Ecclesiastes 6

Quechuan QXO (Biblia en Quechua del sur de Conchucos)

← Chapter 5 Jump to: Chapter 7 →

1Kay patsachö mastapis mana allikunata maytsaychömi rikarqü.

2Rïcuyänanpä y respitashqa kananpä pitapis Tayta Dios yanapanqantam rikarqü. Tsaynö yanapaptinmi ima munanqantapis tarin. Tsaynö tarirpis manam kikinqa probichantsu, sinöqa jäpa runakunam imaykantapis probichayan. Tsayqa pasaypa llakikuypämi.

3Aybësis cäsu kanmanmi juk runa pachak (100) tsuriyuq karpis y atska wata kawashqa karpis llakishqalla kawanqan y wanuptin shumaq mana pampayanqan. Tsay runapäqa mas allim kanman karqan manarä yurir shullu wamranö wanukuptin.

4Shullu wamraqa mas allim kaykan manakaqllapä kashqa karpis, mana musyaylla pampashqa karpis, jutiynaqlla kashqa karpis,

5atsikyay patsata mana rikashqa karpis y imata mana musyashqa karpis.

6Tsay runa ishkay waranqa (2,000) wata kawashqa karpis kushishqa mana kawarqa shullu wamrapitapis mas peormi kaykan. Ishkanpis wanukuqllam kayan.

7Runaqa pachallanpämi qoyay qoyay arun. Tsaynö kaptinpis nisitanqankunaqa manam imaypis ushakantsu.

8Tsaynöllam yachaq y mana yachaq karpis, pobri y rïcu karpis imallatapis nisitantsik.

9Tsaynö kaykaptinqa imatapis tsararanqantsikwan contentakushun. Tsayqa mas allim kaykan «kayta wakta tsararäman» nir mana contentakunqantsikpitaqa. Tsaynö kawarqa vientuta tsariyta munaqnöllam kaykantsik.

10Llapan päsanqantapis unaypitanam Tayta Dios permitirqan. Imanö kanantsikpä kaqtapis Tayta Dios maynam destinarqan. Noqantsikpita mas poderösu kaykaptinqa yarpanqannö permitinqanpita Tayta Diospa contran ama parlashuntsu.

11Alläpa parlarqa mana conviëniqkunatam parlantsik. Tsaynö parlarqa manam imatapis jipintsiktsu.

12Kay patsachö kawanqantsik llantuynö päsaqlla kaptin manam pipis musyantsu noqantsikpä ima mas alli kanqanta. Tsaynöllam pipis musyantsu wanukuptin kay patsachö ima päsananpä kanqanta.

← Chapter 5 Jump to: Chapter 7 →