Ecclesiastes 1

Quechuan QXO (Biblia en Quechua del sur de Conchucos)

Jump to: Chapter 2 →

1Kaychömi qellqashqa kaykan yachatsikuq runa willakunqan. Payqa Davidpa tsurin karmi Jerusalénchö rey karqan.

2Yachatsikuq karmi nirqan: «¡Llapan imaykapis manakaqllapämi kaykan! ¡Kay patsachö päsanqankuna imanir y imapä kanqantapis manam tantiyayta puëdintsiktsu!

3¡Imatatä runa jipin kay patsachö mayjina arurpis!

4«Maytsaychömi wamrakuna yuriyan y runakunapis wanuyan. Tsaynö kaptinpis kay patsaqa kanqannöllam kaykan.

5Rupaypis mana ajayaypam yarqamun y jeqan. Yapay yarqamunallanpämi kanqanman kutin.

6Tsaynöllam vientupis sur kaq lädupa aywaskir norti kaq läduman kutin. Mana päraypam imaypis tumaykan.

7Llapan mayukunapis lamarllamanmi aywayan. Tsaynö kaptinpis lamarqa manam imaypis juntantsu. Pashtaq pukyukunapitam yaku yapay yarqamun. Tsaypitam imaypis aywanqannö yapay raqrapa aywan.

8Tsaynölla llapanpis kaptinmi pasaypa llakikü. Pasaypa llakikunqätapis manam shumaq tantiyatsiyta puëdïtsu. Mayjina runa rikaptinpis rikananpä kaqkuna masrämi kaykan. Atskata wiyaptinpis wiyananpä kaqkuna masrämi kaykan.

9«Unay päsanqankunaqa yapaymi päsaykan. Ñöpata rurakaqkunaqa yapaymi rurakaykan. Kay patsachöqa llapanpis unay kanqannöllam kaykan.

10Tsaynö kaptinmi wakinqa niyan: «¡Peru kaymi sïqa imaypis päsashqatsu!» Tsaynö niyaptinpis noqam nï: «Noqantsik manarä yurishqam tsaypis unayna päsashqa.

11Unay runakuna rurayanqanpis qonqakashqanam. Tsaynöllam kanan ruranqantsikpis qonqakanqa. Qepa yuriq runakuna rurayanqanpis qonqakanqam».

12Noqa yachatsikuqmi Jerusalénchö Israel runakunapa mandaqnin rey karqä.

13Tsaymi imaykata dëjaykur yarpachakurqü kay patsachö imanir llapan päsanqankunata tantiyanäpä. Tsayta tantiyanantsikpä Tayta Dios churamashqapis alläpa ajam.

14Kay patsachö imanir llapan päsanqankunata tantiyayta munarqa vientuta tsariyta munaqnöllam kaykantsik.

15Imatapis wiksushqataqa manam derechayta puëdintsiktsu. Mana kaptinqa imatapis manam yupantsiktsu.

16Shonqullächö yarpachakurmi tantiyarqü pïmaypitapis mas tantiyakuq kanqäta. Jerusalénchö noqapita mas unay kaq reykunapitapis mas yachaqmi kä.

17Tsaymi yarpachakurqü alli ruraykuna y llutan ruraykuna imanö kanqantapis musyanäpä. Peru tantiyakuyta munarqa vientuta tsariyta munaqnöllam kaykantsik.

18Mas yachaq karqa masmi uma nanayta tarinqa. Mas tantiyakuq karqa masmi llakikunqa.

Jump to: Chapter 2 →