Ecclesiastes 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Tsaymi yarpayllächö nirqä: «Kanan mä kushikunäpä shonqü munanqanta imatapis rurashä». Tsaynö yarpachakur kawanqäpis manakaqllapämi.

2Tsaymi kushikunqä y gustüta ruranqäpis manakaqllapä kanqanta tantiyarqü.

3Tsaynöllam alli ruraykuna y llutan ruraykuna imanö kanqantapis musyanäpä mana tantiyakuq runanö vïnuta upurqä. Tsaynö upurqä alli o mana alli kanqantapis tantiyanäpämi.

4Tsaynöllam imayka obratapis ruratsirqü. Palaciukunatapis ruratsirqümi. Üvatapis atskatam plantatsirqü.

5Jardinta ruraykurmi imayka niraq waytakunatapis plantatsirqü. Tsaynöllam tukuy casta frütakunatapis plantatsirqü.

6Plantäkunata qarpatsinäpämi jatusaq pözukunata ruratsirqü.

7Atskaq sirvimaqnïkunatam ollquta y warmitapis rantirqü. Makïchö yuriq sirviqkunapis kashqam. Jerusalénchö täraq unay runakunapa wäkankunapita y üshankunapitapis mas atskam wäkäkuna y üshäkunapis kashqa.

8Wakin reykunapata y wakin provinciakunapatam qorintapis qellaynintapis muntun muntun impuestuta cobrar qorirqü. Cantapämaqkunapis atskaqmi ollqupis warmipis kayashqa. Munanqäkunata rurarmi warmitapis atskaqta tsarararqü.

9Jerusalénchö täraq unay runakunapitapis mas reqishqa y rïcum karqü. Imaypis tantiyakuqmi karqü.

10Imatapis shonqü munanqantaqa llapantam kushishqa rurarqü. Tsay kushikunqämi pägü kashqa llapan ruranqäkunapita.

11Tsaynö kaptinpis yarpachakurmi tantiyakurqü kay patsachö pasaypa ñakar ruranqantsikkuna manakaqllapä kanqanta. Tsaymi ruranqantsikkunaman yärakurqa vientuta tsariyta munaqnölla kaykantsik.

12Noqa musyanqäpita mastaqa trokï yaykuq rey manam imatapis musyanqatsu. Tsaymi yachaq kay y mana yachaq kay imanö kanqantapis tantiyatsinäpä yarpachakurqü.

13Yarpachakurmi tantiyarqü paqaspita aktsi mas alli kanqannö tantiyakuq kay mas alli kanqanta.

14Yachaq runaqa imatapis tantiyakunmi. Peru mana yachaq runam sïqa tsakäpakushqanö kar imatapis tantiyantsu. Tsaynö kaptinpis tantiyarqümi yachaq y mana yachaq runapis ushakaqlla kanqanta.

15Tsaymi yarpachakur nirqü: Mana yachaq runanölla noqapis wanunäpä kaykaptinqa yachaq kanqäpis ¿imapätä välin? Tsaymi tantiyarqä yachaq kaypis manakaqllapä kanqanta.

16Wanuskiptinqa yachaqta y mana yachaqtapis qonqaskiyanmi. Yachaq runa y mana yachaq runapis ushakaqllam kaykan.

17Tsayta tantiyaskirmi pasaypa llakikur ima ruraytapis munarqünatsu. Tsaykunata tantiyayta munar vientuta tsariyta munaqnöllam kaykantsik.

18Tsaynöllam tantiyarqü wanukuptï trokï yaykuq rey llapan ruranqäkunata probichananpä kanqanta. Tsayta tantiyarmi pasaypa llakikurqü.

19Kay patsachö pasaypa ñakar y shumaq tantiyakuskir ruranqäkunata tsararänanpäqa ¿yachaq runatsurä o mana yachaq runatsurä kanqa? Alli tantiyakushqaqa kay vïdachö llapan ruranqantsikpis manakaqllapämi kaykan.

20Kay patsachö pasaypa ñakar ruranqäkuna ushakaqlla kanqanta tantiyarmi shonqüpis nanayparä llakikurqan.

21Shumaq yarpachakuskir arunqantsiktapis wanukurqa mana yanapamaqnintsikkunapämi dëjapaykuntsik. Tsaypis manakaqllapä y manam allitsu.

22Runaqa qoyay qoyay pasaypa yarpachakullarmi kawan. Pasaypa ñakarmi arun. Aybësis punuytapis manam tarintsu. Tsaynö kaptinpis kay patsachö pasaypa ñakar arunqanpita ¿imatatä jipin? Tsaynö arunqantsikkunapis manakaqllapämi kaykan.

24Tsaynö kaykaptinqa kawanqantsikyaq arur gänanqantsikwan kushishqa mikushun y upushun. Kushishqa kawanantsikpämi Tayta Dios kamamarquntsik.

25Tayta Dios mana yanapamashqaqa manam pipis kushishqa kawanmantsu.

26Kuyanqan kaqtam Tayta Dios yanapan tantiyakuq kananpä, yachaq kananpä y kushishqa kawananpä. Peru jutsa ruraq runatam sïqa dëjaskin. Tsaymi tsay runa arun alli runa probichanallanpä. Mayjina arurpis vientuta tsariyta munaqnöllam kaykan.

← Chapter 1 Jump to: Chapter 3 →