Daniel 7

Quechuan QXO (Biblia en Quechua del sur de Conchucos)

← Chapter 6 Jump to: Chapter 8 →

1Babilonia nacionchö rey Belsasar juk wata mandaykaptinmi sueñuyninchö revelacionta Daniel rikarqan. Rikanqankunata qellqaskirmi

2Daniel nirqan: «Kay patsapa chuskun lädupita pasaypa vientümuptin mantsariypä lamar pullchaqyaykaqtam sueñuynïchö rikarqä.

3Tsay lamarpitam mantsariypä juk niraq juk niraq chusku jatusaq ashmakuna yarqayämurqan.

4«Punta kaq ashmam león niraq karqan. Älankunam ankapa älannö karqan. Rikaraykaptïmi älankunata jipiskiyarqan. Tsaypitanam tsay ashmata ichïtsiyarqan ishkan chakillanwan runanö ichiränanpä. Tsaynöllam runanö yarpachakunanpä yarpayta qorqan.

5«Ishkay kaq ashmam ösu niraq karqan. Jukaq lädu waqtanmi joqarikashqa karqan. Shiminchömi amuraykarqan kimsa custillakunata. Tsay ösutam nirqan: «¡Sharkur melananqaykiyaq aytsata mikuy!»

6«Tsaypitanam rikarqä leopardu niraq ashma waqtanchö chusku älayuqta y chusku umayuqta. Tsay ashmam mandakunanpä autoridä kayta chaskirqan.

7«Tsaypitam rikarqä chusku kaq ashmata. Punta kaq rikanqä ashmakunapita mas juk niraqmi karqan. Tsay ashmam pasaypa mantsaypä kallpasapa karqan. Curmïllunkunapis fiërrupita jatusaq kaptinmi pitapis tarinqan kaqtaqa mikurnin katunqan kaqtaqa chipyaq jarur usharqan. Tsay ashmaqa chunka waqrayuqmi karqan.

8«Tsay waqrankunata rikaraykaptïmi juk taksha waqra jeqamurqan. Tsay waqra wiñaptinmi kimsa kaq waqrankuna kiptukäyarqan. Tsay waqra karqan runapa ñawinnö ñawiyuq y shimin tarinqantam pitapis ashlliq.

9«Tsaychö rikaraykaptïmi trönukunata alistayarqan. Juk trönumanmi imaypis kawaq Ruku jamarqan. Röpanpis rashtanö pasaypa yuraqmi karqan. Aqtsanpis yuraq millwanö pasaypa yuraqmi karqan. Jamakunan trönun y trönunpa ruëdanpis lunyaykaq ninanömi karqan.

10Paypa puntanpitam lunyaypa lunyar nina yarquykarqan. Waranqa waranqapam payta sirviyarqan. Yupaytapis mana atipaypämi puntanchö kaykäyarqan. Juzgayta qallaykunanpämi librukunata kicharqan.

11«Tsay taksha waqra pitapis mantsariypä qayapanqanta wiyarmi mantsakashqa rikaraykarqä. Tsaynö rikaraykaptïmi waqrayuq ashmata wanuskatsir pedäzu pedäzu roquskir lunyaykaq ninaman jitayarqan.

12Tsaynöllam wakin ashmakunapa podernintapis qechuyarqan. Qechurpis tiempun cumplinqanyaqmi kawaykaqta dëjayarqan.

13«Tsay paqasmi revelacionchö rikarqä ciëlupita pukutay jananchö runapa tsurinnö shamuykaqta. Paytam imaypis kawaq Rukupa puntanman pushayarqan.

14Tsay Rukum payta churarqan llapanta mandananpä, llapanpä poderyuq kananpä y llapanpita respitashqa kananpä. Tsaymi may markapita, maytsay nacionpita karpis y ima idiömata parlarpis payta sirviyarqan. Paypa mandakuyninqa imayyaqpis mana ushakaqmi kanqa. Poderyuq kanqantaqa manam pipis qechunqatsu ni pipis ushakätsinqatsu.

