananta munar impuestuta cobramunanpä runata mandanqa. Peru tsay reypis guërra mana kaptinmi pöcu tiempullatana wanunqa.

21«Tsay reypa trokinmi mana alli runa llullakuypa yaykunqa rey kananpä. Tsaynö yaykunqa rey juk yaykunan kaykaptinmi.

22Tsaypitam mayu atskayar imaykatapis apaqnö contran shäriq runakunata llapanta wanutsir ushanqa. Tsaynöllam wanutsinqa Tayta Diosta sirviq mandaq sacerdötitapis.

23Tsay reyqa imaykata awnirmi y engañarmi munayyuq kanqa. Tsaynö kanqa wallkaqlla runakuna favornin kaykaptinmi.

24«Tsay runam rïcu runakuna täyanqan markakunaman soldädunkunawan illaqpita yaykuyanqa imaykankunatapis apayänanpä. Manam tsay nacionchö mayqan mandakuqpis paynö rurayta puëdishqatsu. Tsaynöllam guërrachö vincir apanqankunata yanapaqninkunata rakipanqa. Pasaypam yarpachakunqa murallashqa markakunata imanöpapis atacananpä. Tsaynö kaptinpis juk tiempullam tsaynö kanqa.

25«Tsay reyqa kallpanman yärakuykurmi Egipto nacionpa mandaqnin reyta atska soldädunkunawan atacayanqa. Tsaynö atacaptinmi Egipto nacionpa mandaqnin reyqa atska soldädukunata qoriykur pärapuyanqa. Peru tsaynö pärapurpis yärakunqan runakuna traicionaptinmi vinciyta puëdiyanqatsu.

26Mikur upur qorikäyanqan amïgunkunapis ushakänantam munayanqa. Tsay guërrachömi atskaq soldädunkuna wanuyanqa.

27«Tsaypitanam tsay ishkan reykuna jamaykur willanakurpis shonqunkunachöqa mana allita yarpäyanqa. Tsaynö kaptinpis ushakäyänanta Tayta Dios manarä munaptinmi tsay reykuna munayanqannöqa kanqatsu.

28«Siria nacionpa mandaqnin reymi guërrapita qorinqan riquëzakunata apakurkur markanman kutinqa. Markanman kutiykanqanchömi Tayta Diosta adoraqkunata atacanqa. Tsaynö yarpanqankunata ruraskirmi markanman chanqa.

29«Desgracia päsananpä höra chämuptinmi tsay reyqa Egipto nacionta yapay atacanqa. Puntata vincishqa karpis manam yapay vincinqanatsu.

30Tsaynö vincinqatsu Quitimpita soldädukuna büquinkunawan shamur atacaptinmi. «Tsaymi ima ruraytapis mana puëdir pasaypa rabyar markanman kutirnin Diosta adoraqkunata yapay atacanqa. Diosta mana adoraqkunawanmi sïqa kuyanakunqa.

31Soldädunkunam Jerusalén templuman yaykur impüruyätsiyanqa. Sacrificiuta Tayta Diospä sacerdötikuna qoyay qoyay rupatsiyänantapis manam dëjanqanatsu. Tsaypa rantinmi Tayta Dios mana munanqan kaqta templuman churanqa.

32«Yanapayänanta munarmi tsay reyqa Tayta Diosta manana cäsuqkunata imaykanöpa engañanqa. Peru Tayta Diosman yärakuqkunam sïqa mana mantsaypa payta pärapuyanqa.

33Tsaymi tantiyakuq runakuna atska runakunata yachatsiyanqa Tayta Diosta imaypis sirviyänanpä. Tsaynö kaykaptinpis wakintam espädawan wanutsiyanqa, wakintam rupatsiyanqa, wakintam prësu apayanqa y wakinpatanam imaykankunatapis qechuyanqa.

34Tsaynö ñakaykätsiyaptinmi wakin runakunaqa tsay tantiyaq runakunata yanapayanqa. Peru wakinmi sïqa janan shonqulla paykunawan qorikäyanqa.

35«Wakin tantiyakuq runakunata ñakatsiyaptinmi tantiyayanqa imanö ñakarpis Tayta Diosman yärakur jutsata mana rurar kawayänanpä. Tantiyakuqkuna tsaynö ñakayanqa hasta tiempu cumplinqanyaqmi.

36«Tsay reyqa munanqantam ruranqa. Tsaymi runa tukurnin llapan dioskunapita mas poderyuq kanqanta yarpar llapanpäpis munayyuq Tayta Diospa contran espantaypä kaqkunata parlanqa. Peru tsaynö kaptinpis Tayta Dios castiganan hörayaqllam poderyuq kanqa. Päsananpä kaqkunaqa päsanqam.

37«Tsay reyqa ima diostapis mana respitarmi cäsunqatsu unay castankuna adorayanqan dioskunata ni warmikuna adorayanqan dioskunatapis. Tsaypa rantinqa llapan dioskunapitapis mas poderyuq kanqantam yarpanqa.

38Peru tsaynö karpis unay castankuna mana adorayanqan diostam adoranqa. Tsay diosqa murallashqa markakunata cuidaq diosmi kaykan. Payta adorananpämi apanqa qorita, qellayta, kuyayllapä rumikunata y kuyayllapä adornukunata.

39«Unay castankuna mana adorayanqan diosman yärakurmi alli murallashqa poderyuq markata atacanqa. Vinciskirmi favornin shäriq runakunata churanqa atska markakunachö gobernador kayänanpä. Tsaynöllam yanapayanqanpita kushikur chakrakunatapis herencian kananpä rakipunqa.

40«Höra chämuptinnam tsay reyta Egipto nacionpa mandaqnin rey atacanqa. Tsaymi atskayashqa mayu imaykatapis apaqnö carrëtankunawan, caballun muntashqa soldädunkunawan y atska büquinkunawan atacar entëru nacionta vincinqa.

41«Tsaynöllam Israel nacionman yaykurmi atskaq runakunata wanutsinqa. Peru Edomchö y Moabchö täraq runakunam sïqa Amónchö täraq atskaq runakunawan juntu makinpita qeshpiyanqa.

42«Tsaynöllam tsay reyqa poderninman atska nacionkunata churanqa. Egipto nacionpis manam qeshpinqatsu.

43Tsaypitanam Egiptupita apanqa qorita, qellayta y llapan riquëzankunatapis. Libia nacionta y Etiopía naciontapis poderninmanmi churanqa.

44«Tsaypitanam rupay yarqamunan kaq läduchö y norti kaq läduchö contran shäriyanqanta willayanqa. Tsaymi pasaypa rabyar contran shäriqkunata pïmaytapis wanutsiyta munar soldädunkunawan aywanqa.

45Lamarpita kuyayllapä sagrädu jirkanman aywaq nänichömi campamentunta ruranqa. Tsaychö kaykaptinmi pipis mana yanapaptin payta wanutsiyanqa».