Ecclesiastes 10

Quechuan QXO (Biblia en Quechua del sur de Conchucos)

← Chapter 9 Jump to: Chapter 11 →

1Perfümiman qenrash yaykur perditsinqannömi mana tantiyakuq runapis yachaq runa yätsinqanta perditsin.

2Yachaq runaqa allitam yarpan. Peru mana yachaq runam sïqa mana allita yarpan.

3Mana yachaq runaqa imata rurarpis llutantam ruran. Tsaymi pïmaypis paypäqa upa kanqanta niyan.

4Rey ollqutupäshuptikipis ama rabyakuytsu. Pacienciakurqa rabyashqa kaykaqtapis päsatsinkim.

5Kay patsachömi rikarqü reykuna llutanta rurar

6mana yachaq runata mandaq kananpä churayanqanta y yachaq runatana pitsapakuq kananpä churayanqanta.

7Tsaynöllam rikarqü sirviq runakuna patronnö caballun muntashqa puriykaqta y patronkuna sirviqnö chakillapa puriykaqta.

8Uchkuta uchkuqqa kikinmi tsayman jeqanqa. Pirqata paskaptinqa culebram kaninqa.

9Rumita llaqllarqa rumiwanmi roqukunqa. Yantata tseqtarqa kikinmi qantsakunqa.

10Jächa loqtuyaptin mana afilarqa mas kallpawanrämi mutuntsik. Imatapis shumaq yarpachakuskir rurashqaqa mas allim kaykan.

11Culebra mana kaninanpä upayätsiyta yachanqanpis kaniptinqa manam välintsu.

12Yachaq runa parlanqanqa maypis wiyay munaymi. Peru mana yachaq runa parlanqanqa ajayaypämi.

13Mana yachaq runaqa imaypis manakaqkunallatam parlan.

14Payqa manam imaypis upällakuntsu. Waray warantinkuna ima päsananpä kanqanta mana musyaykarqa ¿pirä musyanman wanukuptin ima päsananpä kanqanta?

15Qela runaqa ichikllata aruykarpis pasaypam ajyan. Tsaynö karmi imata rurananpäpis musyantsu.

16Kuyapaypämi juk nación kaykan mandaqnin rey wamralla kaptin y mandayiqninkunapis fiestata rurallar kakuyaptin.

17Kushikuypämi juk nación kaykan mandaqnin rey yachaq kaptin. Tsaynöllam kushikuypä kaykan mandayiqninkunapis upyaman churakäyänanpa rantin kallpan kananpä höranchö mikuyaptin.

18Qela runapaqa wayinpis jutuykällarmi ushakan. Allitsananpa rantin rikaräkuptinqa juchunmi.

19Mikuyqa pacha junta mikunantsikpämi. Vïnuqa kushikunantsikpämi. Qellayqa imachöpis gastanantsikpämi.

20Shonqullaykichöpis reypa contran ama yarpaytsu. Japallayki karpis rïcu runapa wasanta ama rimaytsu. Rimaptikiqa yukishllapis willanqam.

← Chapter 9 Jump to: Chapter 11 →