Esther 7

Quechuan QXO (Biblia en Quechua del sur de Conchucos)

← Chapter 6 Jump to: Chapter 8 →

1Tsaypitanam rey Asueruwan Amánqa Ester kusinatsinqan mikuyta mikuyänanpä aywayarqan.

2Tsay junaqpis mikur upur jamaraykanqanchömi yapay rey Asuero reina Esterta nirqan: «Mañakamanqaykitaqa imatapis awnishaykim. Hasta pullan mandanqä nacionkunata mandayta munaptikipis entregashaykim».

3Tsaymi Ester nirqan: «Tayta rey, kuyamarqa mañakunqäta awniykallämay. Noqata y castäkunata wanuypita salvaykayällämay. Tsaypita mastaqa manam imatapis mañakütsu.

4Llapan Israel mayïkunatawan wanutsiyämänanpänam kaykan. Sirviq kayänäpä maytsaymanpis rantikayämaptinqa manam imatapis parlakümantsu ni umaykita nanatsiq shamümantsu. Wanutsiyämänanpä kanqanta musyarmi rugaq shamurqü».

5Tsaynö niptinmi rey Asuero nirqan: «¿Pitä tsaynö wanutsiyäshunaykipä yarpashqa? ¿Maychötä kaykan tsay runa?»

6Esternam nirqan: «¡Wanutsiyämänanpä yarpaq runaqa kay Amánmi kaykan!» Tsayta wiyaykurmi Amánqa reypa y reinapa puntanchö pasaypa mantsakaskirqan.

7Rey Asueruqa pasaypa rabyarmi mikuykanqanpita shärirkur patiu kaqpa yarqurqan. Tsaynö rabyakuptinmi Amánqa pasaypa mantsarir Esterta rugarqan rey Asuero mana wanutsinanpä.

8Patiupita rey Asuero kutiykurnam Amánta tarirqan reina Ester kitiraykaptin makallakurkur rugaykaqta. Tsaymi pasaypa rabyar nirqan: «¿Kikïpis kaychö kaykaptïku warmïpita burlakuyta munaykanki?» Rey Asuero tsaynö niptinmi wardiakuna jinan höra Amánta tsariskir umanta tsapaskiyarqan.

9Tsay höram Harbona jutiyuq eunucu nirqan: «Amánpa wayinchömi aya tuyriränanpä ishkay chunka ishkay (22) metru qeru listu jawiraykan. Tsay qeruta Amán jawitsishqa favorniki shäriq Mardoqueupa ayanta tsayman tuyritsinanpämi». Tsaymi rey Asuero nirqan: «¡Tsayman kikinpa ayanta tuyriyay!»

10Tsaynöpam Amánpa ayanta Mardoqueupä jawitsinqan qeruman tuyritsirqan. Tsaynö ruraskiyaptinmi rey Asuerupa rabyaynin päsaskirqan.

← Chapter 6 Jump to: Chapter 8 →