Esther 1

Quechuan QXO (Biblia en Quechua del sur de Conchucos)

Jump to: Chapter 2 →

1Juk reymi Asuero jutiyuq karqan. Paymi India nacionpita qallaykur hasta Etiopía nacionyaq pachak ishkay chunka qanchis (127) provinciakunapa mandaqnin karqan.

2Rey Asueruqa Susa markapitam llapan tsay provinciakunata mandarqan.

3Kimsa wata mandaq kaykarmi fiestata rey Asuero ruratsirqan llapan mandar yanapaqninkunapä, Persiachö y Mediachö soldädukunapa capitanninkunapä y provinciakunapa autoridäninkunapä.

4Tsay fiestatam pasaypa rïcu y poderyuq kanqanta musyayänanpä joqta killa ruratsirqan.

5Fiesta rurayta ushaskirnam Susa markachö täraq runakunatana rey Asuero qayatsirqan palaciunpa patiunchö qanchis junaq fiestata rurar mikuyänanpä. Tsaymi rïcupis pobripis tsayman aywayarqan.

6Palaciupa patiunchömi juk ramädata yuraq y azul fïnu toldukunawan qatayarqan. Lïnupita rurashqa granäti cordonkunawanmi tsay toldukuna watararqan yuraq qellaypita rurashqa argöllakunaman. Tsay argöllakunam marmolpita rurashqa paradorkunachö laqaräyarqan. Tsaynöllam qoripita y qellaypita rurashqa kuyayllapä bancakunapis tsaychö karqan. Tsay patiupa pïsunmi adornararqan kuyayllapä läja rumikunawan, pórfido rumikunawan y yuraq y yana marmolkunawan.

7Rey Asueruqa vïnutapis jina jinam qoripita rurashqa cöpakunawan qarakatsirqan. Cada cöpam juk niraq juk niraq rurashqa karqan.

8Vïnu qarakuqkunatam rey Asuero nirqan upuyta mana munaq kaqtaqa pitapis mana obligayänanpä, sinöqa upuyta munaq kaqlla upuyänanpä.

9Tsay qayatsinqan runakunapa warminkunapämi reina Vastipis mikuyta kusinatsirqan. Paykunaqa rey Asuerupa palaciun rurinchönam mikuyarqan.

10Fiesta qallanqanpita qanchis junaqtam rey Asuero shinkashqa kar yärakunqan kaq qanchis eunucu runakunata qayatsirqan. Paykunam kayarqan Mehumán, Bizta, Harbona, Bigtán, Abagta, Zetar y Carcas.

11Chaykuyaptinmi tsay runakunata mandarqan warmin Vastita corönan jatishqata pushayämunanpä. Vasti kuyayllapä kanqanta común runakunapis y autoridäkunapis rikayänanpämi tsayman pushayänanpä nirqan.

12Pushayänanpä qanchis eunucu runakunata rey mandaykaptinpis Vastiqa manam aywayta munarqantsu. Aywayta mana munanqanta willayaptinmi rey Asueruqa pasaypa rabyarqan.

13Tsay witsanmi imapis kaptin ley yachaqkuna reyta imaypis yätsiyaq. Tsaymi paykunata rey qayatsirqan imata rurananpä kanqantapis tantiyatsiyänanpä.

14Ley yachaq runakunachö rey Asuerupa mas amïgunkunam kayarqan Carsena, Setar, Admata, Tarsis, Meres, Marsena y Memucán. Tsay runakunaqa entëru Persiachö y Mediachö respitashqa runakunam kayarqan. Paykunam reypa yätsiqninkuna y mandar yanapaqnin autoridäninkuna kayarqan.

15Paykunata tapurmi rey Asuero nirqan: «Mandanqä eunucu runakunawan qayaykätsiptï Vasti manam cäsumashqatsu. ¿Imata ruranäpätä ley nin?»

16Tsaymi mandar yanapaqnin autoridäkunapa puntanchö rey Asueruta Memucán nirqan: «Tayta rey, warmiki Vasti manam qamllatatsu penqakuyman churashurquyki, sinöqa mana cäsushurnikim maytsaychö mandakur yanapashuqnikikunatapis y mandanqayki provinciakunachö täraq runakunatapis penqakuyman churashqa.

17Reina Vasti mana cäsunqanta musyaykurqa wakin warmikunapis tsaynöllam runankunata cäsuyanqatsu. Mana cäsurmi niyanqa: «Rey Asuero qayatsiptinpis reina Vasti manash aywanätsu».

18Persiachö y Mediachö mandar yanapashuqniki autoridäkunapa warminkunapis reina Vasti tsaynö ruranqanta musyaykurqa runankunata mananam cäsuyanqatsu. Tsaynö ruraptinqa rimanakullarmi kawayanqa.

19«Tayta rey, tsaynö mana kananpä juk leyta rurashun mandanqayki kaqchöqa llapanpis cumpliyänanpä. Tsay leyta imaypis cumpliyänanpä Persiachö y Mediachö kaq wakin leykuna qellqashqa kanqan libruchö qellqashqa katsun. Tsay ley katsun warmiki Vasti imaypis puntaykiman mana kutimunanpä y mas cäsukuq kaq alli warmina paypa rantin reina kananpä.

20Tsay leyta maytsaychöpis mandanqayki kaqchö musyatsishun. Musyarmi warmikuna mantsapakur runanta rïcu o pobri kaptinpis respitayanqa».

21Memucán tsaynö niptinmi rey Asuero y yanapaqninkunapis niyarqan: «Tsay ninqaykiqa allim». Tsaymi tsay yätsinqannölla llapanta qellqaykur

22ordinta apatsirqan mandanqan maytsay provinciakunaman. Tsay ordin qellqashqa karqan kikinkunapa idiömankunachö y imanöpis qellqayanqan estïlunchömi. Tsay ordinmi nirqan llapan runakuna warminta poderninchö tsararäyänanpä.

Jump to: Chapter 2 →