Ecclesiastes 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Kay patsachöqa llapanpis tiempuyuqllam kaykan.

2Tiempu kanmi yurinapä y wanunapäpis. Tiempu kanmi murukunapä y cosechanapäpis.

3Tiempu kanmi wanutsinapä y jampinapäpis. Tiempu kanmi juchutsinapä y shäritsinapäpis.

4Tiempu kanmi waqanapä y kushikunapäpis. Tiempu kanmi lütunapä y fiestata ruranapäpis.

5Tiempu kanmi rumikunata jitanapä y qorinapäpis. Tiempu kanmi makallanakunapä y mana makallanakunapäpis.

6Tiempu kanmi ashinapä y oqranapäpis. Tiempu kanmi churakunapä y jitanapäpis.

7Tiempu kanmi rachinapä y jiranapäpis. Tiempu kanmi upällakunapä y parlanapäpis.

8Tiempu kanmi kuyanapä y chikinapäpis. Tiempu kanmi guërrata ruranapä y guërrata mana ruranapäpis.

9Mayjina arurpis ¿imatatä runa jipin?

10Tsaynö kaptinpis tantiyakurqü runa arur kawananpä Tayta Dios permitinqantam.

11Paymi llapantapis tiempullanchö permitin. Tsaynöllam mana ushakaq kaway kanqanta tantiyanantsikpä Tayta Dios permitishqa. Manam tantiyayta puëdintsiktsu qallanqanpita ushanqanyaq Tayta Dios imata ruranqantapis.

12Tsaynö kaptinpis tantiyakurqü allita rurar kushishqa kawanqantsik mas alli kanqantam.

13Tsaynöllam tantiyakurqü arunqantsikpita mikur y upur kushishqa kawanapä Tayta Dios munanqanta.

14Tsaynöllam tantiyakurqü Tayta Dios llapan kamanqankuna imaypis tsaynölla kanqanta. Kamanqankunamanqa manam imatapis yapantsiktsu ni tsaypita manam imatapis jipintsiktsu. Payta mantsapakunantsikpämi Tayta Dios llapantapis tsaynö kamashqa.

15Kanan päsanqannömi unaypis päsarqan. Unay päsanqankunapis yapaymi päsanqa. Ñöpata kanqannö yapay kananpämi Tayta Dios permitin.

16Kay patsachömi rikarqü autoridäkuna shumaq arreglayänanpa rantin chaskipakur jutsaynaq runapa contran shäriyanqanta.

17Tsaymi shonqullächö nirqä: «Llapanpis tiempuyuqlla kaykaptinqa tiempu chämunqam alli runatapis y mana alli ruraq runatapis Tayta Dios juzgananpä».

18Tsaymi shonqullächö yarparqä: «Runakunataqa Tayta Diosmi tantiyatsin ashmakunanölla kayanqanta.

19Runapapis y ashmapapis tsayllam destïnun. Llapanpis jamayyuqkunaqa wanuqllam kayan. Runapis ashmapis ushakaqllam kaykan».

20Wanurqa llapantsikpis ushakäshunmi. Llapantsiktapis allpallapitam ruramarquntsik. Wanurqa llapantsikpis allpallamanmi kutishun.

21¿Pirä musyan runapa alman ciëluman aywanqanta y ashmapa alman patsa rurinman yaykunqanta?

22¿Pirä musyan shamuq watakunachö imanö kananpä kanqanta? Tsaymi runapäqa mas alli kaykan arunqanwan kushishqa kawanqan. Tsaynö kushishqa kawanqanmi pägun.

← Chapter 2 Jump to: Chapter 4 →