Esther 3

Quechuan QXO (Biblia en Quechua del sur de Conchucos)

← Chapter 2 Jump to: Chapter 4 →

1Tsaypitanam rey Asuero churarqan Hamedatapa tsurin Amánta mandanqan provinciakunachö llapan mandaqkunapa mandaqnin kananpä. Amánqa Agag casta runam karqan.

2Tsaynö churarkurmi rey Asuero ordenarqan palaciuchö aruqkuna qonquriykur y umpukuykur Amánta saludayänanpä. Peru tsaynö mandaykaptinpis Mardoqueuqa manam qonqurikuykurqantsu ni umpukurqantsu.

3Tsaymi palaciu punkuchö aruqkuna Mardoqueuta tapur niyarqan: «¿Imanirtä rey Asuero ordenanqanta cäsunkitsu?»

4Qoyay qoyay niyaptinpis Mardoqueuqa manam Amánta saludananpä qonqurikuykurqantsu. Israel runa kanqanta Mardoqueo willaykuptinmi Amánman aywaykur willayarqan: «Mardoqueuqa Israel runa karshi saludashunaykipä qonqurikuntsu». Tsaynö willayarqan Amán imata rurananpä kanqantapis rikayta munarmi.

5Mardoqueo mana qonqurikunqanta y mana umpukunqanta rikaykurnam Amánqa pasaypa rabyarqan.

6Israel runa kanqanta musyaykurmi yarpachakur nirqan: «Kay runallata wanutsinäpa rantinqa llapan Israel casta kaqtaqa maytsaychöpis rey Asuero mandanqan kaqchö wanutsishä».

7Chunka ishkay watana rey Asuero mandaq kaykaptinmi punta kaq killa Amánpa puntanchö suertiyayarqan. Tsay suerti jitaypa jutinmi karqan Pur. Punta kaq killapa jutinnam karqan Nisán. Tsaynö suertiyayarqan mayqan junaqchö y mayqan killachöpis Amán yarpanqannö Israel runakunata wanutsiyänanpämi. Suertiyayaptinmi chunka ishkay kaq killa kimsa kaq junaq yarqamurqan. Chunka ishkay kaq killapa jutinmi karqan Adar.

8Tsaymi Amánqa rey Asuero kaqman aywaykur nirqan: «Tayta rey, mandanqayki provinciakunachömi juk casta runakuna kayan wakin runakunawan mana qorikaq. Paykunaqa kikinkunapa leyninkunallata cäsurmi mandanqaykitapis cäsuyantsu. Tsay casta runakunataqa llapanta wanutsishun.

9Awniptikiqa tsay casta runakunata ushakätsinantsikpä maytsaymanpis ordinta apatsishun. Noqam gastukunapäqa alistamushä kimsa pachak kimsa chunka waranqa (330,000) kïlu yuraq qellayta».

10Amán tsaynö niptinmi rey Asueruqa sëllakunan sortïjanta jipiskir Israel runakunapa contran Amánta entregarqan paypa jutinchö ordinta sëllananpä.

11Tsaypitam nirqan: «Alistamunaykipä kaq yuraq qellaytaqa kikikipä churakuy. Tsay casta runakunataqa yarpanqaykinö ushakätsiy».

12Tsaymi punta kaq killa chunka kimsa kaq junaqchö rey Asuerupa secretariunkunata Amán qayaykatsir ordinta qellqatsirqan. Rey mandanqan provinciakunachö y markakunachö atska idiömata parlayaptinmi tsay ordinta qellqayarqan llapan idiömakunachö y runakuna imanöpis qellqayanqan estïlunchö. Qellqaskatsirmi apatsirqan reyta mandar yanapaqninkunapä, llapan provinciakunapa mandaqninkunapä y rey mandanqan nacionkunapa autoridäninkunapäpis. Ordinchö ninqanta cumpliyänanpämi rey Asuerupa jutinta qellqaykur anïllunwan sëllayarqan.

13Tsay qellqayanqan ordintam maytsay mandanqan provinciakunaman apatsirqan. Tsay ordinchömi nirqan juk junaqllachö rukutapis, jövintapis, wamratapis, warmitapis llapan Israel runakunata wanutsiyänanpä. Tsaynöllam nirqan wanutsiyanqan Israel runakunapa llapan imaykantapis apakuyänanpä. Tsaynö wanutsiyänanpä jitapanqan junaqmi chunka ishkay kaq killachö kimsa kaq junaq karqan. Tsay killapa jutinmi karqan Adar.

14Tsay ninqanta cumpliyänanpämi maytsaymanpis ordinta apatsiyarqan. Tsaymi rey mandanqan llapan provinciakunachö y markakunachöpis musyayarqan. Tsaynöpam maytsaychöpis runakuna alistakuyarqan jitapanqan junaq Israel runakunata wanutsiyänanpä.

15Ordinta apayänanpä rey niptinmi mandanqan runakuna jinan höra aywayarqan. Tsaynöllam Susa markachöpis tsay ordinchö ninqanta llapan runakuna musyaykur pasaypa mantsakäyarqan. Rey Asueruwan Amánmi sïqa kushikurnin upyayarqan.

← Chapter 2 Jump to: Chapter 4 →