Daniel 12

Quechuan QXO (Biblia en Quechua del sur de Conchucos)

← Chapter 11 Jump to:

1«Tsay witsanmi Israel runakunata cuidaq y angelkunapa mandaqnin Miguel Israel runakunapa favornin shärinqa. Runakuna pasaypa ñakaychö karmi llakikuyanqa. Kay patsachö nacionkuna kanqanpita imaypis manam tsaynö ñakaykuna y llakikuykunapis kashqatsu. Libruchö jutinkuna qellqashqa kaykaqkunallam Israel mayikikuna salvakuyanqa.

2«Tsay junaqmi pamparanqan kaqpita atskaq runakuna kawayämunqa. Wakinnam kawayämunqa imayyaqpis kawayänanpä y wakinnam kawayämunqa imayyaqpis ñakayänanpä. Ñakayänanpä kawamuqkunam jutsata rurayanqanpita pasaypa penqakuychö kayanqa.

3Yachaq runakunaqa chipipiykaq ciëlunömi atsikyäyanqa. Runakunata alli kawayänanpä yachatsiqkunaqa qoyllurkunanörämi imayyaqpis chipipïyanqa.

4«Daniel, willanqäkunata tiempun chämunqanyaq amarä pitapis willakuyrätsu. Qellqashqa kaykaq rölluta cërawan shumaq siguray. Runakunaqa maytsaypapis aywar yachakurninmi mas yachaq kayanqa».

5Tsaypitanam noqa Daniel rikarqä ishkay runakunata. Jukaq runam ichiraykarqan mayu kay tsimpanchö y jukaqnam ichiraykarqan wak tsimpanchö.

6Yaku jananchö ichiraykaq lïnu röpashqa runatam jukaq runa tapur nirqan: «Ninqaykinö mantsariypä kaqkuna kananpä ¿ayka tiemputä faltan?»

7Tsaynö niptinmi lïnu röpashqa runa mayu jananchö kaykanqanpita ishkan makinta joqarkur imayyaqpis kawaq Tayta Diospa jutinchö jurarnin nirqan: «Llapan tsaykuna cumplinanpä kimsa wata pullanmi faltan. Tsay witsanmi Diosman yärakuqkuna poderniynaqna kayanqa».

8Tsaynö ninqankunata manam shumaqllaqa tantiyarqätsu. Tsaymi tapurqä: «Taytay, tsaypita ¿imatä mas päsanqa?»

9Tsaymi nimarqan: «Daniel, llapanpis tsaykuna sëllaraptinmi pipis musyanqatsu hasta tiempu chämunqanyaq. Qamqa imaypis allita rurar kaway.

10Atskaq runakunam tantiyakuyanqa imanö ñakarpis Tayta Diosman yärakur jutsata mana rurar kawayänanpä. Jutsa ruraqkunaqa jina jutsata rurar kawayätsun. Paykuna mana tantiyakuyaptinpis Dios munanqannö kawaq runakunam sïqa tantiyakuyanqa.

11«Qoyay qoyay sacrificiuta rupatsiyänanta mana dëjanqanpitam Dios mana munanqan kaqta templuman churanqanyaq waranqa ishkay pachak isqun chunka (1,290) junaq kanqa.

12Kushishqam kawayanqa waranqa kimsa pachak kimsa chunka pitsqa (1,335) junaqyaq mana ajayaypa shuyaraqkunaqa.

13«Qamqa wanunqaykiyaq Tayta Dios munanqannö kaway. Ushanan junaqchö kawarkamurmi herenciaykita chaskinki».

← Chapter 11 Jump to: