Ecclesiastes 8

Quechuan QXO (Biblia en Quechua del sur de Conchucos)

← Chapter 7 Jump to: Chapter 9 →

1Yachaq kayqa kushikuypämi. Yachaq runaqa kushishqam imaypis kaykan.

2Tayta Diospa puntanchö awninqaykinölla rey nishunqaykita imaypis cäsukuy.

3Reypa contran ama shäriytsu ni mana alli runakuna rurayanqanta ama ruraytsu. Reyqa tsaynö kaqkunatam pasaypa castiganqa.

4Tsaynöllam rey ninqantaqa pïmaypis cumplinman. Paytaqa imata ruraptinpis manam pipis michayta puëdintsu.

5Rey ninqanta cäsuq runaqa manam castigashqatsu kanqa. Yachaq karqa rey mandanqantam imanö cumplinanpäpis yarpachakun.

6Cumplinanpä aja kaptinpis yarpachakur y pacienciakurqa cumplinqam.

7Peru manam musyankitsu ni pipis willashunkitsu waray warantinkuna ima päsananpä kanqantapis.

8Manam pipis wanuypita qeshpintsu ni imay junaq wanunanpä kanqanta akrayta puëdintsu. Wanuypita defiendikunaykipäqa manam ima armapis kantsu. Mana alli kanqaykipis wanuypitaqa manam salvashunkitsu.

9Kay patsachö imanir llapan päsanqankunata tantiyanäpä yarpachakur y runakuna runa mayinta imanir ñakatsiyanqanta yarpachakurmi tsaykunata tantiyarqü.

10Tsaynöllam rikarqü wakin runakuna sagrädu templuman aywarpis mana allikunata rurayanqanta. Wanuskiptinmi mana alli kanqanta qonqaykur alli kanqanta nir pampayan. Tsayqa llakikuypämi kaykan.

11Mana alli ruraq runata jutsanpita ras mana castigaptinqa wakinpis llutanta rurayänallanpämi yarpäyanqa.

12Mana alli ruraq runakuna pachak (100) kuti jutsata rurayaptinpis y atska wata kawayaptinpis noqaqa musyämi Tayta Diosta mantsapakuqkuna allipä cäsukuyanqanta.

13Mana alli runaqa Tayta Diosta mana mantsapakur manam allitsu kawanqa ni atska watatsu kawanqa. Tsaypa rantinqa llantuy päsaqnöllam ushakanqa.

14Tsaynöllam rikarqü alli runakuna jutsa ruraqnöpis pasaypa ñakaykaqta. Tsaynöllam rikarqü mana alli runakuna allita ruraqnöpis alli kawaykaqta. Tsaypis llakikuypämi kaykan.

15Tsaymi nï: Tsaypita llakikunantsikpa rantinqa kushishqa kawashun. Kay patsachö ñakarpis mikushun, upushun y kushishqa kawashun.

16Kay patsachö imanir llapan päsanqankunata musyayta munarmi shumaq yarpachakurqü. Tsaymi rikarqü punuytapis mana tariypa runakuna aruyanqanta.

17Tsaynöllam tantiyarqü Tayta Dios kay patsachö llapan ruranqanta pipis mana tantiyanqanta. Imanöpa yarpachakurpis manam tantiyashuntsu. Yachaq runa «noqaqa tantiyämi» nirpis manam rasunpaqa tantiyantsu.

← Chapter 7 Jump to: Chapter 9 →