Ecclesiastes 9

Quechuan QXO (Biblia en Quechua del sur de Conchucos)

← Chapter 8 Jump to: Chapter 10 →

1Kay patsachö imanir llapan päsanqankunata musyanäpämi llapan shonqüwan shumaq yarpachakurqü. Tsaynö yarpachakurmi nirqü: Alli runa ni tantiyakuq runa karpis manam musyantsiktsu arunqantsikman Tayta Dios bendicionninta churamunanpä kanqanta o mana churamunanpä kanqanta. Tsaynöllam musyantsiktsu waray warantinkuna imanö kanantsikpä kanqantapis.

2Musyantsikmi llapantsikpis ushakänantsikpä kanqanta. Ushakäshunmi alli runa o mana alli runa karpis, Dios munanqannö kawarpis o pay munanqannö mana kawarpis, Diospä sacrificiuta rupatsishqa o mana rupatsishqa karpis, jutsaynaq o jutsayuq karpis, allita ruranantsikpä Diosta awnirpis o mana awnirpis.

3Kay patsachö llapan runapis wanukuqlla kanqanqa llakikuypämi. «Wanukushämi» nirmi runakuna shonqun munanqannö mana allikunata rurayan.

4Tsaynö kaptinpis wanunqantsikpitaqa kawanqantsikmi mas alli. Parlapis ninmi: «Wanushqa leonpitaqa awkis allqullapis mas allim».

5Llapantsikpis musyantsikmi wanunantsikpä kanqanta. Peru wanuskirqa manam imatapis musyashunnatsu ni munashunnatsu. Wanuskishqaqa manam pipis yarpämäshunnatsu.

6Tsaynöllam kuyakuq kaynintsikpis, chiki kaynintsikpis y imata munanqantsikpis ushakanqa. Tsaymi kay patsachö imatapis rurashunnatsu.

7Tsaynö kaykaptinqa kawanqaykiyaq mikuyta kushishqa mikunki y vïnuta kushishqa upunki. Tsaynö ruranqaykiqa Tayta Dios munanqannömi.

8Llakikunaykipa rantinqa alli röpata jatikurkur perfümita umaykiman wiñakunki.

9Kay patsachö Tayta Dios qaramanqantsik kaway päsaqlla kaykaptinqa warmikiwan kuyanakur qoyay qoyay kushishqa kawanki. Tsaynö kawanqaykim päguyki kaykan kay patsachö pasaypa ñakar arunqaykipita.

10Tsaynö kaykaptinqa llapantapis kushishqa ruranki. Wanuskirqa manam imatapis rurankinatsu, yachankinatsu ni musyankinatsu.

11Kay patsachö mas imata rikanqätapis kanan willashayki. Mas cörriq karpis llallinakuychö manam siempritsu gänan. Mas kallpayuq karpis pelyachö manam siempritsu vincin. Mas tantiyakuq karpis manam siempritsu rïcuyaykan. Mas alli yarpayyuq karpis manam siempritsu mas qellayta gänan. Mas yachaq karpis manam siempritsu kuyashqa kaykan. Llapantsikpam allipis o mana allipis suertintsik.

12Tsaynöllam musyantsiktsu imay höra desgracia päsamänantsikpä kanqanta. Atarräyawan pescäduta illaqpita tsarinqannö y trampawan pishquta illaqpita tsarinqannömi runatapis desgracia illaqpita tsarin.

13Kay patsachö mas juktapis rikarqümi. Kanan tantiyatsishayki imata rikanqäta y imata tantiyakunqätapis.

14Rikarqümi juk taksha markachö wallkaqlla runakuna kaykaqta. Tsaymanmi poderyuq rey atacananpä chaykur jirurupaskiyarqan. Markaman yaykuyänanpämi soldädunkunawan alistakuyarqan.

15Tsay markachömi pobri yachaq runa tarqan. Tsay runam yachaq kar marka mayinkunata yätsirqan imanöpapis salvakuyänanpä. Yätsinqannö salvakurpis paytaqa pobri kaptinmi pipis cäsurqannatsu.

16Tsayta rikarmi nï: Yachaq kayqa kallpayuq kaypitapis mas allim. Yachaq kaptinpis pobri runataqa manakaqmanmi churayan y shumaq yätsiptinpis manam cäsuyantsu.

17Mana tantiyakuq mandaq runa jinchipa parlanqanpitaqa mas allim kaykan yachaq runa yachayllapa parlanqan.

18Allin kaq armapitapis yachaq kaymi mas alli. Peru imallatapis pantashqam sïqa llapanpis mana alliman tikraskin.

← Chapter 8 Jump to: Chapter 10 →