Ecclesiastes 4

Quechuan QXO (Biblia en Quechua del sur de Conchucos)

← Chapter 3 Jump to: Chapter 5 →

1Tsaypitanam rikarqü kay patsachö poderyuq runakuna humildi runakunata ñakatsiyanqanta. Pipis mana shoqaptin y mana yanapaptinmi waqaykaqta rikarqü.

2Tsaymi tantiyarqü kawaq runakunapitapis wanukuq runakuna mas alli kayanqanta.

3Wanukuqkunapitapis y kawaqkunapitapis mas allim kaykan manarä yuriqkuna. Paykunaqa manam rikayanrätsu kay patsachö mana alli ruraykunata.

4Tsaynöllam rikarqü alli arukuqkunata chikipäyanqanta. Tsaynö karqa vientuta tsariyta munaqnöllam kaykantsik.

5Runakunam niyan: «Mana tantiyakuq upa runaqa makin oqllashqalla kakurmi mallaqayman char pasaypa ñakanqa».

6Peru noqam sïqa nï: Atskata gänar mana jamaypa arunantsikpa rantinqa wallkallata gänarpis jamanqantsikmi mas alli kaykan. Mana jamaypa arurqa vientuta tsariyta munaqnöllam kaykantsik.

7Tsaypitanam mastapis rikarqü. Tsay rikanqäpis manakaqllapämi.

8Rikarqümi wakin runakuna japallan kaykarpis tsuriynaq y wawqiynaq kaykarpis mana jamaypa arunqanta. Aykata gänarpis rïcuyaytam munan. Imaypis manam yarpachakuntsu pasaypa arunqankuna pipä jaqinanpä kanqanta y imanir alläpa ñakar arunqanta. Tsaynö alläpa ñakar arunqanpis manakaqllapämi.

9Japallan arunanpa rantinqa ishkaq aruyanqanmi mas alli.

10Ishkaq karqa juknin ishkiptinpis jukninmi shäritsin. Japallan kaykar ishkiptinqa shäritsinanpä manam pïninpis kantsu. Japallan runa ishkirqa kuyapaypämi kaykan.

11Tsaynöllam juk cämallachö ishkaq punurqa qoñütsinakuyan. Jukllaylla punurqa ¿imanöparä qoñunqa?

12Jukllayllataqa maqar vincinmi. Ishkaq kaptinmi sïqa pipis vinciyta puëdintsu. Waskapis kimsapashqaqa fäcilllaqa manam rachintsu.

13Mana tantiyakuq y yätsinqanta mana chaskikuq ruku reypitaqa tantiyakuq jövinmi pobrilla karpis mas alli kaykan.

14Tsay jövinqa ruku reypa rantin yaykuptin carcelpita yarqushqa y pobrilla yurishqa kaptinpis

15llapan runakunam janan shäriyan.

16Rey kayman yaykunqan witsan atskaq runakuna janan karpis tiempu päsaskiptinqa paypapis contranmi shäriyan. Llapan tsaykunapis vientuta tsariyta munaqnöllam kaykan.

← Chapter 3 Jump to: Chapter 5 →