Ecclesiastes 12

Quechuan QXO (Biblia en Quechua del sur de Conchucos)

← Chapter 11 Jump to:

1Jövinllarä kanqaykiyaq kamamaqnintsik Tayta Dios munanqannö kawanaykipä yarpachakuy. Rukuyarnaqa manam payta shumaq sirviyta puëdinkinatsu. Kawarpis llakikullarnam kawanki.

2Tsaynö kaykaptinqa rupayta, killata, qoyllurkunata y ima atsikyaqtapis rikayta puëdinqaykiyaq y ñawikipis manarä tsakanqanyaq Tayta Diosta sirviy.

3Rukuyaptikiqa llapan cuerpuykim tsuktsukyanqa. Chankaykipis siksikyanqam. Kiruykipis ushakanqam. Ñawikipis tsakanqam.

4Cällichö büllata rurayaptinpis manam wiyankinatsu. Mulinu taqraranqantapis manam wiyankinatsu. Pishqukuna cantayanqantapis manam wiyankinatsu.

5Witsaypa aywaytapis mantsarinkinam. Nänikunapa aywarpis ishkinkillanam. Avellano munti waytaqnömi aqtsaykipis soquyanqa. Chukllush puriqnömi purinkipis. Majaykitapis manam munapankinatsu. Wanukurqa imaypis mana kutimuqnam aywakunki. Cällichömi qorikäyanqa waqaraykar pampaq apayäshunaykipä.

6Tsaynö kaykaptinqa qellay cadënayki manarä rachinqanyaq, qori mankayki manarä pakinqanyaq, uylluyki pözu kuchunchö manarä pakinqanyaq y pözupita yakuta jipinaykipä waska manarä rachinqanyaq Tayta Diosta sirvinki.

7Allpallapita rurashqa karmi cuerpuntsik yapay allpaman tikranqa. Peru Tayta Dios qaramanqantsik almantsikmi sïqa pay kaqman kutinqa.

8Noqa yachatsikuqmi nï: «¡Imaykapis ushakaqllam kaykan! ¡Kay patsachö päsanqankuna imanir y imapä kanqantapis manam tantiyayta puëdintsiktsu!»

9Kay libruta qellqaq runaqa qoyay qoyay mas yachaq tikrarmi runakunata yachanqanman yachatsirqan. Willakuyanqan proverbiukunata qoriykurmi atskata qellqarqan. Tsaynöllam atska proverbiukunata kikinpa yarpayllanpitapis qellqarqan.

10Palabrakunata shumaq kamakätsirmi llapanta qellqarqan. Tsay qellqanqankunaqa llapanpis rasun kaqllam.

11Wirukuna qerunö y següru jawishqa estäcanömi yachaqkuna yätsinqankuna. Tsaynö yätsinanpämi Tayta Dios tantiyatsin. Payqa alli mitsikuqmi.

12Hïju, juk libruta liyir ojalärä kaychö qellqashqa kanqanpita mas juk yachatsikuyta chaskinkiman. Runakunaqa atska librukunatam qellqayan. Alläpa estudiaypis ajayätsikunmi.

13Kay llapan yachatsikuyta wiyarmi tantiyanki Tayta Diosta mantsapakur mandamientunkunata cumplinaykipä kanqanta. Tsaypämi kay patsachö runa kawan.

14Tayta Diosqa imanöpis kawanqantsikmanmi juzgamäshun. Pakayllapa ruranqantsikpitapis juzgamäshunmi.

← Chapter 11 Jump to: