Daniel 8

Quechuan QXO (Biblia en Quechua del sur de Conchucos)

← Chapter 7 Jump to: Chapter 9 →

1Belsasar kimsa wata rey kaykaptinmi noqa Daniel yapay revelacionta rikarqä.

2Tsay revelacionchömi Elam provinciachö kaykaq Susa markachö y Ulai mayu kuchunchö kaykarqä.

3Rikachakunqächömi ishkay largu waqrayuq carnëru mayu kuchunchö kaykaqta rikarqä. Jukaq waqran qepatarä wiñamushqa kaykarpis mas jatunmi karqan.

4Tsaychömi rikarqä rupay ullunan lädupa, norti kaq lädupa y sur kaq lädupa tsay carnëru atacaykaqta. Manam ima ashmapis pärapuyta puëdirqantsu. Tsaynöllam pipis poderninpita salvakurqantsu. Tsay carnëru munanqanta rurarmi llapanpitapis mas poderyuq tikrarqan.

5Tsaykunapä yarpachakuykaptïmi rupay ullunan kaq lädupita juk chïvu urkunchö jatunkaray waqrayuq yuriskamurqan. Tsay chïvum maytsaypapis aywarqan patsatapis mana jaruyllapa.

6Mayu kuchunchö rikanqä ishkay waqrayuq carnëruman chaykurmi llapan kallpanwan rabyashqa takaskirqan.

7Rikaykaptï takaskiptinmi carnërupa ishkan waqran pakiskirqan. Chïvu saqtaskir pasaypa jarur ushaptinmi carnëru ima ruraytapis puëdirqantsu. Tsaynö atacaptin manam pipis washayta puëdirqantsu.

8Tsay chïvuqa cada vezllam mas kallpayuq karqan. Pasaypa poderyuq kaykaptinmi jatunkaray waqran pakikaskirqan. Tsay pakiq waqrapa trokinmi chusku jatusaq waqrankuna wiñamurqan. Tsay waqrankunam chuskun lädupa toqriraykarqan.

9Jukaq waqrapitam taksha waqra wiñar mas jatunkaray tikrarqan. Tsay waqram wiñarqan sur kaq lädupa, rupay yarqamunan kaq lädupa y kuyayllapä nacionnintsik kaq lädupa.

10Tsaynöllam wiñarqan ciëluchö kaykaq angelkunayaq. Tsaymi wakin angelkunata y qoyllurkunata jitaskamur jarur usharqan.

11Angelpa mandaqninpita mas munayyuq kanqanta yarparmi sacrificiuta templuchö qoyay qoyay rupatsiyänanta consientirqantsu y templutapis impüruyätsirqan.

12Tsaynö kaptinmi qoyay qoyay rupatsiyänanpä kaq sacrificiuta rupatsiyarqannatsu y Diosman yärakuqkuna tsaychö adorayarqannatsu. Tsay waqraqa Tayta Dios ninqantapis llapantam manakaqman churarqan. Waqra munanqannömi llapanpis karqan.

13Tsaypitam wiyarqä ángel mayinta juk ángel tapuykaqta: «¡Imayyaqrä qoyay qoyay rupatsiyänanpä kaq sacrificiuta rupatsiyanqatsu! ¡Imayyaqrä Tayta Diosta mana cäsur templuta manakaqman churayanqa! ¡Imayyaqrä Tayta Diosman yärakuqkunata ñakatsiyanqa!»

14Tapuptinmi jukaq ángel nirqan: «Tsaynö kanqa ishkay waranqa kimsa pachak (2,300) tardiyaq y wärayyaq. Tsaypitam templu purificashqa kanqa».

15Noqa Daniel revelacionta rikanqäpita yarpachakur kaykaptïmi illaqpita ñöpächö runa niraq yuriskamurqan.

16Tsaypitam wiyarqä Ulai mayupita tsay runa niraq nimuqta: «Ángel Gabriel, tantiyatsiy rikanqan imapä kanqantapis».

17Ángel Gabriel ñöpäman shamuptinmi pasaypa mantsarir lätakaypa ishkiskirqä. Tsaymi nimarqan: «Runapa tsurin, shumaq tantiyay. Llapan rikanqaykiqa ushanan tiempu chämuptinrämi päsanqa».

18Tsaynö parlapaykämaptinmi lätaraykanqächö pitiskirqä. Shäritsimarmi

19nimarqan: «Kananmi yachatsishayki Tayta Dios rabyarnin castiganan tiempu ima päsananpä kanqantapis. Tsayqa ushanan tiempuchömi kanqa.

20«Ishkay waqrayuq carnëruta rikanqaykiqa Mediapa y Persiapa mandaqnin reykunam kaykäyan.

21Rikanqayki chïvuqa Grecia nacionpa mandaqnin reymi kaykan. Chïvupa urkunchö jatunkaray rikanqayki waqraqa Grecia nacionpa punta kaq mandaqnin reymi kaykan.

22Tsay waqra pakiptin chusku waqrakuna wiñayämunqanta rikanqaykiqa tsay nación chuskuman rakikänanpämi kaykan. Peru tsay rakikashqa nacionkunapa poderninqa manam puntata kayanqannötsu kanqa.

23«Tsay chusku nacionkuna poderniynaq tikraptin y runakunapa jutsankuna atskana kaptinnam mana kuyapäkuq astütu runa rey kananpä yaykunqa.

24Tsay reyqa pasaypa poderyuqmi kanqa. Peru manam kikinpa poderninwantsu tsaynö kanqa, sinöqa jukpa poderninwanmi. Munanqanta rurarmi imaykatapis pasaypa ushakätsinqa. Tsaynöllam poderyuqkunata y Tayta Diosman yärakuq santu runakunatapis ushakätsinqa.

25«Pasaypa astütu karmi pitapis engañanqa. Orgullösu karmi atskaq runakunatapis illaqpita wanutsinqa. Tsaynöllam mandaqkunapa mandaqnin Tayta Diospa contran shärinqa. Tsaynö kaykanqanchömi castïguwan wanunqa. Tsay castïguqa manam runapitatsu kanqa.

26«Wäraypa y tardipa sacrificiuta mana rupatsiyänanpä kanqanta revelashunqaykiqa rasunpam päsanqa. Peru ama pitapis tsayta willaytsu. Atska wata päsaskiptinrämi tsaykunaqa cumplinqa».

27Tsaynö nimaptinmi noqa Daniel pasaypa mantsarir kallpaynaq tikrar atska junaq qeshyarqä. Tsaypita alliskirnam rey nimanqanta yapay rurarqä. Peru tsay rikanqä imapä kanqantapis mana tantiyarmi pasaypa llakikurqä.

← Chapter 7 Jump to: Chapter 9 →