15«Noqa Danielmi tsaykunata rikar pasaypa mantsarirqä. Rikanqäpita yarpachakurmi pasaypa llakikurqä.

16Tsaymi tsay ichiraykaqkunapa puntanman witiykur jukninta mañakurqä tsaykunapita tantiyatsimänanpä. Tsaymi tantiyatsimar nimarqan:

17«Tsay chuskun jatusaq ashmakunaqa chusku nacionkunam kaykäyan. Tsay nacionkunam munayyuq tikrar wakin nacionkunatapis poderninchö katsiyanqa.

18Tsaypitanam poderyuq Tayta Diosman yärakuqkuna mandakuyninta chaskiyanqa. Tsay mandakuyninchömi imayyaqpis mana ushakaypa paykuna kayanqa».

19«Tsaypitanam chusku kaq ashma imapä kanqantapis musyayta munarqä. Tsay ashmam imatapis tsarinqan kaqtaqa rachikachaskir mikurqan. Katunqan kaqtanam jarutakur usharqan. Curmïllunkunapis fiërrupita y shillunkunapis broncipitam karqan. Wakin ashmakunapitapis mas juk niraq karmi pasaypa mantsaypä karqan.

20«Tsaynöllam musyayta munarqä tsay ashmapa chunka waqrankuna imapä kanqanta y taksha waqra imapä wiñanqantapis. Tsay taksha waqra wiñaptinmi kimsa kaq waqrankuna kiptukaskiyarqan. Tsay waqraqa ñawiyuqmi karqan. Tsaynöllam shimin tarinqanta imatapis parlaq. Tsaymi tsay waqra wakin kaq waqranpitapis mas mantsaypä karqan.

21Rikaraykaptïmi tsay waqraqa Tayta Diosman yärakuqkunata atacar vincirqan.

22Tsaynö vincirqan imaypis kawaq Ruku shamur kuyanqan runakunapa favornin shärinqanyaqmi. Favornin shäriptinmi mandakuyninta chaskiyarqan.

23«Tsaypita musyayta munaptïmi tsaychö ichiraykaq tantiyatsimar nimarqan: «Tsay chusku kaq ashmaqa juk nacionmi kaykan. Tsay nacionqa kay patsachö wakin nacionkunatapis poderninchömi tsararanqa. Wakin nacionkunapita mas juk niraq karmi jarurnin lanquypa lanqur kay patsachö kaqkunata ushakätsinqa.

24«Tsay chunka waqrankunam tsay nacionpa chunka mandaqnin reykuna kaykäyan. Paykuna wanuskiyaptinmi mas juk runa rey kayman yaykunqa. Payqa wakin mandaq reykunapitapis mas mana alli karmi kimsa mandaq reykunata vincinqa.

25Tsaynöllam poderösu Tayta Diospa contran parlanqa. Tayta Diosman yärakuqkunatam pasaypa ñakatsinqa. Tayta Diospä ruranqan fiestakunatapis y mandamientunkunatapis trocatsiytam munanqa. Tayta Diosman yärakuqkunata kimsa wata y joqta killam poderninchö tsararanqa.

26«Tsaynö kaykaptinmi Tayta Dios juzgaptin tsay reypa poderninta qechur pasaypa ushakätsiyanqa.

27Tsaymi poderösu Tayta Diosman yärakuqkuna kay patsachö llapan mandaqpitapis mas mandaq kayanqa. Tsaynöllam poderyuqpitapis mas poderyuq kayanqa y respitashqa runapitapis mas respitashqa kayanqa. Tayta Diospa mandakuynin imaypis mana ushakaq kaptinmi kay patsachö llapan nacionkuna payta sirviyanqa».

28«Tsaytam sueñuynïchö rikarqä. Rikanqäkunapita yarpachakurmi noqa Daniel pasaypa almaynaq rikakurqä. Tsaynö kaptinpis tsay sueñunqäta manam pitapis willarqätsu».

← Chapter 6 Jump to: Chapter 8 →